KAPU 37

Beto Yibuka Yehowa Ti Mwana na Yandi

YINDULA ntete kana muntu kupesa nge dikabu mosi ya kitoko mpenza. Inki mutindu nge tatadila yo?— Keti nge tapesa yandi kaka mersi ebuna na nima nge vilana kwa nge mambu yonso ya metala muntu yango? To keti nge tayibukaka yandi ti mambu yina ya yandi sadilaka nge?—

Yehowa Nzambi kupesaka beto dikabu mosi ya kitoko. Yandi tindaka Mwana na yandi na ntoto sambu yandi kufwa sambu na beto. Keti nge mezaba sambu na nki yo lombaka nde Yezu kufwa sambu na beto?— Yai ke dyambu mosi ya mfunu mpenza ya beto fwete bakisa.

Mutindu beto longukaka na Kapu 23, Adami kusalaka masumu ntangu yandi kululaka nsiku ya kukuka ya Nzambi. Mpi beto mebakaka masumu ya Adami yina ke tata na beto yonso. Ebuna nge keyindula nde beto ke na mfunu ya inki?— Na mutindu mosi ya kimfwani, beto ke na mfunu ya tata ya mpa, yina kuzingaka luzingu ya kukuka na ntoto. Nge keyindula nde tata yango le vanda nani?— Yezu.

Yehowa kutindaka Yezu na ntoto sambu yandi kukuma tata na beto na kisika ya Adami. Biblia ketuba nde: “‘Muntu ya ntete ya Nzambi salaka, Adami, [kukumaka moyo ya kezinga, NW]’; kansi Adami ya nsuka [kukumaka] Mpeve yina kepesaka moyo.” Nani kuvandaka Adami ya ntete?— Adami ya ntete kuvandaka muntu yina Nzambi kusalaka na pusiere ya ntoto. Nani kele Adami ya zole?— Yezu. Biblia kesonga yo ntangu yo ketuba nde: “Nzambi salaka Adami ya ntete na pusiere ya ntoto; kansi Adami ya zole [Yezu] katukaka na zulu.”—1 Korinto 15:45, 47; Kuyantika 2:7.

Sambu Nzambi kubakaka luzingu ya Yezu na zulu ebuna yandi tulaka yo na divumu ya Maria, Yezu kubakaka ve ata disumu mosi ya Adami.  Yo yina Yezu kuvandaka muntu ya kukuka. (Luka 1:30-35) Yo yina mpi mambu ya wanzyo mosi kutubilaka bangungudi ntangu Yezu kubutukaka nde: “Na mpimpa yai, bo me butila beno Ngulusi.” (Luka 2:11) Kansi sambu na kukuma Ngulusi na beto, yo lombaka nde Yezu yina vandaka bebe kusala ntete inki?— Yo lombaka nde yandi kuyela mpi yandi kukuma mbuta, bonso Adami. Na nima, Yezu lendaka kukuma “Adami ya zole.”

Yezu, yina kele Ngulusi na beto, takuma mpi “Tata” na beto ya “mvula na mvula.” Biblia kebingaka yandi mutindu yina. (Yezaya 9:5, 6) Ya kyeleka Yezu, yina kele muntu ya kukuka, mefwana na kukuma tata na beto na kisika ya Adami, yina kukumaka muntu ya kukonda kukuka ntangu yandi sumukaka. Mpidina, beto le ndima nde “Adami ya zole” kuvanda tata na beto. Ntembe kele ve nde Yezu yandi mosi kele Mwana ya Yehowa Nzambi.

Kana beto kelonguka na kuzaba Yezu, beto le ndima yandi nde yandi kele Ngulusi na beto. Keti nge keyibuka kana na nki mambu yandi fwete gulusa beto?— Ee, na disumu ti lufwa yina beto mebakaka na Adami. Luzingu ya kukuka ya muntu ya kuyela yina Yezu kupesaka na kimenga sambu na beto, bo kebingaka yo nkudulu. Yehowa kupesaka nkudulu sambu masumu na beto kulolulama.—Matayo 20:28, NW; Roma 5:8; 6:23.

Ya kyeleka, beto kezola ve kuvilana mambu yina Nzambi ti Mwana na yandi mesalaka sambu na beto, mpidina ve?— Yezu kusongaka balongoki na yandi mutindu mosi ya kuluta mbote yina lenda sadisa beto na kuyibuka mambu ya yandi salaka. Beto tubila yo.

 Yindula nde nge kele na suku ya etaze ya nzo mosi na Yeruzalemi. Yo kele na mpimpa. Yezu ti bantumwa na yandi kele na mesa. Mwa misuni ya dimeme ya kuyoka, dimpa ya kukonda levire, mpi vinu ya mbwaki ke na zulu ya mesa. Bo ke na kudya madya mosi ya bo vandaka kudya kaka na dati yina. Keti nge mezaba sambu na inki?—

Madya yai kele sambu na kuyibusa bo mambu yina Yehowa kusalaka bamvula nkama mingi na ntwala ntangu bantu na yandi, bantu ya Izraele, kuvandaka bampika na Ezipte. Na ntangu yina, Yehowa kusongaka bantu na yandi nde: ‘Beno fwa dimeme na konso fami, mpi beno pakula menga na yo na bakyelo ya banzo na beno.’ Na nima  yandi tubaka nde: ‘Beno kota na banzo na beno, mpi beno dya dimeme.’

Bantu ya Izraele kusalaka yo. Kaka na mpimpa yina, wanzyo ya Nzambi kulutaka na kati ya Ezipte. Na banzo mingi, wanzyo kufwaka mwana ya ntete. Kansi ntangu wanzyo vandaka kumona menga ya dimeme na bakyelo, yandi vandaka kuluta na zulu ya nzo yango. Ata mwana mosi ve kufwaka na banzo yina. Farao, ntotila ya Ezipte, kuwaka boma sambu na mambu yina wanzyo ya Yehowa kusalaka. Yo yina, Farao kutubilaka bantu ya Izraele nde: ‘Kimpika na beno memana. Beno basika na Ezipte!’ Ebuna, bo kangaka bashamo ti bampunda na bo, mpi bo basikaka na Ezipte.

Yehowa kuzolaka ve nde bantu na yandi kuvila mutindu yandi katulaka bo na kimpika. Yo yina yandi tubaka nde: ‘Mbala mosi na mvula beno fwete kudya madya mutindu ya beno medya na mpimpa yai.’ Bo bingaka madya yai ya mfunu mingi nde Paki. Na mpimpa yina, wanzyo ya Nzambi ‘kulutaka na zulu’ ya banzo yina kuvandaka ti kidimbu ya menga.—Kubasika 12:1-13, 24-27, 31.

Yezu ti bantumwa na yandi vandaka kuyindula mutindu mambu yango kulutaka na ntangu bo vandaka kudya madya ya Paki. Na nima, Yezu kusalaka kima mosi ya mfunu mpenza. Kansi na ntwala ya kusala yo, yandi basisaka Yudasi, ntumwa yina ya kukonda kwikama. Ebuna, Yezu kubakaka dimpa mosi ya kukonda levire yina kubikalaka, yandi sambilaka yo, yandi zengaka yo, mpi yandi pesaka yo na balongoki na yandi. Yandi tubaka nde: “Beno baka mampa yai, beno dia yo.” Na nima yandi songaka bo nde: ‘Dimpa yai ketendula nitu na mono ya mono tapesa ntangu mu tafwa sambu na beno.’

Na nima, Yezu kubakaka dikopa ya vinu ya mbwaki. Na nima ya kusala kisambu yankaka sambu na kupesa Nzambi mersi, yandi pesaka yo na balongoki mpi yandi tubaka nde: “Beno nwa yo, beno yonso.” Na nima yandi tubilaka bo nde: ‘Vinu yai ketendula menga na mono. Ntama mingi ve, mono tatyamuna menga na mono sambu na kugulusa beno na masumu na beno. Beno landa na kusala dyambu yai sambu na kuyindula mono.’—Matayo 26:26-28; 1 Korinto 11:23-26.

 Keti nge memona nde Yezu kutubaka nde balongoki fwete landa na kusala dyambu yina sambu na kuyindula yandi?— Bo zolaka kudya dyaka ve madya ya Paki. Na kisika ya Paki, yo lombaka nde bo kuma kudya madya yai ya mfunu mingi mbala mosi na konso mvula, sambu na kuyibuka Yezu ti lufwa na yandi. Madya yango bo kebingaka yo nde Madya ya Mfumu. Bubu yai, beto kebingaka yo mingi nde Lusungiminu. Sambu na inki?— Sambu yo keyibusaka beto mambu yina Yezu ti Tata na yandi, Yehowa Nzambi, kusalaka sambu na beto.

Dimpa fwete yibusaka beto nitu ya Yezu. Yandi ndimaka na kupesa nitu yina sambu beto baka luzingu ya mvula na mvula. Ebuna nki beto tatuba sambu na vinu ya mbwaki?— Yo fwete yibusaka beto mfunu ya menga ya Yezu. Yo ke mfunu mingi kuluta menga ya dimeme ya bo sadilaka na Paki na Ezipte. Keti nge kezaba sambu na inki?— Biblia ketuba nde menga ya Yezu lenda lolula masumu na beto. Ebuna kana yo melolula masumu na beto yonso, beto tabelaka dyaka ve, beto tanunaka dyaka ve, mpi beto tafwaka dyaka ve. Beto fwete yindululaka mambu yai na ntangu beto kekwendaka na Lusungiminu.

Keti bantu yonso fwete dya dimpa mpi kunwa vinu na Lusungiminu?— Yezu kutubilaka bayina kedyaka dimpa mpi kenwaka vinu nde: ‘Beno tavanda na Kimfumu na mono mpi kuvanda na bakiti ya kimfumu na zulu ti mono.’ (Luka 22:19, 20, 30) Yo zolaka kutuba nde bo takwenda na zulu sambu na kuvanda bamfumu ti Yezu. Yo yina, kaka bayina kele ti kivuvu ya kuyala ti Yezu na zulu bantu fwete dya dimpa ti kunwa vinu.

Kansi, ata bayina kedyaka ve dimpa to kenwaka ve vinu fwete kwendaka na Lusungiminu. Keti nge mezaba sambu na inki?— Sambu Yezu kupesaka luzingu na yandi sambu na beto mpi. Na ntangu beto kekwendaka na Lusungiminu, beto kesongaka nde beto kevilanaka ve dyambu yai ya yandi sadilaka beto. Beto keyibukaka dikabu ya mbote ya Nzambi.

Baverse yai kele na kati ya baverse yina kesongaka mfunu ya nkudulu ya Yezu: 1 Korinto 5:7; Efezo 1:7; 1 Timoteo 2:5, 6; mpi 1 Piere 1:18, 19.

[Bifwanisu ya kele na lutiti 193]

Inki mutindu Adami ti Yezu kuvandaka mutindu mosi, mpi sambu na nki yo vandaka mfunu mingi nde bo vanda mutindu mosi?

[Kifwanisu ya kele na lutiti 194]

Na nki mutindu menga ya dimeme kutaninaka bantu ya Izraele?

[Kifwanisu ya kele na lutiti 194]

Inki mambu menga ya Yezu, yina Yezu fwanisaka ti vinu, lenda sala sambu na beto?