KAPU 26

Sambu na Nki Yo Kevandaka Mpasi na Kusala Mambu ya mbote

NTANGU Saule vandaka kusala mambu ya mbi, nani vandaka kusepela?— Satana Dyabulu muntu vandaka kusepela. Kansi bamfumu ya dibundu ya Bayuda mpi vandaka kusepela. Na nima, ntangu Saule kukumaka longoki ya Longi ya Nene mpi kuzabanaka na zina ya Polo, bamfumu ya dibundu yina yantikaka na kumenga yandi. Yo yina, keti nge kebakisa sambu na nki kusala mambu ya mbote kevandaka mpasi sambu na balongoki ya Yezu?—

Kilumbu mosi Ananiasi, mfumu ya banganga-Nzambi, kusongaka bantu nde bo bula Polo na ilungi. Ananiasi sosaka nkutu kutula Polo na boloko. Polo kumonaka mpasi mingi ntangu yandi kumaka longoki ya Yezu. Mu mbandu, bantu ya mbi kubulaka Polo mpi bo sosaka kufwa yandi na matadi ya nene.—Bisalu 23:1, 2; 2 Korinto 11:24, 25.

Bantu mingi tapusa beto na kusala mambu yina kesepedisaka ve Nzambi. Yo yina yindula fyoti mambu  yai: Keti nge kezolaka mpenza mambu yina kele ya mbote? Keti nge kezolaka yo mingi mpenza na mpila nde nge tasala mambu yina kele ya mbote ata na ntangu yina bantu yankaka kemenga nge sambu na yo? Yo kelombaka kikesa mingi sambu na kusala mutindu yina, mpidina ve?—

Nge le kudiyula nde: ‘Sambu na nki bantu kemengaka beto sambu na mambu ya mbote ya beto kesalaka? Keti mambu ya mutindu yina fwete sepedisa bo ve?’ Nge le yindula mutindu yina. Mbala mingi, bantu vandaka kuzola Yezu sambu na mambu ya mbote ya yandi vandaka kusala. Kilumbu mosi, bantu yonso ya bwala mosi kuvukanaka na kyelo ya nzo kisika Yezu kuvandaka. Bo kwisaka sambu Yezu vandaka kubelula bantu ya maladi.—Marko 1:33.

 Kansi, bantangu yankaka, bantu vandaka kusepela ve na mambu yina Yezu vandaka kulonga. Ata yandi vandaka kulonga kaka mambu ya mbote, bantu mingi kumengaka yandi mpenza sambu yandi vandaka kutuba kyeleka. Mambu yai kusalamaka kilumbu mosi na Nazareti, bwala yina Yezu kuyelaka. Yandi kwendaka na nzo ya bisambu, kisika Bayuda vandaka kukutana sambu na kusamba Nzambi.

Ntangu yandi kumaka kuna, Yezu kusalaka diskure mosi ya kitoko na nsadisa ya Masonuku. Na luyantiku, bantu kusepelaka na yo. Bo yitukaka na kuwa mambu ya kitoko yina vandaka kubasika na munoko na yandi. Bo vandaka kundima ve nde yandi vandaka mpenza toko yina ya kuyelaka na bwala na bo mosi.

Kansi, na nima, Yezu kutubaka kima yankaka. Yandi tubilaka bantangu yina Nzambi kusongaka nde yandi ndimaka bantu yina kuvandaka ve Bayuda. Ntangu Yezu kutubaka mutindu yina, bayina kuvandaka na nzo ya bisambu kuwaka makasi. Keti nge kezaba sambu na inki?— Bo vandaka kuyindula nde Nzambi vandaka kundima kaka bo mpamba. Bo vandaka kuyindula nde bo vandaka mbote kuluta bantu yankaka. Yo yina, bo mengaka Yezu sambu na mambu ya yandi tubaka. Keti nge mezaba nki bo sosaka kusala yandi?—

Biblia ketuba nde: ‘Bo simbaka Yezu mpi bo basisaka yandi na bwala. Bo nataka yandi na nsongi ya ngumba mosi mpi bo zolaka kulosa yandi na dibengi sambu na kufwa yandi! Kansi Yezu tinaka bo.’—Luka 4:16-30.

Kana yo vandaka nge, keti nge zolaka kuvutuka dyaka sambu na kutubila bantu yina mambu ya Nzambi?— Yo zolaka kulomba nde nge vanda na kikesa kibeni, mpidina ve?— Kansi, na nima ya kiteso ya mvula mosi, Yezu kuvutukaka na Nazareti. Biblia ketuba nde: “Yandi yantikaka kulonga bantu na nzo na bo ya bisambu.” Yezu kuyambulaka ve na kutuba kyeleka sambu na boma ya bantu yina vandaka kuzola ve Nzambi.—Matayo 13:54.

Kilumbu yankaka, na Kilumbu ya Kupema, Yezu kuvandaka na kisika mosi yina kuvandaka ti muntu mosi ya kuvandaka ti diboko ya kukauka. Nzambi muntu kupesaka Yezu ngolo ya kubelula muntu yina. Kansi, bantu mingi yina kuvandaka pana vandaka kusosila Yezu makambu. Inki  Longi ya Nene kusalaka?— Ntete, yandi yulaka nde: ‘Kana nge kele na dimeme, ebuna yo mebwa na dibulu mosi ya nene na Kilumbu ya Kupema, keti nge tabasisa yo?’

Ee, bo zolaka kusala yo sambu na dimeme, ata na Kilumbu ya Kupema, kilumbu yina ya bo vandaka kusala ve ata kisalu mosi. Yo yina Yezu kutubaka nde: ‘Yo meluta nkutu mbote na kusadisa muntu na Kilumbu ya Kupema, sambu muntu kele mfunu mingi kuluta dimeme!’ Yo vandaka pwelele mpenza nde Yezu fwe sadisa muntu yina mpi kubelula yandi!

Yezu kutubilaka muntu yina na kutandula diboko na yandi. Na mbala mosi, diboko yango kubelukaka. Muntu yina kuvandaka na kyese mpenza! Kansi nki beto tatuba sambu na bantu yina yankaka? Keti bo vandaka na kyese?— Ve. Bo mengaka Yezu mingi kibeni. Bo kwendaka na nganda sambu na kuyidika mutindu ya bo tafwa yandi!—Matayo 12:9-14.

Yo kele mpi mutindu yina bubu yai. Ata beto kesala konso nki kima yina, beto takuka ve kusepedisa bantu yonso. Yo yina, beto fwete pona muntu yina ya beto kezola mpenza kusepedisa. Kana beto kezola kusepedisa Yehowa Nzambi ti Mwana na yandi Yezu Kristu, beto fwe salaka ntangu yonso mambu yina ya bo kelongaka. Kansi kana beto kesala mutindu yina, nani tamenga beto? Nani tasala nde beto mona mpasi na kusala mambu ya mbote?—

Satana Dyabulu muntu tasala mpidina. Kansi nani dyaka tasala buna?— Bantu yina Dyabulu mekusaka na kundima mambu ya mbi. Yezu kutubilaka bamfumu ya mabundu ya ntangu na yandi nde: “Tata na beno kele Satana, beno ke zolaka kusala mambu yina ya tata na beno ke zolaka.”—Yoane 8:44.

Dyabulu kele ti bantu mingi ya yandi kesepelaka na bo. Yezu kubingaka bo “nsi-ntoto.” Nge keyindula nde “nsi-ntoto” yina Yezu kutubilaka kele inki?— Sambu na kubakisa yo, beto baka Yoane kapu 15, verse 19. Kuna beto ketanga bangogo yai ya Yezu: “Kana beno vandaka bantu ya nsi-ntoto, bantu zolaka kuzola beno, sambu beno zolaka kuvanda bantu na bo. Kansi mono me solaka beno, mono me katulaka beno na nsi-ntoto, beno mpi kele bantu ya nsi-ntoto ve; yo yina bantu ke mengaka beno.”

 Nsi-ntoto yina kemengaka balongoki ya Yezu kele kimvuka ya bantu yonso yina kele ve balongoki na yandi. Sambu na nki nsi-ntoto kemengaka balongoki ya Yezu?— Yindula fyoti. Nani ke mfumu ya nsi-ntoto?— Biblia ketuba nde: “Nsi-ntoto kele na maboko ya Muntu ya Mbi.” Muntu ya mbi yango kele Satana Dyabulu.—1 Yoane 5:19.

Ntangu yai, keti nge mebakisa sambu na nki yo kevandaka mpasi mpenza na kusala mambu ya mbote?— Satana ti nsi-ntoto na yandi kesalaka nde yo vanda mpasi. Kansi, ke ti kikuma yankaka. Keti nge keyibuka yo?— Na Kapu 23 ya mukanda yai, beto longukaka nde beto yonso kebutukaka ti masumu. Keti yo tavanda ve kyese ntangu masumu, Dyabulu, mpi nsi-ntoto na yandi tavanda dyaka ve?—

Biblia kesila beto nde: ‘Nsi-ntoto ke mana.’ Yo kezola kutuba nde bayina yonso kele ve balongoki ya Longi ya Nene tavanda dyaka ve. Nzambi tapesa bo ve nzila ya kuzinga mvula na mvula. Keti nge mezaba kana nani tazinga mvula na mvula?— Biblia kelanda na kutuba nde: ‘Muntu yina ke salaka mambu yina ya Nzambi ke zolaka, yandi tazingaka mvula na mvula.’ (1 Yoane 2:17) Ee, kaka bayina kesalaka mambu ya mbote, bayina kesalaka “mambu yina Nzambi kezolaka,” tazinga mvula na mvula na ntoto ya mpa ya Nzambi. Yo yina ata yo kevandaka mpasi, beto kezola kaka kusala mambu ya mbote, mpidina ve?—

Beto tanga kumosi baverse yai ya kesonga sambu na nki kusala mambu ya mbote kevandaka pete ve: Matayo 7:13, 14; Luka 13:23, 24; mpi Bisalu 14:21, 22.

[Kifwanisu ya kele na lutiti 137]

Inki mpasi Polo kumonaka ntangu yandi salaka mambu yina kuvandaka ya mbote?

[Kifwanisu ya kele na lutiti 138]

Sambu na nki bantu yai kesosa kufwa Yezu?

[Kifwanisu ya kele na lutiti 141]

Ntangu nsi-ntoto yai tafwa, inki takumina bayina kesalaka mambu ya mbote?