KAPU 24

Kukuma Ve Muyibi Ata Fyoti!

KETI muntu meyibaka nge dezia kima?— Inki mutindu nge kudiwaka?— Konso muntu yina kuyibaka yo ke muyibi, mpi ata muntu mosi ve kezolaka muyibi. Nge keyindula nde muntu kekumaka muyibi nki mutindu? Keti yandi kebutukaka mutindu yina?—

Beto mekatuka kulonguka nde bantu kebutukaka ti masumu. Yo yina beto yonso kele ya kukonda kukuka. Kansi ata muntu mosi ve kebutukaka muyibi. Muntu mosi ya ke na dibuta mosi ya mbote le kuma muyibi. Bibuti na yandi, bampangi na yandi ya babakala ti ya bankento le vanda bantu ya masonga. Kansi, mpusa yina muntu yandi mosi le yedisa sambu na bima bonso mbongo mpi bima yina bo le sumba ti mbongo le sala nde muntu kukuma muyibi.

Nani nge le tuba nde yandi vandaka muyibi ya ntete?— Beto yindula fyoti. Longi ya Nene kuzabaka muntu yina ntangu yandi vandaka na zulu. Muyibi yango kuvandaka wanzyo. Bawanzyo yonso ya Nzambi kusalaka kuvandaka ya kukuka, kansi nki mutindu wanzyo yina kukumaka muyibi?— Mutindu beto longukaka na Kapu 8 ya mukanda yai, yandi zolaka kima mosi yina kuvandaka ve ya yandi. Keti nge keyibuka kima yango?—

Ntangu Nzambi kusalaka bakala ti nkento ya ntete imene, wanzyo yina kuzolaka nde bo sambila yandi. Yandi vandaka ve ti nswa nde bantu yango kusambila yandi. Yo lombaka nde bo pesa lusambu na bo na Nzambi. Kansi yandi yibaka yo! Wanzyo yango kukumaka muyibi ntangu yandi pusaka Adami ti Eva na kusambila yandi. Yandi kumaka Satana Dyabulu.

Inki kesalaka nde muntu kukuma muyibi?— Mpusa ya kuzwa bima yina kele ya yandi ve. Mpusa yai le kuma ngolo mpenza mpi yo le pusa nkutu bantu ya mbote na kusala mambu ya mbi. Bantangu yankaka, bantu yina kekumaka miyibi kebalulaka ve bantima na bo ata fyoti sambu  na kusala dyaka mambu ya mbote. Ntumwa mosi ya Yezu kuvandaka mosi na kati ya bantu ya mutindu yina. Zina na yandi kuvandaka Yudasi Iskariote.

Yudasi kuzabaka nde kuyiba kuvandaka mbi sambu bo longaka yandi Nsiku ya Nzambi banda na bumwana na yandi. Yandi zabaka nde kilumbu mosi Nzambi kutubilaka nkutu bantu na yandi katuka na zulu nde: “Kuyiba ve.” (Kubasika 20:15) Ntangu Yudasi kuyelaka, yandi kutanaka ti Longi ya Nene mpi yandi kumaka longoki na yandi. Na nima, Yezu kuponaka nkutu Yudasi na kuvanda mosi na kati ya bantumwa na yandi 12.

Yezu vandaka kusala banzyetolo kumosi ti bantumwa na yandi. Bo vandaka kudya madya na bo kumosi. Ebuna mbongo yonso ya kimvuka yina bo vandaka na yo, bo vandaka kubumba yo na kesi mosi. Yezu kupesaka kesi ya mbongo yango na Yudasi sambu yandi kutanina yo. Ya kyeleka, mbongo yina kuvandaka ve ya Yudasi. Kansi, keti nge mezaba nki Yudasi kusalaka na nima ya mwa ntangu?—

Yudasi kuvandaka ve ti nswa ya kubaka mbongo na kesi yina, kansi yandi yantikaka kubaka yo. Yandi vandaka kubaka yo ntangu bankaka vandaka kumona yandi ve, mpi yandi kumaka kusosa nkutu bamwaye yankaka ya kubaka mbongo mingi. Bangindu na yandi yonso kukumaka kaka na mbongo. Beto tala mambu yina mpusa yina ya mbi kunataka yandi na kusala bilumbu fyoti kaka na ntwala nde bo fwa Longi ya Nene.

Maria yina kuvandaka mpangi ya nkento ya Lazare, nduku ya Yezu, kubakaka mananasi ya mbote mpenza mpi yandi tyamuninaka yo Yezu na makulu. Kansi, Yudasi kubokutaka. Keti nge kezaba sambu na inki?— Yandi tubaka nde yandi bokutaka sambu bo lendaka kuteka mananasi yina mpi kupesa mbongo yina ya bo tazwa na bansukami. Kansi, na kuta masonga, yandi zolaka nde mbongo kukota mingi na kesi sambu yandi kuyiba yo.—Yoane 12:1-6.

Yezu kusongaka Yudasi na kukonda kuyangisa Maria, yina kumonisaka ntima ya mbote mpenza. Yudasi kusepelaka ve ntangu Yezu kutubilaka yandi mpidina, yo yina yandi kwendaka kumona bambuta ya banganga-Nzambi, yina kuvandaka bambeni ya Yezu. Bo sosaka kukanga  Yezu, kansi bo vandaka kuzola kusala yo na mpimpa sambu bantu kumona bo ve.

Yudasi kutubilaka banganga-Nzambi nde: ‘Kana beno pesa munu mbongo, mu tasonga beno mutindu beno le kanga Yezu. Mbongo ikwa beno tapesa munu?’

Banganga-Nzambi nde: ‘Beto tapesa nge bibende makumi tatu ya mbongo.’—Matayo 26:14-16.

Yudasi kubakaka mbongo yina. Yo vandaka mpenza bonso nde yandi vandaka kuteka Longi ya Nene na bantu yina! Yindula ntete muntu kesala mambu ya mbi ya mutindu yina?— Yo ke mawa mingi, kansi mambu ya mutindu yai kesalamaka mbala mingi kana muntu mekuma muyibi mpi yandi keyiba mbongo. Yandi kekumaka kuzola mbongo kuluta bantu yankaka to nkutu Nzambi.

Ziku nge tatuba nde, ‘Mu le zola ve ata kima mosi kuluta Yehowa Nzambi.’ Ngindu ya mutindu yai ke ya mbote. Ntangu Yezu kuponaka Yudasi na kuvanda ntumwa na yandi, ziku Yudasi kuvandaka mpi na ngindu ya mutindu yina. Ziku bayina mekumaka miyibi kuvandaka mpi na bangindu ya mutindu yina. Beto tubila ndambu ya bantu yango.

Mosi na kati na bo kuvandaka nsadi mosi ya Nzambi na zina ya Akani, yina kuzingaka ntama na ntwala nde Longi ya Nene kubutuka. Akani  kumonaka kazaka mosi ya kitoko, kitini mosi ya wolo, mpi mwa bibende ya palata. Yo vandaka ve ya yandi. Biblia ketuba nde yo vandaka ya Yehowa sambu bo bakaka yo na bambeni ya bantu ya Nzambi. Kansi Akani kuzolaka yo mingi mpenza yo yina yandi yibaka yo.—Yozue 6:19; 7:11, 20-22.

Mbandu yankaka yo yai. Bamvula mingi meluta, Yehowa kuponaka Davidi na kuvanda ntotila ya bantu ya Izraele. Kilumbu mosi, Davidi yantikaka kutala Batsheba yina kuvandaka nkento mosi ya kitoko. Yandi landaka kaka na kutala Batsheba mpi na kuyindula nde yandi fwe nata yandi na nzo na yandi sambu yandi kukuma nkento na yandi. Kansi, Batsheba kuvandaka nkento ya Uria. Yo lombaka nde Davidi kusala inki?—

Yo lombaka nde Davidi kuyambula na kuyindula Batsheba. Kansi yandi salaka yo ve. Yo  yina, Davidi nataka yandi na nzo na yandi. Ebuna na nima, yandi yidikaka na mpila nde bo fwa Uria. Sambu na nki Davidi kusalaka mambu yai ya mbi?— Sambu yandi landaka na kuzola nkento yina kuvandaka ya muntu yankaka.—2 Samuele 11:2-27.

Sambu Davidi kubalulaka ntima na yandi, Yehowa kufwaka yandi ve. Kansi banda na ntangu yina, Davidi kukutanaka ti makambu mingi ya mpasi. Mwana na yandi Absalomi zolaka kukuma ntotila na kisika ya Davidi. Yo yina, ntangu bantu vandaka kwisa kutala Davidi, Absalomi vandaka kuyamba bo mpi kupesa bo babeze. Biblia ketuba nde: “Yandi vandaka [kuyiba bantima, NW] ya bantu ya Israele.” Yandi ndimisaka bantu yina na kuzola nde yandi kuvanda mfumu kansi Davidi ve.—2 Samuele 15:1-12.

Keti nge mezolaka dezia mingi mpenza kima mosi, mutindu Akani, Davidi, ti Absalomi kusalaka?— Kana kima yango kele ya muntu yankaka, kubaka yo kukonda nswa kele kuyiba. Keti nge keyibuka kima yina muyibi ya ntete, Satana, kuzolaka?— Yandi zolaka nde bantu kusambila yandi na kisika ya kusambila Nzambi. Yo ketendula nde Satana kuyibaka ntangu yandi pusaka Adami ti Eva na kulemfukila yandi.

Kana muntu ke ti kima na yandi, yandi ke ti nswa ya kutuba kana nani le sadila yo. Mu mbandu, kana nge mekwenda kusakana ti bana yankaka na nzo na bo, keti yo tavanda mbote na kubaka kima kuna sambu nge nata yo na nzo na beno?— Ve, yo tavanda mbote ve katula kaka kana tata to mama ya bana yina kupesa nge nswa ya kunata yo. Kana nge baka kima mosi na nzo na bo kukonda kulomba bo, yo ketendula nde nge meyiba.

Sambu na nki nge le wa mpusa ya kuyiba?— Sambu nge kezola kima yina ke ya nge ve. Ata muntu yankaka memona nge ve ntangu nge mebaka yo, nani memona nge?— Yehowa Nzambi. Beto fwete yibukaka mpi nde Nzambi kemengaka bantu yina keyibaka. Yo yina, zola sambu na Nzambi ti banduku na nge tasadisa nge na kukuma ve muyibi ata nki mutindu.

Biblia ketuba pwelele nde kuyiba ke mbi. Tanga Marko 10:17-19; Roma 13:9; mpi Efezo 4:28.

[Kifwanisu ya kele na lutiti 129]

Sambu na nki Yudasi vandaka kuyiba?

[Bifwanisu ya kele na lutiti 130]

Inki mambu ya mbi Akani ti Davidi ke na kuyindula?

[Kifwanisu ya kele na lutiti 130]

Na nki mutindu Absalomi kuvandaka muyibi?