Satana ti bademo na yandi kezolaka ve kusadila Nzambi. Bo kezolaka kubenda bantu yonso bo pesa Nzambi mukongo. Inki mutindu bo kesalaka sambu na kulungisa lukanu na bo yai? Nzila mosi ya bo kesadilaka kele lusambu ya luvunu. (2 Korinto 11:13-15) Kana dibundu kelongaka ve kyeleka yina kele na Biblia, yo kele ya luvunu. Dibundu ya luvunu kele bonso mbongo ya luvunu. Na meso yo lenda monana ya kyeleka, kansi yo kele na mfunu mosi ve. Yo lenda natila nge mpasi mingi.

Luvunu ya mabundu lenda yangidika ve Yehowa, Nzambi ya masonga. Ntangu Yezu vandaka na zulu ya ntoto, bantu ya kimvuka mosi ya lusambu zolaka kufwa yandi. Bo vandaka kuyindula nde mutindu na bo ya kusambila vandaka ya mbote. Bo tubaka nde: “Beto ke na Tata mosi, nde Nzambi.” Keti Yezu ndimaka? Ve! Yandi tubilaka bo nde: “Tata na beno kele Satana.” (Yoane 8:41, 44) Bubu, bantu mingi keyindulaka nde bo kesambilaka Nzambi, kansi na kuta masonga bo kesadilaka Satana ti bademo na yandi!—1 Korinto 10:20.

 Kaka mutindu nti ya kupola kebutaka bambuma ya mbi, dibundu ya luvunu kebutaka mpi bantu yina kesalaka mambu ya mbi. Inza ke ya kufuluka na mavanga sambu na mambu ya mbi ya bantu kesala. Bantu kesala mansoni, bo kenwana, keyiba, kenyokula bankaka, kefwa bantu, mpi keladisaka bankento to bana na ngolo. Bantu mingi ya kesalaka mambu yai ya mbi kevandaka ti dibundu na bo, kansi dibundu na bo kepusaka bo ve na kusala mambu ya mbote. Kana bo yambula ve na kusala mambu ya mbi, bo lenda kuma ve banduku ya Nzambi.—Matayo 7:17, 18.

Dibundu ya luvunu kelongaka bantu na kusambila biteki. Nzambi ketuba nde beto sambila ve biteki. Mambu yai kele ya bukatikati. Keti nge tawa kyese kana muntu kesolulaka ve ti nge, kansi yandi ketubaka kaka ti foto na nge? Keti muntu ya mutindu yina lenda vanda nduku na nge ya kyeleka? Ve, yandi lenda vanda ve nduku na nge. Yehowa kezolaka nde bantu kuzabisa yandi mambu, kansi bo zabisa yo ve na kiteki to na foto, yina kevandaka ve ti luzingu.—Kubasika 20:4, 5.

Dibundu ya luvunu kelongaka nde yo ke mbi ve na kufwa bantu na ntangu ya mvita. Yezu kutubaka nde banduku ya Nzambi fwete zolanaka bo na bo. Beto kefwaka ve bantu yina beto kezolaka. (Yoane 13:35) Yo kele mbi kana beto kefwa bantu ya mbi. Ntangu bambeni ya Yezu kwisaka kukanga yandi, yandi pesaka ve balongoki na yandi nswa ya kunwana sambu na kutanina yandi.—Matayo 26:51, 52.

Dibundu ya luvunu kelongaka nde bantu ya mbi tamona mpasi na bilungi ya tiya. Kansi, Biblia kelongaka nde disumu kenataka na lufwa. (Roma 6:23) Yehowa kele Nzambi mosi ya zola. Keti Nzambi yina kele na zola lenda nyokula bantu kukonda nsuka? Ata fyoti ve! Na Paladisu, lusambu tavanda kaka mosi, yina ya Yehowa kendimaka. (Kusonga 15:4) Mabundu yonso ya kelongaka malongi ya luvunu ya Satana tavanda dyaka ve.