KAPU 34

Inki Tasalama Kana Beto Mefwa?

ZIKU nge mezaba mbote nde bubu yai bantu kenunaka, kebelaka, mpi kefwaka. Nkutu bana mingi mpi kefwaka. Keti nge fwe waka boma ya lufwa to ya konso muntu yina mefwa?— Keti nge mezaba nki mutindu beto kekumaka kana beto mefwa?—

Ata muntu mosi ve ya kezinga bubu yai mefwaka ntete na nima yandi vutukaka dyaka na luzingu sambu na kutubila beto kana beto kekumaka nki mutindu na ntangu beto kefwaka. Kansi kuvandaka ti muntu mosi ya mutindu yina ntangu Yezu, Longi ya Nene, kuvandaka na ntoto. Beto lenda longuka mambu yina kekuminaka bayina kefwaka kana beto tanga disolo ya muntu yina. Muntu yango kuvandaka nduku ya Yezu mpi yandi vandaka kuzinga na Betania, mwa bwala mosi yina kuvandaka ntama mingi ve ti Yeruzalemi. Zina na yandi kuvandaka Lazare, mpi yandi vandaka ti bampangi zole ya bankento, Marta ti Maria. Beto tala mutindu Biblia keta disolo yango.

Kilumbu mosi, Lazare kubelaka ngolo mpenza. Na ntangu yina, Yezu kuvandaka ntama kibeni. Ebuna Marta ti Maria kutindaka muntu mosi na kwenda kusonga Yezu nde mpangi na bo, Lazare, kebela. Bo salaka yo sambu bo zabaka nde Yezu lendaka kwisa kubelula mpangi na bo. Yezu kuvandaka ve munganga, kansi Nzambi kupesaka yandi ngolo ya kubelula bamaladi ya mitindu yonso.—Matayo 15:30, 31.

Kansi, na ntwala nde Yezu kukwenda kutala Lazare, maladi ya Lazare kukumaka ngolo mpenza yo yina yandi fwaka. Kansi Yezu kutubilaka balongoki na yandi nde Lazare vandaka ya kulala, mpi nde, Yandi takwenda kutedimisa yandi na mpongi. Balongoki kubakisaka ve mambu ya Yezu zolaka kusonga bo. Yo yina Yezu kutubaka pwelele nde: “Lazare me fwa.” Kutuba yai ya Yezu kesonga nki sambu na yina metala lufwa?— Yo kesonga nde lufwa kele bonso mpongi ya ngolo. Yo kele  mpongi mosi ya ngolo mpenza yina kesalaka nde muntu kulala nkutu ndosi ve.

Ntangu yai, Yezu kwendaka kutala Marta ti Maria. Banduku na bo mingi kuvandaka dezia pana. Bo kwendaka kusyamisa bampangi ya bankento yina sambu mpangi na bo ya bakala kufwaka. Ntangu Marta kuwaka nde Yezu mekwisa, yandi kwendaka kukutana ti yandi. Ntama mingi ve, Maria mpi kubasikaka sambu na kumona Yezu. Yandi vandaka na mawa mingi mpi yandi vandaka kudila, ebuna yandi bwaka na makulu ya Yezu. Banduku yankaka yina vandaka kulanda Maria vandaka mpi kudila.

Longi ya Nene kuyulaka kisika ya bo tulaka Lazare. Ntangu bantu kuwaka mpidina, bo nataka Yezu na mazyamu kisika bo zikaka Lazare. Ntangu Yezu kumonaka bantu yonso yina vandaka kudila, yandi yantikaka mpi kudila. Yandi mezaba mpasi yina muntu kewaka kana muntu yina ya yandi kezolaka mingi mefwa.

Ditadi kuvandaka na kyelo ya dibulu yina, yo yina Yezu kutubaka nde: “Beno katula ditadi yai.” Keti bo zolaka kukatula yo?— Marta kumonaka nde yo vandaka ve dibanza ya mbote. Yandi tubaka nde: “Mfumu, yandi me kuma ntete nsudi, sambu yandi kele na maziamu bubu yai me lunga bilumbu iya.”

Kansi Yezu kutubilaka yandi nde: “Mono tubilaka nge ve nde kana nge kwikila nge ta mono lukumu ya Nzambi?” Yezu zolaka kutuba nde Marta zolaka kumona dyambu mosi yina zolaka kupesa Nzambi lukumu. Yezu kusalaka inki? Ntangu bo katulaka ditadi, Yezu kusambaka Yehowa na ndinga ya ngolo. Ebuna Yezu kutubaka na ndinga ya ngolo nde: “Lazare, kwisa kubasika!” Keti yandi zolaka kubasika? Keti yandi zolaka kukuka na kubasika?—

Keti nge le tedimisa muntu mosi yina ke na mpongi?— Ee, yandi tatelama kana nge binga na ndinga ya ngolo. Kansi, keti nge le tedimisa muntu mosi yina kelala mpongi ya lufwa?— Ve. Ata nge binga na ndinga ya ngolo ya nki mutindu, muntu ya kufwa tawa ve. Yo vanda nge to mono to konso muntu yankaka yina kele bubu yai na ntoto, beto le kuka ve kusala ata kima mosi sambu na kutedimisa bafwa.

 Kansi Yezu kele muntu mosi ya kuswaswana. Yandi kele na ngolo ya mutindu yankaka ya Nzambi mepesaka yandi. Yo yina ntangu Yezu kubingaka Lazare, kima mosi ya kuyituka kusalamaka. Muntu yina kufwaka banda bilumbu iya kubasikaka na mazyamu! Yandi vutukaka na luzingu! Yandi kumaka kupema, kutambula mpi kutuba dyaka! Ya kyeleka, Yezu kutedimisaka Lazare na lufwa.—Yoane 11:1-44.

Ntangu yai, yindula ntete: Inki kukuminaka Lazare ntangu yandi fwaka? Keti kitini mosi ya nitu na yandi, moyo to mpeve, kubikisaka nitu na yandi mpi yo kwendaka kuzinga kisika yankaka? Keti moyo ya Lazare kukwendaka na zulu? Keti yandi vandaka kuzinga kuna ti Nzambi mpi ti bawanzyo ya santu na nsungi yina ya bilumbu iya?—

Yo vandaka ve mutindu yina. Yibuka nde Yezu kutubaka nde Lazare vandaka ya kulala. Nge kevandaka nki mutindu ntangu nge kelalaka? Kana nge melala mpenza mpongi ya ngolo, si nge kezabaka ve ata kima mosi ya keluta penepene ti nge, mpidina ve?— Ebuna ntangu nge ketelamaka, si nge kezabaka ve kana bantangu ikwa nge melala tii kuna ya nge tatala na montre.

 Bafwa mpi kevandaka mutindu yina. Bo kezabaka ve ata kima mosi. Bo kewaka ve ata kima mosi. Mpi bo le sala ve ata kima mosi. Lazare mpi kuvandaka mutindu yina ntangu yandi fwaka. Lufwa kele bonso mpongi ya ngolo ya kesalaka nde muntu kuyibuka ve ata kima mosi. Biblia ketuba nde: “Bantu ya kufwa kuzaba kima ve.”—Longi 9:5, 10.

Yindula dyaka dyambu yai: Kana Lazare kuvandaka na zulu bilumbu yina iya, keti yandi zolaka ve kuta disolo ya mambu yina yandi monaka na zulu?— Mpi kana yandi vandaka na zulu, keti Yezu zolaka kukatula yandi na kisika ya kitoko ya mutindu yina sambu na kuvutula yandi na ntoto?— Ata fyoti ve!

Kansi, bantu mingi ketubaka nde beto kele ti moyo, mpi bo ketubaka nde moyo kelandaka na kuzinga kana nitu mefwa. Bo ketubaka nde moyo ya Lazare vandaka kulanda na kuzinga kisika mosi buna. Kansi, Biblia ketubaka ve mutindu yina. Biblia ketuba nde ntangu Nzambi kusalaka muntu ya ntete Adami, Adami kuvandaka “moyo ya kezinga.” Adami kuvandaka moyo. Biblia ketuba mpi nde ntangu Adami kusumukaka, yandi fwaka. Yandi kumaka ‘moyo ya kufwa,’ mpi yandi vutukaka na ntoto yina Nzambi kusadilaka sambu na kusala yandi. Biblia ketuba dyaka nde bana yonso ya Adami kubakaka disumu ti lufwa na yandi.—Kuyantika 2:7, NW; 3:17-19; Kutanga 6:6, NW; Roma 5:12.

 Ebuna, yo ke pwelele nde beto kele ve ti moyo yina kekabwanaka ti nitu na beto. Konso muntu na kati na beto kele moyo. Mpi sambu bantu mebakaka disumu ya muntu ya ntete, Adami, Biblia ketuba nde: ‘Moyo yina kesalaka masumu tafwa.’—Ezekiele 18:4.

Bantu mingi kewaka boma ya bafwa. Bo kezolaka ve kukwenda penepene ti mazyamu sambu bo keyindulaka nde bafwa kevandaka ti myoyo ya kekabwanaka ti nitu na bo, yina le monisa bantu yina kezinga mpasi. Kansi, keti muntu ya kufwa le monisa muntu yina kele na luzingu mpasi?— Yandi le sala yo ve.

Bantu mingi kekwikilaka nkutu nde bafwa le lwata nitu ya kimpeve na mpila nde bo kwisa kuvutuka dyaka sambu na kutala bantu yina kezinga. Yo yina bo kebumbilaka bafwa madya. Kansi bantu yina kesalaka mambu ya mutindu yina kebakisaka kwa bo ve mambu yina Nzambi ketubaka sambu na bafwa. Kana beto kekwikilaka mambu yina Nzambi ketubaka, beto tawa ve bafwa boma. Mpi kana beto kepesaka mpenza Nzambi mersi sambu na luzingu, beto tamonisaka yo na kusalaka mambu yina ya Yandi kezolaka.

Kansi, nge le kudiyula nde: ‘Keti Nzambi tafutumuna bana yina mefwaka? Keti yandi ke mpenza na luzolo ya kusala yo?’ Beto tatubila dyambu yango na nima.

Beto tanga baverse yankaka ya Biblia ya kemonisa mutindu bantu kekumaka na nima ya lufwa, mpi yina ya kemonisa nde muntu kele moyo, na Nkunga 115:17; 146:3, 4 mpi Yeremia 2:34, NW.

[Kifwanisu ya kele na lutiti 179]

Yezu kusalaka nki sambu na Lazare?

[Kifwanisu ya kele na lutiti 180]

Lazare kuvandaka nki mutindu ntangu yandi fwaka?

[Kifwanisu ya kele na lutiti 181]

Sambu na nki beto kele ve ti kikuma ya kuwaka boma ya bafwa?