KAPU 7

Bulemfu Tataninaka Nge

KETI nge zolaka kuvanda na kyese kana nge vandaka ti kimpwanza ya kusala mambu yonso ya nge mezola? Keti bantangu yankaka nge kezolaka nde ata muntu mosi ve kutubila nge mambu ya nge fwe sala? Ntangu yai, ta masonga, mpi songa munu mambu yina nge keyindula.—

Inki kima meluta mbote sambu na nge? Keti yo ke mpenza mayele na kusalaka mambu yonso yina nge mezola? To keti mambu ya nge kesalaka kebutaka bambuma ya mbote na ntangu nge kelemfukilaka tata ti mama na nge?— Nzambi ketuba nde nge fwe lemfukila bibuti na nge, mpi kulemfukila bo mutindu yina fwe vanda ti kikuma ya mbote. Beto tala kana beto le bakisa kikuma yango.

Nge ke ti bamvula ikwa?— Keti nge mezaba kana tata na nge ke ti bamvula ikwa?— Mama na nge to nkaka na nge ya nkento to nkaka na nge ya bakala ke ti bamvula ikwa?— Bo mezingaka dezia bamvula mingi kuluta nge. Kana muntu mezinga bamvula mingi, yandi kevandaka ti ntangu mingi ya kulonguka mambu. Konso mvula, yandi kewaka mambu mingi, yandi kemonaka mambu mingi mpi yandi kesalaka mambu mingi. Yo yina, baleke lenda longuka mambu na bambuta.

Keti nge mezaba muntu mosi yina ke leke na nge na bamvula?— Keti nge mezaba mambu mingi kuluta yandi?— Sambu na nki nge mezaba  mambu mingi kuluta yandi?— Sambu nge mezingaka dezia bamvula mingi kuluta yandi. Nge mezwaka ntangu mingi ya kulonguka mambu mingi kuluta muntu yina ke leke na nge.

Nani mezingaka bamvula mingi kuluta nge to munu to bantu yonso yankaka?— Yehowa Nzambi. Yandi mezaba mambu mingi kuluta nge, mpi yandi mezaba mambu mingi kuluta munu. Kana yandi melomba beto na kusala kima mosi, beto fwe zaba nde yo ke ya mbote, ata yo le vanda mpasi na kusala yo. Keti nge mezaba nde kilumbu mosi, ata Longi ya Nene kumonaka mpasi na kulemfuka na kima mosi?—

Kilumbu mosi, Nzambi kulombaka Yezu na kusala kima mosi ya mpasi mpenza. Yezu kusambaka sambu na yo, mutindu beto kemona awa na kifwanisu. Yandi sambaka nde: “Kana nge zola, katula mono na mpasi yai.” Na ntangu yandi sambaka mutindu yai, Yezu kumonisaka nde yo vandilaka yandi ve pete na kusala luzolo ya Nzambi ntangu yonso. Kansi nki mutindu Yezu kusukisaka kisambu na yandi? Keti nge mezaba?—

Na nsuka ya kisambu na yandi, Yezu kutubaka nde: “Kulanda luzolo na mono ve, kansi luzolo na nge.” (Luka 22:41, 42) Ee, yandi zolaka nde luzolo ya Nzambi kusalama, kansi ya yandi mosi ve. Ebuna yandi kwendaka na ntwala mpi yandi salaka mambu ya Nzambi kuzolaka na kisika ya kusala mambu yina ya yandi yindulaka nde yo zolaka kuvanda mbote mingi.

Inki dilongi beto kebaka na dyambu yai?— Beto kebaka dilongi yai: Yo kevandaka kaka mbote na kusala mambu ya Nzambi ketuba, ata yo le vanda mpasi na kusala yo. Kansi, beto kelonguka mpi dilongi yankaka. Keti nge mezaba dilongi yango?— Beto kebakisa nde Nzambi ti Yezu ke muntu mosi ve, mutindu bantu mingi ketubaka. Yehowa Nzambi ke mbuta mpi yandi mezaba mambu mingi kuluta Mwana na yandi, Yezu.

 Ntangu beto kelemfukaka na Nzambi, beto kemonisaka nde beto kezolaka yandi. Biblia ketuba nde: “Kana beto ke zolaka Nzambi, yo ke songa nde beto ke landaka bansiku na yandi.” (1 Yoane 5:3) Mambu yai kesadisa nge na kubakisa nde beto yonso fwe lemfukaka na Nzambi. Nge kezolaka kulemfukila yandi, mpidina ve?—

Beto kangula Biblia na beto mpi beto tala mambu yina Nzambi kelomba bana na kusala. Beto tatanga mambu yina Biblia ketuba na Efezo kapu 6, baverse 1, 2, mpi 3. Yo ketuba nde: “Beno bana, beno fweti wila batata ti bamama na beno, sambu yina kele mambu ya bakristo fweti sala. Nsiku yina ke tuba nde: ‘Zitisa tata na nge ti mama na nge’, yo kele nsiku ya ntete ya Nzambi yikaka lusilu; lusilu yango, yo yai: ‘sambu nge kuvanda na kiese mpi nge kuvanda na luzingu ya nda awa na nsi-ntoto.’”

Nge memona nde, Yehowa Nzambi yandi mosi muntu ketubila nge nde nge fwe lemfukila tata ti mama na nge. “Kuzitisa” bo ketendula inki? Yo ketendula nde nge fwe pesa bo lukumu. Mpi Nzambi kesila nde kana nge lemfukila bibuti na nge, nge ‘tavanda na kyese.’

Bika mu tela nge disolo ya kibuka mosi ya bantu yina kugulukaka sambu bo lemfukaka. Bantu yango kuzingaka bamvula mingi meluta na bwala ya nene ya Yeruzalemi. Bantu mingi ya mbanza yina widikilaka ve Nzambi, yo yina Yezu kukebisaka bo nde Nzambi tafwa mbanza na bo. Yezu kutubilaka bo dyaka mambu yina ya bo fwe sala sambu na kuguluka kana bo vandaka kuzola mambu ya mbote. Yandi tubaka nde: ‘Ntangu beno tamona basoda mekwisa kuzyunga bwala Yeruzalemi, beno tazaba nde mebika fyoti Yeruzalemi kefwa. Na ntangu yina, beno basika na Yeruzalemi mpi beno tina na bangumba.’—Luka 21:20-22.

Kaka mutindu Yezu kutubaka, basoda kwisaka kunwanisa Yeruzalemi. Basoda ya Roma kuzyungaka Yeruzalemi ya mvimba. Na nima, kuzaba ve kana sambu na nki kikuma, basoda yango kuvutukaka na bwala na bo. Bantu mingi kuyindulaka nde kigonsa tavanda dyaka ve. Yo yina bo bikalaka na bwala. Kansi Yezu kutubilaka bo nde bo fwe sala inki?— Inki nge zolaka kusala kana nge vandaka kuzinga na Yeruzalemi?— Bayina kukwikilaka mpenza mambu ya Yezu kutubaka kubikaka banzo  na bo mpi bo tinaka na bangumba yina kuvandaka ntama ti Yeruzalemi.

Mvula ya mvimba kulutaka, kansi ata kima mosi kusalamaka ve na Yeruzalemi. Na mvula ya zole, ata kima mosi kusalamaka ve. Mpi na mvula ya tatu, kima mosi kusalamaka ve. Mbala yankaka bantu mingi kuyindulaka nde bayina kubasikaka na Yeruzalemi kuvandaka bazoba. Kansi na mvula ya iya, basoda ya Roma kuvutukaka. Bo zyungaka dyaka Yeruzalemi ya mvimba. Ntangu yai, mpila ya kutina kuvandaka dyaka ve. Na mbala yai, basoda kufwaka bwala. Mingi na kati ya bantu yina kuvandaka na bwala yango kufwaka, ebuna bankaka, bo nataka bo na kimpika.

Kansi, inki kukuminaka bayina kulemfukilaka Yezu?— Bo gulukaka. Bo vandaka ntama kibeni ti Yeruzalemi. Yo yina, mpasi kubwilaka bo ve. Bulemfu kutaninaka bo.

Kana nge kelemfukaka, keti yo tatanina nge mpi?— Bibuti na nge le tubila nge nde nge fwe sakanaka ve ata fyoti na balabala. Sambu na nki bo ketubilaka nge mutindu yina?— Sambu kaminyo le nyata nge. Kansi,  kilumbu yankaka nge le yindula nde: ‘Na lere yai, bakaminyo kele ve. Yo tanyata munu ve. Bana yankaka kesakanaka na balabala, kansi mu memonaka ntete ve kaminyo kunyata bo.’

Bantu mingi ya Yeruzalemi kuyindulaka mpi mutindu yina. Ntangu basoda ya Roma kuvutukaka kwa bo na mbala ya ntete, bantu kuyindulaka nde kigonsa tavanda dyaka ve. Bankaka kubikalaka na bwala. Yo yina bo mpi kubikalaka. Bo kebisaka bo, kansi bo waka ve. Yo yina bo fwaka.

Beto baka mbandu yankaka. Keti nge me sakanaka dezia ti folofolo?— Nge le mona yo bonso nsaka ya mpamba na ntangu nge kemona tiya kepela kana nge mepedisa nti ya folofolo. Kansi, kusakana ti banti ya folofolo le vanda kigonsa. Nzo yonso le pela tiya, mpi nge le fwa!

Kuvila ve nde, kulemfuka kaka mwa ntangu fyoti mefwana ve. Kansi, kana nge kelemfukaka ntangu yonso, yo tatanina nge mpenza. Nani ketubila nge nde, “Beno bana, beno fweti wila batata ti bamama na beno”?— Nzambi muntu ketuba. Mpi, kuvila ve nde, yandi ketuba mutindu yina sambu yandi kezolaka nge.

Ntangu yai, tanga baverse yai ya kesonga mfunu ya bulemfu: Bingana 23:22; Longi 12:13; Yezaya 48:17, 18; mpi Kolosai 3:20.

[Kifwanisu ya kele na lutiti 42]

Sambu na nki nge fwe wilaka bambuta?

[Kifwanisu ya kele na lutiti 43]

Inki malongi beto le longuka na kisambu ya Yezu?

[Kifwanisu ya kele na lutiti 45]

Inki mutindu kulemfuka na nsiku ya Yezu kugulusaka bantu yai?

[Bifwanisu ya kele na lutiti 46]

Sambu na nki nge fwe lemfukaka ata na ntangu nge kemona ve kigonsa?