Nge lenda longuka mambu yina metala Yehowa na ntangu nge ketanga Biblia. Bamvula mingi meluta, Nzambi kuponaka bantu yina kusonikaka mabanza na yandi. Masonuku yango yo yina bo kebingaka Biblia. Bubu yai, beto kelongukaka mambu yina metala Nzambi na ntangu beto ketanga Biblia. Sambu Biblia kele ti ndinga to nsangu ya Yehowa na kati na yo, bo kebingaka yo mpi nde Ndinga ya Nzambi. Beto lenda kwikila mambu yina Biblia ketuba sambu Yehowa kekusaka ve. “Nzambi lenda tuba luvunu ve.” (Baebreo 6:18) Kyeleka kele na kati ya Ndinga ya Nzambi.—Yoane 17:17.

Biblia kele mosi na kati ya makabu ya kitoko ya Nzambi mepesaka beto. Yo kele bonso mukanda mosi yina tata mosi metindila bana na yandi ya yandi kezolaka. Yo ketubila beto mambu yina metala lusilu yina Nzambi kele na yo ya kukumisa ntoto yai kisika mosi ya kitoko ya kuzinga, disongidila, paladisu. Yo ketubila beto mambu yina yandi salaka na ntangu ya ntama, mambu yina yandi kesala ntangu yai, ti yina ya yandi tasala na bilumbu kekwisa sambu na bana na yandi ya kwikama. Yo kesadisa beto dyaka na kuyidika makambu na beto mpi na kuzwa kyese.—2 Timoteo 3:16, 17.

 Bambangi ya Yehowa kele banduku ya Nzambi; bo tasadisa nge na kubakisa mambu yina Biblia kelongaka. Songa bo kaka nde nge kezola kulonguka Biblia. Bo kelombaka ve mbongo sambu na kisalu yai. (Matayo 10:8) Katula kulonguka, nge lenda kwenda mpi na balukutakanu ya Bukristu. Bo kesalaka yo na bisika ya lusambu yina bo kebingaka nde Banzo ya Kimfumu. Kana nge kekwenda na balukutakanu ya Bukristu, nge takinga ve na kuzaba Nzambi.

Nge lenda longuka mambu yina metala Nzambi na nsadisa ya bima yina yandi mesalaka. Mu mbandu, Biblia ketuba nde: “Nzambi salaka zulu ti ntoto.” (Kuyantika 1:1) Kaka na nima ya kusala “zulu,” Yehowa salaka mpi ntangu. Dyambu yai kesonga beto nki na yina metala Nzambi? Yo kesonga beto nde Yehowa kele na ngolo mingi. Yo yina, yandi kukaka kusala kima yai ya ngolo ya beto kebingaka nde ntangu. Yo kesonga beto dyaka nde Yehowa kele mayele, sambu yo lombaka mayele sambu na kusala ntangu, yina kepesaka beto tiya ti nsemo kansi yo kezikisaka beto ve.

Bima ya Yehowa megangaka kemonisa beto nde yandi kezolaka beto. Yindula fyoti bambuma ya mutindu na mutindu yina kele awa na zulu ya ntoto. Yehowa lendaka kuyimina beto bambuma, to kupesa beto kaka bambuma ya mutindu mosi. Kansi, Yehowa pesaka beto bambuma ya mpila na mpila mpi ya kuswaswana na nene, na kulere, ti na ntomo. Dyambu yai kesonga beto nde Yehowa kele Nzambi mosi ya kesukaka ve kaka na kuzola, kansi yandi kekabaka, yandi ke na mayele mpi na ntima ya mbote.—Nkunga 104:24.