KAPU 1

Sambu na Nki Yezu Kuvandaka Longi Mosi ya Nene

BAMVULA kuluta mafunda zole meluta, mwana mosi ya kuswaswana mpenza kubutukaka. Yandi yelaka mpi yandi kumaka muntu ya kuluta nene yina mezingaka na ntoto. Na ntangu yina, ata muntu mosi ve kuvandaka ti avio to kaminyo. Bima bonso batelevizio, baordinatere, mpi Internet kuvandaka ve.

Bo pesaka mwana yango zina Yezu. Yandi kumaka muntu ya kulutaka bantu yonso ya ntoto na mayele. Yezu kukumaka mpi longi ya kuluta mbote. Yandi vandaka kutendula mambu ya mpasi na mitindu mosi yina vandaka kusala nde yo kuma pete na kubakisa.

Yezu kulongaka bantu na bisika yonso ya yandi vandaka kukuta bo. Yandi longaka bo na lweka ya nzadi mpi na bamaswa. Yandi longaka bo na banzo mpi ntangu yandi vandaka kusala banzyetolo. Yezu kuvandaka ve ti kaminyo, yandi salaka mpi ve nzyetelo na bisi to na tre. Yezu kutambulaka na makulu na bisika mingi sambu na kulonga bantu.

Beto kelongukaka mambu mingi na bantu yankaka. Kansi, beto le longuka mambu ya kuluta mfunu na Longi ya Nene, Yezu. Mambu yina Yezu kutubaka kele na Biblia. Kana beto kewa mambu yango yina ke na Biblia, yo kele bonso nde Yezu muntu ke na kutubila beto.

Sambu na nki Yezu kuvandaka Longi ya Nene ya mutindu yina? Kikuma ya ntete kele nde Yezu yandi mosi mpi bo longaka yandi. Mpi yandi zabaka nde kuwa ke mfunu mingi. Kansi, Yezu vandaka kuwila nani? Nani kulongaka yandi?— Tata na yandi muntu kulongaka yandi. Tata ya Yezu kele Nzambi.

Na ntwala ya kukwisa awa na ntoto bonso muntu, Yezu vandaka kuzinga na zulu ti Nzambi. Yo yina Yezu kuvandaka ya kuswaswana ti bantu  yankaka, sambu kele ve ti muntu yankaka mezingaka na zulu na ntwala ya kubutuka na ntoto. Na zulu, Yezu kuvandaka Mwana ya mbote, Mwana yina vandaka kuwila Tata na yandi. Yo yina kusalaka nde Yezu kukuka na kulonga bantu mambu ya yandi longukaka na Nzambi. Nge takuka kulanda mbandu ya Yezu kana nge kewila tata ti mama na nge.

Kikuma yankaka yina kusalaka nde Yezu kuvanda Longi ya Nene kele nde yandi vandaka kuzola bantu. Yandi vandaka na luzolo ya kusadisa bantu na kulonguka mambu ya Nzambi. Yezu vandaka kuzola bambuta, kansi yandi vandaka kuzola mpi bana. Bana mpi vandaka kuzola kuvanda ti Yezu sambu yandi vandaka kusolula ti bo mpi kuwa mambu na bo.

Kilumbu mosi, bibuti mingi kunataka bana na bo ya fyoti na Yezu. Kansi, banduku na yandi kuyindulaka nde Longi ya Nene kuvandaka ve ti ntangu ya kusolula ti bana ya fyoti. Yo yina bo kulaka bibuti yina ti bana na bo. Kansi Yezu kutubaka inki?— Yezu kutubaka nde: “Beno bikisa bana bo kwisa awa na mono. Beno kanga bo nzila ve.” Ya kyeleka, Yezu kuzolaka nde bana ya fyoti kukwenda na yandi. Ata yandi vandaka muntu ya  mayele mpi ya mfunu mpenza,  Yezu kuzwaka ntangu ya kulonga bana ya fyoti.—Marko 10:13, 14.

Keti nge mezaba sambu na nki Yezu kulongaka bana mpi kuwaka mambu na bo? Kikuma mosi kele nde yandi zolaka kupesa bo kyese, yo yina yandi vandaka kutubila bo mambu ya Nzambi yina kele Tata na yandi ya zulu. Inki mutindu nge le pesa bantu kyese?— Kana nge ketubila bo mambu ya Nzambi yina nge melongukaka.

Kilumbu mosi, Yezu kusadilaka mwana mosi ya fyoti sambu na kulonga banduku na Yandi dilongi mosi ya mfunu. Yandi bakaka mwana yango mpi Yandi tedimisaka yandi na kati ya balongoki na Yandi. Na nima, Yezu kutubaka nde bambuta yina fwe soba mabanza na bo mpi bo kuma bonso mwana yina ya fyoti.

Inki Yezu zolaka kutuba ntangu yandi tubaka mambu yina? Keti nge mezaba nki mutindu mbuta, to nkutu leke mosi ya kuyela, fwe kuma bonso mwana ya fyoti?— Mwana ya fyoti kezabaka ve mambu mingi bonso mbuta mpi yandi kezolaka kulonguka. Pana, Yezu vandaka kutuba nde balongoki na yandi fwe kudikulumusaka, bonso bana ya fyoti. Ee, beto yonso le longuka mambu mingi na bantu yankaka. Mpi beto yonso fwe zaba nde malongi ya Yezu kele mfunu mingi kuluta bangindu na beto mosi.—Matayo 18:1-5.

Kikuma yankaka ya kusalaka nde Yezu kuvanda Longi ya Nene ya mutindu yina kele nde yandi zabaka mutindu ya kusala na mpila nde bantu kusepila na mambu ya yandi vandaka kutuba. Yandi vandaka kutendula mambu na mutindu mosi ya kukonda mpasi mpi ya pwelele. Yandi tubilaka bandeke, bintuntu, mpi bima yankaka yina bantu kuzabaka mbote sambu na kusadisa bo na kubakisa mambu ya Nzambi.

 Kilumbu mosi, ntangu Yezu kuvandaka na lweka ya ngumba mosi, bantu mingi kwisaka na yandi. Yezu kuvandaka na ntoto mpi yandi sadilaka bo diskure, to disolo mosi, mpila nge kemona yo awa na kifwanisu. Diskure yai, bo kebingaka yo Disolo ya Zulu ya Ngumba. Yandi tubaka nde: ‘Beno tala bandeke. Bo kekunaka ve. Bo kebumbaka ve madya na banzo. Kansi Nzambi yina kele na zulu kepesaka bo madya. Keti beno meluta ve bandeke na mfunu?’

Yezu kutubaka dyaka nde: ‘Beno baka dilongi na bintuntu ya nseke. Yo keyelaka kansi yo kesalaka ve. Ebuna tala mutindu yo kele kitoko! Ata Salomo, Ntotila ya mvwama, kulwataka ve bilele ya kitoko bonso bintuntu ya nseke. Ebuna, kana Nzambi ketaninaka bintuntu yina keyela, keti yandi tatanina beno ve?’—Matayo 6:25-33.

Keti nge kebakisa dilongi ya Yezu vandaka kulonga?— Yandi zolaka ve nde beto vanda na susi nde na wapi beto tazwa bima ya kudya to bilele ya kulwata. Nzambi mezaba nde beto ke na mfunu ya bima yina yonso. Yezu kutubaka ve nde beto fwe sala ve kisalu sambu na kuzwa madya  mpi bilele. Kansi, yandi tubaka nde beto fwe tula Nzambi na kisika ya ntete. Kana beto sala mpidina, Nzambi tasala yonso sambu na kupesa beto bima ya kudya ti bilele ya kulwata. Keti nge kekwikila dikambu yai?—

Ntangu Yezu kumanisaka disolo na yandi, bantu kumonaka yo nki mutindu?— Biblia ketuba nde bo yitukaka na kumona mutindu na yandi ya kulonga. Yo vandaka kyese mpenza na kuwidikila yandi. Mambu ya yandi tubaka kusadisaka bantu na kusala mambu ya mbote.—Matayo 7: 28.

 Yo yina yo ke mfunu mpenza nde Yezu kulonga beto. Keti nge mezaba nki mutindu beto le sala yo?— Mambu ya yandi tubaka ke ya kusonika na mukanda mosi. Keti nge le songa munu zina ya mukanda yango?— Zina na yo Biblia ya Santu. Yo kezola kutuba nde sambu na kuwila Yezu beto fwe tulaka dikebi na mambu yina beto ketangaka na Biblia. Nkutu, Biblia ke ti disolo mosi ya kitoko yina kemonisa mutindu Nzambi yandi mosi kutubilaka beto nde beto fwe wila Yezu. Beto tala dyambu yina kusalamaka.

Kilumbu mosi Yezu kunataka banduku na yandi tatu na zulu ya ngumba mosi. Bazina na bo kuvandaka Yakobo, Yoane, mpi Piere. Beto talonguka mambu mingi ya bantu yai na nima, sambu bantu yai yonso tatu kuvandaka banduku ya ngolo ya Yezu. Kansi na okazio yai ya nene, luse ya Yezu yantikaka na kungenga mingi kibeni. Mpi bilele na yandi kumaka kungenga bonso nsemo, mpila nge kemona yo na kifwanisu yai.

Na nima, Yezu ti banduku na yandi kuwaka ndinga mosi kukatukaka na zulu. Yo tubaka nde: “Yai kele Mwana na mono ya mono ke zolaka mingi; mono ke na kiese mingi sambu na yandi. Beno wila yandi!” (Matayo 17:1-5) Ndinga yina kuvandaka ya nani?— Yo vandaka ndinga ya Nzambi! Ee, Nzambi muntu kutubaka nde bo fwe wila Mwana na yandi.

Ebuna beto bubu yai? Keti beto fwe lemfukila Nzambi mpi kuwila Mwana na yandi yina ke Longi ya Nene?— Beto yonso fwe sala mpidina. Keti nge keyibuka nki mutindu beto le sala yo?

Sambu na kuwila Mwana ya Nzambi, beto fwe tangaka masolo ya luzingu na yandi yina ke na Biblia. Longi ya Nene ke ti mambu ya kitoko mingi ya kusonga beto. Nge tasepela na kulonguka mambu yango yina bo mesonikaka na Biblia. Yo tanatila nge dyaka mambote kana nge kesonga banduku na nge mambu ya kitoko yina nge kelonguka.

Kana nge kezola kuzaba mambu mingi yankaka ya mbote ya metala mambu ya kitoko yina muntu le baka kana yandi kewila Yezu, kangula Biblia na nge mpi tanga Yoane 3:16; 8:28-30; mpi Bisalu 4:12.

[Kifwanisu ya kele na lutiti 11]

Sambu na nki bana ya fyoti vandaka kusepela na kuvanda ti Yezu?

[Kifwanisu ya kele na lutiti 12]

Inki dilongi baleke mpi bambuta le baka na mwana ya fyoti?

[Kifwanisu ya kele na lutiti 13]

Inki dilongi Yezu vandaka kulonga ntangu yandi tubilaka bandeke ti bintuntu?

[Kifwanisu ya kele na lutiti 14]

“Yai kele Mwana na mono . . . Beno wila yandi”