Kima kesimbaka kinduku kele zola. Kana nge kelonguka mambu mingi yina metala Yehowa, nge takuma kuzola yandi mingi. Sambu nge takuma kuzola Nzambi mingi, nge takuma mpi na nzala ya kusadila yandi mingi. Dyambu yai tapusa nge na kukuma longoki ya Yezu Kristu. (Matayo 28:19) Kana nge kota na dibuta ya kyese ya Bambangi ya Yehowa, nge lenda kuma nduku ya Nzambi kimakulu. Inki nge fwete sala?

Nge fwete lemfukaka na bansiku ya Nzambi sambu na kusonga nde nge kezolaka yandi. “Kana beto ke zolaka Nzambi, yo ke songa nde beto ke landaka bansiku na yandi. Ebuna bansiku na yandi kele mpasi ve beto na kulanda yo.”—1 Yoane 5:3.

Sadilaka mambu yina nge kelonguka. Yezu taka disolo mosi yina ketendula dyambu yai. Muntu mosi ya mayele tungaka nzo na yandi na zulu ya matadi. Kansi zoba mosi tungaka nzo na yandi na zulu ya zelo. Ntangu mvula ya ngolo ya mupepe kunokaka, nzo yina bo tungaka na zulu ya matadi kubwaka ve, kansi yina bo tungaka na zulu ya zelo kubwaka-bwaka kisakasaka. Yezu tubaka nde bantu yina kewaka malongi na yandi mpi kesadilaka yo kele bonso muntu ya mayele yina tungaka nzo na yandi na zulu ya matadi. Ebuna bayina kewaka malongi na yandi, kansi bo kesadilaka yo ve kele bonso zoba yina tungaka nzo na yandi na zulu ya zelo. Nge kezola kuvanda bonso nani na kati ya bantu yai zole?—Matayo 7:24-27.

 Kudipesa. Yo kezola kutendula nde nge fwete solula ti Yehowa na kati ya kisambu sambu na kuzabisa yandi nde nge kezola kusala luzolo na yandi kimakulu. Kana nge kesala luzolo ya Nzambi, yo tamonisa nde nge kele longoki ya Yezu Kristu.—Matayo 11:29.

Mbotika. “Baka ka nge mbotika, samba mpi Mfumu sambu yandi kukatula masumu na nge.”—Bisalu 22:16.

Kudipesa nge ya mvimba na kusadila Nzambi. “Konso kisalu yina ya beno ke sala, beno fweti sala yo na ntima mosi ya mbote, bonso nde beno ke sadila kaka bantu ve, kansi ti [Yehowa] mpi.”—Kolosai 3:23.