KAPU 19

Keti Kunwana Ke Mbote?

KETI nge mezaba bana-babakala to bana-bankento yina kemoninaka bankaka mpi kemonisaka nde bo ke ngolo mingi?— Keti nge kezolaka kuvanda ti bo? To nge kezolaka kuvanda ti muntu ya mbote yina kezolaka ngemba?— Longi ya Nene kutubaka nde: “Kiese na bantu yina ke kotisaka ngemba na kati ya bantu, sambu Nzambi ta binga bo bana na yandi!”—Matayo 5:9.

Kansi mbala mingi bantu yankaka kesalaka mambu yina kepesaka beto makasi. Mpidina ve?— Yo yina le sala nde beto wa mpusa ya kuvutudila bo mbela. Kima ya mutindu yai kukuminaka balongoki ya Yezu kilumbu mosi ya bo vandaka kwenda ti Yezu na Yeruzalemi. Bika mu tela nge disolo yango.

Ntangu bo kumaka kamwa ntama, Yezu kutindaka balongoki na yandi ndambu na ntwala na bwala mosi ya Samaria sambu bo kwenda kusosa kisika mosi ya bo tapema. Kansi bantu yina kubuyaka nde bo pema ve na bwala na bo, sambu bantu ya Samaria vandaka kusambila ve dibundu mosi ti bo. Mpi bo vandaka kuzola  ve bantu yonso yina vandaka kwenda na Yeruzalemi sambu na kusamba.

Kana kima ya mutindu yina kukuminaka nge, inki nge zolaka kusala? Keti nge zolaka kuwa makasi? Keti nge zolaka kusosa mpila ya kuvutudila bantu yango mbela?— Yo yina kima longoki Yakobo ti Yoane zolaka kusala. Bo songaka Yezu nde: “Keti nge zola nde beto binga tiya na zulu, yo kwisa kufwa bantu yai yonso?” Mpila ya kuyituka kele ve na kumona nde Yezu kubingaka bo Bantu yina ke bonso Makelele ya Nzasi! Kansi Yezu kuzabisaka bo nde kusala bankaka mutindu yina ke mbote ve.—Luka 9:51-56; Marko 3:17.

Yo ke ya kyeleka nde bantangu yankaka, bantu le sala beto mambu ya mbi kibeni. Bana yankaka le buya nde beto sakana ve ti bo. Nkutu bo le tuba nde: “Beto kezola ve nge tambula ti beto.” Kana kima ya mutindu yai kusalama, yo le pesa beto mpasi na ntima, mpidina ve? Beto le wa nzala ya kusala kima mosi sambu na kuvutudila bo mbela. Kansi, keti beto fwe sala yo?—

Baka fyoti Biblia na nge. Beto kangula na Bingana kapu 24, verse 29. Kuna beto ketanga nde: ‘Kutuba ve nde: “Mu ta sala yandi mutindu yandi salaka munu. Munu mpi ta vutudila yandi mbi.”’

Verse yai ketendula nde inki?— Yo ketendula nde beto fwe sosaka ve kuvutulaka mbela. Beto fwe sala ve muntu mbi kaka sambu yandi salaka beto mbi. Kansi, inki nge tasala kana muntu kesosa kunwanisa nge? Yandi le yantika kubinga nge na bazina ya mbi sambu na kupesa nge makasi. Yandi le seka nge mpi kutuba nde nge kewaka yandi boma. Yindula ntete kana yandi fwe binga nge nde kamuntu ya boma ya ketekitaka mpambampamba. Inki nge tasala? Keti nge tasosa kunwana?—

Bika beto tala dyaka mambu yina Biblia ketuba. Beto kangula na Matayo kapu 5, verse 39. Kisika Yezu ketuba nde: ‘Kana muntu me sala nge mbi, nge lenda sala yandi mpi mbi ve. Kana muntu me bula nge mbata na ditama ya kitata, pesa yandi nzila na kubula nge na ditama ya kimama mpi.’ Nge keyindula nde Yezu zolaka kutuba nde inki? Keti yandi zolaka kutuba nde kana muntu kubula nge dikofi na ndambu mosi ya ilungi na nge, nge fwe bika nde yandi bula nge na ndambu yina yankaka?—

 Ve, Yezu zolaka ve kutuba mutindu yina ata fyoti. Mbata kele ve bonso kubula dikofi. Yo ketendulaka mingimingi kupusa to kutindika. Muntu le bula beto mbata sambu na kusosila beto. Yandi kezola nde beto kuwa makasi. Ebuna kana beto wa makasi mpi beto tindika yandi to kupusa yandi, inki tabasika?— Ntembe kele ve nde bitumba tabasika.

Kansi Yezu kuzolaka ve nde balongoki na yandi kunwana. Yo yina yandi tubaka nde kana muntu kubula beto mbata, beto fwe vutudila yandi ve. Beto fwe wa ve makasi, beto fwe nwana mpi ve. Kana beto sala yo, beto tamonisa nde beto kele kaka mutindu mosi ti muntu yina kuyantikaka na kusosila beto bitumba.

Kana matata mebasika, nge keyindula nki kima ya kuluta mbote ya nge fwe sala?— Kima ya kuluta mbote ya nge fwe sala kele kukatuka na kisika yina. Ziku muntu yankaka le pusa nge to kutindika nge mbala mingi.  Kansi mbala yankaka, yo tasuka kaka pana. Kana nge katuka kwa nge kisika yina, yo ketendula ve nde nge ke na ngolo ve. Yo ketendula nde nge ke na ngolo ya kusala mambu yina ke ya mbote.

Ebuna nki nge keyindula kana nge nwana mpi nge nunga bitumba? Inki le salama na nima?— Muntu yina nge mebula le vutuka ti banduku na yandi mingi. Bo le lwadisa nge nkutu ti nti ya nene to mbele. Keti nge kebakisa ntangu yai sambu na nki Yezu kuzolaka ve nde beto nwana?—

Inki beto fwe sala kana beto memona bantu yankaka kenwana? Keti beto fwe kotila muntu mosi?— Biblia ketubila beto kima mosi ya mbote. Beto baka Bingana kapu 26, verse 17. Yo ketuba nde: ‘Kukota na makambu yina me tadila nge ve ntangu nge ke na kuluta, yo kele bonso kusimba makutu ya mbwa.’

Inki tasalama kana nge simba ngolo makutu ya mbwa? Si mbwa tawa mpasi, mpi yo tasosa kutatika nge, mpidina ve? Ntangu mbwa tasosaka kukatuka na maboko na nge, nge mpi tasosaka kusimba yandi kaka ngolo na makutu mpi makasi ya mbwa tayikama dyaka mingi. Kana nge bikisa yo, ntembe kele ve nde yo tatatika nge ngolo. Kansi keti nge tatelama kaka pana sambu na kusimba makutu na yo tii kuna?—

Ee, yai ke mutindu ya matata ya beto takudisosila kana beto kwenda kukota na bitumba ya bantu yankaka. Ziku beto kezaba ve nani kuyantikaka bitumba yango to sambu na nki bo kenwana. Yo le vanda nde bo ke na kubula muntu mosi, mbala yankaka sambu yandi yibaka kima ya muntu yina kebula yandi. Kana beto sadisa  muntu yina bo kebula, yo tamonisa nde beto kekotila muyibi. Ya kyeleka yo tavanda ve mbote, mpidina ve?

Ebuna, inki nge fwe sala kana nge memona bantu kenwana?— Kana beno ke na nzo-nkanda, nge le kwenda ntinu sambu na kusonga longi mosi. Kansi kana beno ke ntama ti nzo-nkanda, nge le kwenda kubinga kibuti na nge mosi to polisi mosi. Ata ntangu bantu yankaka kezola kunwana, beto fwe vandaka bantu yina kezolaka ngemba.

Balongoki ya kyeleka ya Yezu kesalaka yonso sambu na kukonda kunwana. Na mutindu yina, beto kemonisaka nde beto ke ngolo na mambu yina ke ya mbote. Biblia ketuba nde longoki ya Yezu “lenda swana ve ti bantu ya nkaka. Yandi fweti vanda muntu ya mbote na bantu yonso.”—2 Timoteo 2:24.

Ntangu yai, beto tala bandongisila yankaka ya mbote yina tasadisa beto na kubuya kunwana: Roma 12:17-21; mpi 1 Piere 3:10, 11.

[Kifwanisu ya kele na lutiti 102]

Inki Yakobo ti Yoane zolaka kusala sambu na kuvutula mbela na bantu ya Samaria?

[Kifwanisu ya kele na lutiti 104]

Inki beto fwe sala kana muntu kesosa kunwanisa beto?

[Kifwanisu ya kele na lutiti 105]

Inki mutindu kukota na bitumba ya bantu yankaka ke bonso kusimba mbwa na makutu? Nge lenda lwala. Yo yina, kusala yo ve!

[Kifwanisu ya kele na lutiti 106]

Inki nge fwe sala kana nge memona bantu kenwana?