Yehowa tapesa ve bantu ya mbi nswa ya kubebisa Paladisu. Banduku na yandi mpamba bantu tazinga na kisika yai. Ebuna, inki mambu takumina bantu ya mbi? Sambu na kubaka mvutu, beto tadila disolo yai ya kyeleka ya ketubila makambu ya Noa. Bamvula mafunda mingi meluta banda Noa kuzingaka. Yandi vandaka muntu mosi ya mbote yina vandaka kusala yonso sambu na kusala luzolo ya Yehowa. Kansi, bantu yankaka yina vandaka na zulu ya ntoto vandaka kusala mambu ya mbi. Yo yina, Yehowa kusongaka Noa nde Yandi tanokisa mvula ya ngolo sambu na kufwa bantu yonso ya mbi. Yandi zabisaka Noa na kutunga maswa sambu yandi ti dibuta na yandi bo fwa ve na ntangu Mvula yina ya Ngolo tanoka.—Kuyantika 6:9-18.

Noa ti dibuta na yandi kutungaka maswa. Noa kebisaka bantu nde Mvula ya Ngolo tanoka, kansi, bo wilaka yandi ve. Bo landaka na kusala mambu ya mbi. Ntangu Noa kumanisaka na kutunga maswa, yandi kotisaka bambisi na kati ya maswa, ebuna yandi kotaka mpi na maswa kumosi ti dibuta na yandi. Na nima, Yehowa tindaka mvula mosi ya ngolo mpi ya matadi. Mvula kunokaka bilumbu 40 mpi bampimpa 40. Masa kufulukaka na ntoto ya mvimba.—Kuyantika 7:7-12.

 Bantu ya mbi kufwaka, kansi Noa ti dibuta na yandi kugulukaka. Yehowa kutaninaka bo na Mvula yina ya Ngolo tii kuna yandi vutulaka bo na ntoto mosi ya kukonda bantu ya mbi. (Kuyantika 7:22, 23) Biblia ketuba nde kele ti ntangu Yehowa tafwa dyaka bantu yina kebuya kusala mambu ya mbote. Nzambi tafwa ve bantu ya mbote. Bo tazinga mvula na mvula na Paladisu ya ntoto.—2 Piere 2:5, 6, 9.

Bantu mingi kesala mambu ya mbi bubu. Ntoto ke ya kufuluka ti mavanga. Yehowa ketinda Bambangi na yandi mbala na mbala sambu na kukebisa bantu, kansi bamingi na kati na bo kezola ve kulemfuka na ndinga ya Yehowa. Bo kezola ve kusoba banzila na bo. Bo kezola ve kundima mambu ya Nzambi ketuba nde yo kele ya mbote to yo kele ya mbi. Inki mambu takumina bantu yai? Keti kilumbu kele bo tasoba? Kele ti bantu tasoba ve ata nki mutindu. Kubika fyoti ntangu yina bantu ya mbi tafwa kulunga, ebuna bo tazinga dyaka ve.—Nkunga 92:7.

Ntoto tafwa ve ata fyoti; yo takuma Paladisu. Bayina kekuma banduku ya Nzambi tazinga mvula na mvula na Paladisu na ntoto.—Nkunga 37:29.