KAPU 32

Mutindu Nzambi Kutaninaka Yezu

BANTANGU yankaka, Yehowa kesalaka mambu na mutindu mosi ya kuyituka mpenza sambu na kutanina bana ya fyoti yina le kuka ve kuditanina. Kana nge kwenda kutambula na nseke, nge le mona mutindu mosi ya Yehowa kesalaka sambu na kutanina beto. Kansi na luyantiku ziku nge tabakisa ve mbotembote nki kezola kusalama.

Nge memona ndeke mosi mebwa na ntoto penepene ti nge. Yo kemonana bonso nde yo kewa mpasi. Yo kebenda dipapu na yo mosi mpi yo ketina na ntangu nge kesosa kupusana penepene na yo. Na ntangu nge kelanda ndeke yango, yo mpi kelanda kaka na kutina nge. Ebuna, na mbala mosi, ndeke mepumbuka. Ndeke yina vandaka kuwa kwa yo ve mpasi na dipeka! Keti nge mezaba sambu na nki ndeke yango vandaka kusala mpidina?—

Yo vandaka kusala mpidina sambu yo bumbaka bana na yo na matiti penepene ti kisika yina yo kwisaka kubwa na ntwala na nge. Mama ya bana-bandeke yina kuwaka boma nde mbala yankaka nge tamona bana na yo mpi nge le sala bo mbi. Yo yina, yo salaka bonso nde yo kewa mpasi na mpila nde nge pusana ntama ti kisika yina bana na yo kuvandaka. Keti nge mezaba nani le tanina beto mutindu mama ya bandeke ketaninaka bana na yo?— Biblia

 kefwanisaka Yehowa na ndeke mosi ya bo kebingaka ngo ya zulu, yina kesadisaka bana na yo.—Kulonga 32:11, 12.

Mwana ya Yehowa ya kuluta mfunu kele Yezu, Mwana na yandi ya yandi kezolaka mingi. Ntangu Yezu kuvandaka na zulu, yandi vandaka mpeve ya ngolo bonso Tata na yandi. Yandi vandaka kudikeba. Kansi ntangu yandi butukaka bonso bebe na ntoto, yandi vandaka dyaka na ngolo ve. Yandi vandaka na mfunu ya lutaninu.

Sambu na kulungisa luzolo ya Nzambi na ntoto, yo lombaka nde Yezu kuyela mpi yandi kukuma muntu ya kukuka, mpi mbuta. Kansi, Satana kusosaka na kufwa yandi na ntwala nde yandi kuyela. Mambu ya kusalamaka sambu na kusosa kufwa Yezu ntangu yandi vandaka mwana ya fyoti mpi mutindu Yehowa kutaninaka yandi ke disolo mosi ya kitoko mpenza. Keti nge kezola kuwa yo?—

Ntangu fyoti na nima ya kubutuka ya Yezu, Satana kubasisaka kima mosi ya kuvandaka bonso mbwetete yina vandaka kupela na zulu na ndambu ya Esti. Bantu ya kelongukaka bambwetete, yina bo kebingaka nde bandwenga, kulandaka mbwetete yina katuka na kitamina mosi ya nda

 kibeni tii na Yeruzalemi. Ntangu bo kumaka na Yeruzalemi, bo yulaka kisika muntu yina takuma ntotila ya Bayuda fwete butuka. Ntangu bo yulaka bayina vandaka kuzaba mambu ya Biblia ketubaka sambu na dyambu yango, bo vutulaka nde: “Na Betelemi.”—Matayo 2:1-6.

Na nima ntangu Erode, ntotila ya mbi ya Yeruzalemi, kuwaka nde ntotila ya mpa mekatuka kubutuka penepene na Betelemi, yandi tubilaka bandwenga nde: ‘Beno sosa mwana yina tii kuna beno tamona yandi, na nima beno vutuka sambu na kuzabisa mono.’ Keti nge mezaba sambu na nki Erode zolaka kuzaba kisika Yezu kuvandaka?— Sambu Erode kuvandaka na kimpala mpi yandi zolaka kufwa Yezu!

Inki mutindu Nzambi kutaninaka Mwana na yandi?— Ntangu bandwenga kumonaka Yezu, bo pesaka yandi makabu. Na nima, Nzambi kukebisaka bandwenga na ndosi nde bo vutuka ve na Erode. Yo yina bo vutukaka na bwala na bo na nzila yankaka, na kisika ya kuvutukila na nzila ya Yeruzalemi. Ntangu Erode kubakisaka nde bandwenga kutinaka, yandi waka makasi mpenza. Sambu na kufwa Yezu, Erode kutubaka nde bo fwete fwa bana-babakala yonso ya Betelemi yina kuvandaka na bamvula banda na zole kita! Kansi, na ntangu yina, Yezu kuvandaka dyaka ve na Betelemi.

Keti nge mezaba nki mutindu Yezu kugulukaka?— Ntangu bandwenga kuvutukaka na bwala na bo imene, Yehowa kukebisaka Yozefi, bakala ya Maria, na kutelama mpi na kutina ntama na Ezipte. Ntangu bo kumaka kuna, Yezu kuvandaka na lutaninu. Erode, muntu yina ya mbi, lendaka ve kufwa yandi. Na nima ya bamvula, ntangu Maria ti Yozefi kukatukaka ti Yezu na Ezipte, Nzambi kukebisaka dyaka Yozefi. Yandi tubilaka yandi na ndosi nde yandi kwenda na Nazareti, kisika Yezu tavanda na lutaninu.—Matayo 2:7-23.

 Keti nge kebakisa mutindu Yehowa kutaninaka Mwana na yandi?— Tuba ntete, nge kemona nde banani kele bonso bana ya bandeke yina mama na bo kubumbaka na matiti, to bonso Yezu ntangu yandi vandaka mwana ya fyoti? Keti nge kele ve bonso bo?— Kele ti bantu yankaka mpi kesosaka kusala nge mbi. Keti nge mezaba bo?—

Biblia ketuba nde Satana kele bonso ntambu yina kedila, yandi kesosa kudya beto. Nkutu, kaka mutindu bantambu keponaka mingi kusimba bambisi ya fyoti, Satana ti bademo na yandi mpi keponaka mingi bana ya fyoti. (1 Piere 5:8) Kansi Yehowa meluta Satana na ngolo. Yehowa le tanina bana na yandi ya fyoti to kukatula bo na kigonsa yina Satana kesosa kutula bo.

Keti nge keyibuka mambu ya beto longukaka na Kapu 10 ya mukanda yai, yina kumonisaka mambu ya dyabulu ti bademo na yandi kesosaka kupusa beto na kusala?— Bo kesosaka nde beto vukisaka nitu na mutindu yina Nzambi ketuba nde yo kele mbi. Kansi banani kaka fwete vukisaka nitu?— Kaka bantu zole ya kuyela, nkento ti bakala, yina mekwelanaka.

Kansi, yo kele mawa mingi na kumona nde bambuta mingi kezolaka kuvukisa nitu ti bana ya fyoti. Ntangu bo kesalaka mpidina, bana ya babakala ti ya bankento le yantika na kusala mambu ya mbi ya mutindu yina ya bo melongukaka na bambuta yina. Bo keyantikaka mpi kusadila binama na bo ya nitu na mutindu mosi ya mbi. Mambu ya mutindu yai kusalamaka bamvula mingi meluta na Sodomi. Biblia ketuba nde bantu ya bwala yina, ‘banda na bana-babakala tii na bambuta,’ sosaka kuvukisa nitu ti babakala yina kwisaka kutala Loti.—Kuyantika 19:4, 5.

Yo yina, kaka mutindu Yezu kuvandaka na mfunu ya lutaninu, nge mpi nge ke na mfunu ya lutaninu na ntwala ya bambuta to nkutu na ntwala ya bana yankaka yina le sosa kuvukisa nitu ti nge. Mbala mingi, bantu ya mutindu yina tasosa kumonisa nde bo kele banduku na nge. Nkutu bo le songa nge nde bo tapesa nge kado kana nge sila bo nde nge tasonga ve bantu yankaka mambu ya bo kezola kusala ti nge. Kansi bantu yina kele bantu ya ntima ya mbi bonso Satana ti bademo na yandi, mpi bo kezolaka kubaka kyese na bo mosi. Ebuna bo kezolaka kubaka kyese yango na ntangu ya bo kevukisaka nitu ti bana ya fyoti. Yo kele kima mosi ya mbi mpenza!

 Keti nge kezaba nki bo le sala sambu na kubaka kyese na bo yina?— Bo le sosa kusimba-simba kinama na nge ya kusubila. To nkutu bo takotisa binama na bo ya kusubila na kati ya kinama na nge ya kusubila. Kansi nge fwe pesa ve ata muntu mosi nzila nde yandi sakana ti mbia to mbunda na nge. Ata yandi kele nani, ata yandi ke mpangi na nge ya bakala to ya nkento to nkutu mama na nge to tata na nge. Kinama na nge yina ya kusubila kele kaka ya nge mosi.

Inki mutindu nge le tanina nitu na nge na bantu yina kesalaka mambu ya mbi ya mutindu yai?— Ntetentete, kupesa ve ata muntu mosi nzila nde yandi sakana ti kinama na nge ya kusubila. Kana muntu kesosa kusala yo, boka na ndinga ya ngolo ti kikesa nde: “Bikisa munu! Mu tafunda nge!” Ebuna kana muntu yango kusonga nge nde yo kele foti na nge yo yina yandi mesala mpidina, kundima yandi ve. Yandi mekusa. Kwenda kufunda yandi, ata yandi ke nani! Nge fwe funda yandi ata yandi kusonga nge nde mambu ya beno mesala ti yandi kele kinsweki na nge ti yandi. Ata muntu yango kusila nde yandi tapesa nge bakado ya kitoko to yandi bangisa nge nde yandi tasala nge mbi kana nge buya, nge fwe tina yandi ntinu sambu nge kwenda kufunda yandi.

Nge fwe wa ve boma, kansi nge fwe keba mpenza. Kana bibuti na nge mekebisa nge sambu na bantu to bisika yina le vanda kigonsa sambu na nge, nge fwe wila bo. Kana nge wila bo, nge tapesa ve muntu ya mbi okazio ya kusala nge mbi.

Tanga mambu ya metala mutindu ya kuditanina na bisalu ya mbi ya kuvukisa nitu, na Kuyantika 39:7-12; Bingana 4:14-16; 14:15, 16; 1 Korinto 6:18; mpi 2 Piere 2:14.

[Kifwanisu ya kele na lutiti 167]

Inki mutindu mama ya ndeke yai ke na kutanina bana na yo?

[Kifwanisu ya kele na lutiti 168]

Ntangu bandwenga metala Yezu imene, Nzambi mepesa bo nki lukebisu ya metanina Yezu?

[Kifwanisu ya kele na lutiti 169]

Inki mutindu Nzambi kugulusaka dyaka Yezu na ntangu yandi vandaka leke?

[Kifwanisu ya kele na lutiti 171]

Inki nge fwe tuba mpi kusala kana muntu kesosa kusimba nge na mutindu mosi ya mbi?