Satana kezola nde nge sadila mazi. Bantu mingi kepesaka makabu na bankaka to na bampeve na mpila nde bo tanina bo sambu muntu kusala bo mbi ve. Bo kesalaka mambu ya mutindu yai sambu bo kewaka boma ya bangolo ya insi ya bafwa. Bo kelwataka balupeto ti mitaku ya mazi. Bo kenwaka to bo kekudipakulaka “bankisi” yina bo keyindulaka nde yo kele ti ngolo ya mazi. Bantu yankaka kebumbaka bima yina bo keyindulaka nde yo kele na ngolo ya kutanina bo na kati ya banzo na bo to na nsi ya ntoto. Bantu yankaka kesadilaka “bankisi” ya mazi sambu bo keyindulaka nde mumbongo na bo tatambula mbote, bo tanunga na ekzame ya nzo-nkanda to na kuzwa nkwelani.

Kima ya kuluta mbote yina tatanina nge na Satana kele kuvanda nduku ya Yehowa. Yehowa Nzambi ti bawanzio na yandi kele na ngolo mingi kuluta Satana ti bademo na yandi. (Yakobo 2:19; Kusonga 12:9) Yehowa kele na mpusa ya ngolo ya kusonga ngolo na yandi na banduku na yandi. Disongidila, bayina kebikalaka ntangu yonso ya kwikama na yandi.—2 Bansangu 16:9.

Ndinga ya Nzambi ketuba nde: “Beno sadila [mazi, NW] ve.” Yehowa kendimaka ve mazi ti kindoki sambu bisalu yai lenda tula muntu mbala mosi na nsi ya kiyeka ya Satana Dyabulu.—Levi 19:26.