Kitini ya 13

Lukwikilu ya Kyeleka Kenataka na Kyese ya Kimakulu

MASONUKU ya Santu ketuba nde: “Muntu yina ya Nzambi ke ndimaka sambu na lukwikilu na yandi, yandi ta vanda na moyo ya kieleka.” (Roma 1:17) Verse yai kele ti lusilu mosi ya kitoko yina ketadila nge. Na nki mitindu?

Na nima ya kumanisa kisalu na yandi na ntoto, Yezu Mesia mataka na zulu sambu na kuvanda ti Nzambi. Ntangu balongoki na yandi vandaka kutala yandi, “Nzambi tombulaka yandi na zulu, ebuna dituti mosi kwisa kubumba yandi sambu bo kumona yandi ve.” (Bisalu 1:9) Na zulu, Nzambi tulaka yandi Ntotila mosi ya ngolo. Kubika fyoti, Yezu “Mwana-muntu ta kwisa bonso Mfumu ya nene ti bawanzio yonso, yandi ta vanda na zulu ya kiti na yandi ya kimfumu, ebuna bawanzio ta tula bantu yonso ya nsi-ntoto kisika mosi na meso na yandi. Yandi ta kabula bo na makabu zole, mutindu ke salaka muntu yina ke talaka mameme ntangu yandi ke kabulaka mameme na bankombo.” (Matayo 25:31, 32) Inki ntangu mambu yai tasalama?

Masonuku ya Santu kutubilaka na ntwala nsungi mosi ya mavwanga yina tasalama na nsi-ntoto ya mvimba mpi yo tavanda kidimbu yina tamonisa nde kubika fyoti Mesia tasambisa bantu. Yezu tendulaka mambu yina tavanda na kati ya kidimbu yango: “Bantu ya nsi ya nkaka ta kwisa kunwanisa bantu ya nsi ya nkaka, bantu ya kimfumu ya nkaka ta kwisa kunwanisa bantu ya kimfumu ya nkaka. Ntoto ta nikana ngolo; nzala mingi mpenza ti maladi ya mbi ta vanda na bisika ya mutindu na mutindu; mambu yina ke pesaka bantu boma ti bidimbu ya nene, yo mpi ta monika na zulu.”​—Luka 21:7, 10, 11.

Bubu yai, beto lenda mona pwelele kulungana ya bangogo ya Yezu. Kubika fyoti, Yezu tafwa bantu ya mbi. Nsukansuka, yandi tafwa mpi Satana! Ntoto ya mvimba takituka Paladisu. Bantu yonso tazinga na ngemba bo na bo mpi ata ti bambisi. “Bantambu ta vandaka na ngemba ti bana-mameme, bankoi ta pemaka kisika mosi ti bana-bankombo; bana-bangombe ti bana-bantambu ta zingaka kisika mosi, mwana ya fioti ta nataka bo. . . . Ata kima ya mpasi to ya mbi ta vandaka ve.” (Yezaya 11:6, 9) “Ata muntu mosi ve . . . ta tuba diaka nde: ‘Mono ke bela.’ . . . Meso ya bantu ya kufwa-meso ta mona, makutu ya bantu ya kufwa-makutu ta kanguka.” (Yezaya 33:24; 35:5) Ata bafwa, tafutumuka. Yehowa “ta katula mansanga na meso ya bantu yonso,” mpi “lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve.” (Yezaya 25:8; Kusonga 21:4) Na ntangu yina, lukanu ya Nzambi ya luyantiku sambu na ntoto talungana. Yai kivuvu mosi ya kitoko mpenza!

Landa Kuyedisa Lukwikilu na Nge

Banani Nzambi tapesa luzingu ya mvula na mvula na Paladisu? Bantu yina kele ti lukwikilu ya kyeleka!

Kuvila nde lukwikilu ya kyeleka kekatukaka na nzayilu ya sikisiki ya Ndinga ya Nzambi. Yo yina, landa kulonguka sambu na kuzaba Nzambi mpi Yezu mbote-mbote!

Lukwikilu ya kyeleka ketambulaka nzila mosi ti bisalu ya lunungu. Ndinga ya Nzambi ketuba nde: “Kana muntu ke kaka na lukwikilu kansi yandi ke sala mambu ya mbote ve, lukwikilu na yandi kele ya  kufwa.” (Yakobo 2:26) Kana nge kesala bisalu ya mbote, nge tamonisa bikalulu ya kitoko ya Nzambi​—ngolo, lunungu, mayele, mpi zola. Landa kusala bikesa sambu na kuyedisa bikalulu yai ya kitoko!

Kuvanda ti lukwikilu ya kyeleka tanatila nge balusakumunu mingi. Ya kyeleka, yo kele mpenza kinsweki sambu na luzingu ya kyese​—bubu yai mpi mvula na mvula!

Inki Mvutu Nge Tapesa?

• Yezu kele na wapi bubu yai?

• Inki mutindu beto mezaba nde, kubika fyoti Yezu takwisa kusambisa bantu?

• Ntangu Yezu takwisa, yandi tasala inki?

• Inki mutindu nge lenda landa kuyedisa lukwikilu na nge?

[Kifwanisu ya kele na lutiti 31]

Bampasi ya bubu yai kemonisa nde kubika fyoti Mesia tasambisa bantu

[Kifwanisu ya kele na lutiti 30, 31]

Bantu yina kele ti lukwikilu ya kyeleka tazinga na Paladisu kimakulu!