KAPU 35

Beto Lenda Telama na Lufwa!

KANA beto kufwa, keti Nzambi tazola kufutumuna beto, disongidila, kuvutula beto na luzingu?— Muntu ya mbote Yobi vandaka kukwikila nde Nzambi kezolaka kusala yo. Yo yina, ntangu Yobi kumonaka nde yandi kumaka penepene na lufwa, yandi tubaka na Nzambi nde: “Nge zolaka kubinga mono, ebuna mono zolaka kwisa.” Yobi kutubaka nde Yehowa Nzambi zolaka mpenza kufutumuna yandi.—Yobi 14:14, 15.

Yezu kele kaka bonso Tata na yandi, Yehowa Nzambi. Yezu kezolaka kusadisa beto. Ntangu bakala mosi yina vandaka na maladi ya lepre kutubilaka yandi nde, “kana nge zola, nge lenda belula mono,” Yezu kuvutulaka nde: “Mono me zola.” Mpi yandi belulaka lepre ya bakala yina.—Marko 1:40-42.

Yezu kulongukaka kikalulu ya kuzola bana ya fyoti na Tata na yandi. Na ntangu ya ntama, Yehowa kusadilaka bansadi na yandi mbala zole sambu na kufutumuna bana ya fyoti. Elia kubondilaka Yehowa na kufutumuna mwana-bakala ya mama mosi yina kuyambaka Elia mbote. Mpi Yehowa kusalaka yo. Yehowa kusadilaka dyaka nsadi na yandi Elisa sambu na kufutumuna  mwana-bakala mosi ya fyoti.—1 Bantotila 17:17-24; 2 Bantotila 4:32-37.

Keti nge ke na kyese ve na kuzaba nde Yehowa kezolaka beto mingi?— Yandi keyindulaka beto ve kaka na ntangu beto kevandaka na luzingu. Yandi keyibukaka beto mpi kana beto kufwa. Yezu kutubaka nkutu nde Tata kemonaka bantu ya kufwa yina yandi kezolaka bonso nde bo kele kaka na luzingu! (Luka 20:38) Biblia ketuba nde ‘ata lufwa, ata luzingu, ata mambu ya sesepi yai, ata mambu yina ke kwisa na ntwala lenda kabula beto ve na kuzola yina Nzambi kezolaka beto.’—Roma 8:38, 39.

Ntangu Yezu kuvandaka na ntoto, yandi songaka nde Yehowa keyindulaka bana ya fyoti. Kuvila ve nde Yezu vandaka kubaka ntangu sambu na kutubila bana ya fyoti mambu ya Nzambi. Kansi, keti nge mezabaka nde Nzambi kupesaka Yezu ngolo ya kufutumuna bana ya fyoti?— Beto tubila mambu yina kulutaka ntangu Yezu kufutumunaka mwana-nkento mosi ya bamvula 12, mwana ya muntu mosi ya bo vandaka kubinga nde Yairusi.

Yairusi vandaka kuzinga penepene na Nzadi ya Galilea ti nkento na yandi mpi mwana na bo mosi kaka ya nkento. Kilumbu mosi mwana yina kubelaka ngolo mpenza mpi Yairusi kubakisaka nde yandi tafwa. Yairusi yantikaka na kuyindula Yezu, sambu yandi waka nsangu nde muntu yai ya mbote vandaka ti ngolo ya kubelula bantu. Yo yina, Yairusi kwendaka kusosa yandi. Yandi kutaka Yezu kelonga bantu mingi na lweka ya Nzadi ya Galilea.

Yairusi kukotaka na kati ya bantu tii kuna yandi kwendaka kubwa na makulu ya Yezu. Yandi tubilaka Yezu nde: ‘Mwana na mono ya nkento kebela ngolo mpenza. Pardo, keti nge lenda kwisa mpi kusadisa yandi? Mono mebondila nge na kukwisa.’ Na mbala mosi, Yezu kukwendaka ti Yairusi. Kibuka ya bantu yina kwendaka kutala Longi ya Nene kulandaka bo mpi. Kansi ntangu bo kumaka kamwa ntama, bantu yina kukatukaka na nzo ya Yairusi kwisaka kutubila yandi nde: “Mwana na nge me fwa. Nki mfunu ya kuyangisa diaka Longi?”

Yezu kuwaka ntangu bantu yina kutubaka dyambu yina. Yandi bakisaka nde Yairusi fwe wa mawa mingi sambu na lufwa ya mwana na yandi  yina mosi kaka. Yo yina Yandi songaka yandi nde: ‘Kuwa boma ve. Kwikila kaka na Nzambi, mpi mwana na nge taguluka.’ Bo kwendaka kaka tii kuna bo kumaka na nzo ya Yairusi. Ntangu bo kumaka kuna, banduku ya dibuta ya Yairusi vandaka kudila. Bo vandaka na mawa sambu nduku na bo ya fyoti kufwaka. Kansi Yezu kutubilaka bo nde: ‘Beno bika kudila. Mwana me fwa ve, kansi yandi melala mpongi.’

Ntangu Yezu kutubaka mpidina, bantu kuyantikaka na kuseka, sambu bo zabaka nde mwana kufwaka. Ebuna, nge keyindula nde sambu na nki Yezu kutubaka nde yandi vandaka ya kulala?— Nge keyindula nde nki dilongi yandi zolaka kulonga bantu?— Yandi zolaka nde bo zaba nde lufwa le vanda bonso mpongi ya ngolo. Yandi zolaka kulonga bo nde na nzila ya ngolo ya Nzambi, yandi le tedimisa muntu na lufwa kaka mutindu yo kevandilaka beto ve mpasi na kutedimisa muntu yina ke na mpongi.

Yezu kulombaka bantu yonso na kubasika na nzo; yandi bikisaka kaka bantumwa na yandi Piere, Yakobo, ti Yoane, mpi tata ti mama ya mwana yina. Na nima, yandi kotaka kisika mvumbi ya mwana yina kuvandaka. Yandi simbaka mwana na diboko mpi yandi tubaka nde: “Mwana-nkento, telama!” Na mbala mosi, mwana-nkento telamaka mpi yandi yantikaka na kutambula! Tata ti mama na yandi kuwaka kyese mpenza.—Marko 5:21-24, 35-43; Luka 8:40-42, 49-56.

 Ntangu yai, yindula dyambu yai. Sambu Yezu kukaka na kufutumuna mwana-nkento yina, keti yandi le sala mpi mutindu mosi sambu na bana yankaka?— Keti nge keyindula mpenza nde yandi tasala yo?— Ee, yandi tasala yo. Yezu yandi mosi kutubaka nde: “Ntangu ke kwisa, bantu yonso yina me fwaka kele na maziamu, bo ta wa ndinga na yandi; ebuna bo ta basika na maziamu na bo.”—Yoane 5:28, 29.

Keti nge keyindula nde Yezu kezolaka kufutumuna bantu?— Mbandu yankaka ya kele na Biblia kesadisa beto na kubaka mvutu na ngyufula yina. Mambu yina kusalamaka kilumbu mosi penepene na bwala Naini kesonga mutindu Yezu kewaka na ntangu yandi kemonaka bantu kedila na mafwa.

Mama mosi kuvandaka na kati ya kibuka ya bantu yina kukatukaka na Naini sambu na kwenda kuzika mwana-bakala ya mama yina. Bakala ya nkento yai katukaka kufwa ntama mingi ve, ebuna na nima mwana na yandi mosi kaka kufwaka. Yandi vandaka na mawa mpenza! Bantu mingi ya Naini vandaka kulanda mvumbi ya mwana na yandi ntangu bo vandaka kunata yo na nganda ya bwala. Mama yina vandaka kudila, kansi bantu vandaka kukuka ve na kulembika yandi.

Kilumbu yango, Yezu vandaka kukwenda na Naini ti balongoki na yandi. Ntangu bo kumaka penepene na kyelo ya bwala, bo kutanaka ti kibuka ya bantu yina vandaka kwenda kuzika mwana-bakala ya mama yina. Ntangu Yezu kumonaka mutindu mama yina vandaka kudila, yandi wilaka yandi mawa mpenza. Yandi waka mawa mingi mpenza na ntima. Yandi zolaka kusadisa nkento yango.

Kansi nkento yango kuvandaka pima ntangu Yezu kutubilaka yandi ti zola mpi ti kikesa yonso nde: “Kudila ve!” Kimuntu ya Yezu ti mutindu ya yandi tubilaka kusalaka nde bantu yonso kutala yandi ti dikebi kibeni. Ntangu Yezu vandaka kukwenda penepene ti mvumbi ya mwana-bakala yina, yo fwe vanda nde bantu yonso kudiyulaka nde nki kibeni yandi tasala. Yezu kutubaka nde: ‘Mwana-bakala, mono ke tubila nge: Telama!’ Na mbala mosi, yandi tedimisaka ntulu! Ebuna yandi yantikaka na kutuba.—Luka 7:11-17.

 Yindula mutindu mama yina kuwaka! Kana yo vandaka nge, inki mutindu nge zolaka kuwa na kuyamba muntu ya nge vandaka kuzola mingi yina mefutumuka?— Keti yo kesonga ve nde Yezu kezolaka mpenza bantu mpi yandi kezolaka kusadisa bo?— Yindula kyese yina tavanda na inza ya mpa ya Nzambi ntangu beto tayamba dyaka bantu yina tafutumuka!—2 Piere 3:13; Kusonga 21:3, 4.

Na ntangu yina, bantu mingi yina tafutumuka tavanda bantu yina ya beto zabaka, bana mpi tavanda na kati na bo. Beto tazaba bo mutindu Yairusi kuzabaka mwana na yandi ntangu Yezu kufutumunaka yandi. Bankaka tavanda bantu yina kufwaka bamvula nkama to mafunda meluta. Kansi, Nzambi tavila bo ve ata bo zingaka bamvula mingi meluta.

Keti yo kele ve kyese na kuzaba nde Yehowa Nzambi ti Mwana na yandi, Yezu, kezolaka beto mingi mutindu yina?— Bo kezola nde beto zinga, bamvula fyoti mpamba ve, kansi mvula na mvula!

Sambu na yina metala kivuvu ya kitoko ya Biblia kepesa sambu na bafwa, beto tanga Yezaya 25:8; Bisalu 24:15; mpi 1 Korinto 15:20-22.

[Bifwanisu ya kele na lutiti 182]

Inki mutindu Yehowa kusongaka nde yandi kezolaka bana ya fyoti?

[Kifwanisu ya kele na lutiti 184]

Inki mambu beto kelonguka na mutindu Yezu kufutumunaka mwana-nkento ya Yairusi?

[Kifwanisu ya kele na lutiti 186]

Lufutumuku ya mwana mosi kaka ya mama yai kesonga inki?