Mukanda Malongi ya Biblia Sambu na Bansadi ya Nzambi ta sadisa nge na kuzwa baverse mpi masolo ya Biblia yina lenda sadisa nge na mambu yina nge ke kutana ti yo. Yo ta sadisa nge mpi na kuzwa baverse ya Biblia yina nge lenda sadila sambu na kupesa bantu ya nkaka kikesa to sambu na kusadisa bo na kubaka balukanu ya mbote yina ta sepedisa Yehowa. Sosa kisika ntu-diambu yina nge kele na yo mfunu kele, konso ntu-diambu kele ti bangiufula ya mfunu mpi bantendula ya nkufi ya masolo ya Biblia ya ke pesa mvutu na bangiufula yina. (Tala lupangu “ Mutindu ya Kusosa Bantu-Diambu na Mukanda Yai.”) Yo kele ti baverse yina ta pesa nge bandongisila ya kitoko mpi yina ta lembika nge. Yo kele mpi ti baverse yina ta tubila mambu ya mfunu yina nge ta sepela kuzabisa bantu ya nkaka. Baverse yango ta sadisa bo na mambu yina bo ke kutana ti yo, yo ta pesa bo bandongisila mpi kikesa.

Ntangu mukanda yai ke tubila ntu-diambu mosi, yo ke tubila ve baverse yonso ya me tadila ntu-diambu yango. Kansi yo ke tubila baverse ya mfunu mingi yina ta sadisa na kuyantika kusala bansosa na ntu-diambu yango. (Bin 2:1-6) Kana nge ke zola kusala diaka bansosa mingi, sadila bareferanse yina kele na kati-kati ya balutiti ya Biblia—Mbalula ya Nsi-Ntoto ya Mpa mpi na banoti ya kulongukila na Biblia ya Kifalansa. Sadila Mukanda ya Bansosa Sambu na Bambangi ya Yehowa to Index des publications des Témoins de Jéhovah sambu na kubakisa diaka mbote-mbote ntendula ya baverse to mutindu ya kusadila yo. Sadila mikanda ya me katuka kubasika sambu yo kele ti bantendula ya mpa.

Beto ke zola nde mukanda Malongi ya Biblia Sambu na Bansadi ya Nzambi kusadisa nge na kukuma ti mayele mpi makuki ya kubakisa mambu yina kele na Ndinga ya Nzambi. Ntangu nge ta sadila mukanda yai, nge ta kuma kundima diaka mingi nde “ndinga ya Nzambi kele ya moyo mpi ngolo.”—Ebr 4:12.