Kana nge kezola kuvanda nduku ya Nzambi, nge fwete vanda na dibundu yina Nzambi kendimaka. Yezu kutubaka nde ‘bantu yina kesambaka Nzambi na kieleka’ tasambilaka Nzambi na mutindu yina kewakana ti “kieleka.” (Yoane 4:23, 24) Mutindu ya mbote ya kusambila Nzambi kele kaka mosi. (Efezo 4:4-6) Dibundu ya kyeleka kenataka na luzingu ya mvula na mvula, kansi dibundu ya luvunu kenataka na lufwa.—Matayo 7:13, 14.

Nge lenda zaba dibundu ya kyeleka kana nge ketala bikalulu ya bantu yina ke na kati na yo. Sambu Yehowa kele muntu ya mbote, bantu yina kesambaka yandi na kyeleka fwete vanda mpi bantu ya mbote. Kaka mutindu nti ya mbote ya malala kebutaka malala ya mbote, dibundu ya mbote mpi kebutaka bantu ya mbote.—Matayo 7:15-20.

Banduku ya Yehowa kezitisaka mingi Biblia. Bo kezabaka nde Biblia mekatukaka na Nzambi. Bo kepesaka nzila na mambu yina yo ketubaka sambu yo twadisa luzingu na bo, yo sadisa bo na kuyidika makambu na bo mpi na kulonguka mambu yina metala Nzambi. (2 Timoteo 3:16) Bo kesalaka yonso sambu na kusadila mambu yina ya bo kelongaka.

 Banduku ya Yehowa Kezolanaka bo na bo. Yezu vandaka kuzola bantu. Yandi monisaka yo na mutindu yandi vandaka kulonga bo mambu yina metala Nzambi, mpi na mpila yandi vandaka kubelula bantu ya maladi. Bantu yina kele na dibundu ya kyeleka fwete monisa mpi zola na bantu yankaka. Bo fwete salaka bonso Yezu. Bo fwete vwezaka ve bansukami to bantu ya bikanda yankaka. Yezu kutubaka nde bantu tazaba nde beno kele balongoki na mono kana beno kezolana beno na beno.—Yoane 13:35.

Banduku ya Nzambi kepesaka lukumu na zina ya Nzambi, Yehowa. Kana muntu kebuya kusadila zina na nge, keti muntu ya mutindu yina kele nduku na nge ya ngolo? Ve! Kana beto kele ti nduku, beto kesadilaka zina na yandi mpi beto kezabisaka bantu yankaka mambu ya mbote yina metala nduku yango. Yo yina, bayina kezola kuvanda banduku ya Nzambi fwete sadila zina na yandi mpi kuzabisa bantu yankaka mambu yina metala yandi. Yehowa kezola nde beto sala mutindu yina.—Matayo 6:9; Roma 10:13, 14.

Banduku ya Nzambi fwete longaka bantu mambu yina metala Kimfumu ya Nzambi, mutindu Yezu salaka. Kimfumu ya Nzambi kele luyalu yina takumisa ntoto yai paladisu. Banduku ya Nzambi kezabisaka nsangu ya mbote yai ya metala Kimfumu ya Nzambi na bantu yankaka.—Matayo 24:14.

Bambangi ya Yehowa kesalaka ngolo sambu na kuvanda banduku ya Nzambi. Bo kezitisaka Biblia mpi bo kezolanaka bo na bo. Bo kesadilaka mpi kepesaka lukumu na zina ya Nzambi. Bo kelongaka mpi bantu yankaka mambu yina metala Kimfumu ya Nzambi. Bambangi ya Yehowa kele na dibundu ya kyeleka bubu yai na zulu ya ntoto.