DILONGI YA 6
Paladisu Kele Penepene!
Mambu ya mbi ya kesalama awa na ntoto kemonisa nde Paladisu kele penepene. Biblia kutubaka nde beto tazinga ntangu mosi ya mpasi kibeni na ntwala Paladisu kukwisa. Lere yai beto kezinga ntangu ya mutindu yina! Tala mwa mambu ya Biblia kutubaka nde yo tasalama:
Bamvita ya nene. “Bantu ya nsi ya nkaka ta kwisa kunwanisa bantu ya nsi ya nkaka, bantu ya kimfumu ya nkaka ta kwisa kunwanisa bantu ya kimfumu ya nkaka.” (Matayo 24:7) Mbikudulu yai kele ya kyeleka. Banda na mvu 1914, bamvita zole ya inza ya mvimba ti yankaka ya fyotifyoti mesalama dezia. Bantu mingi kibeni mefwa na bamvita yai.
Maladi tapanzana. “Maladi ya mbi ta vanda na bisika ya mutindu na mutindu.” (Luka 21:11) Keti mambu yai mesalamaka? Ee, maladi ya kansere, ya ntima, ya tiberkiloze, malaria, SIDA, ti bamaladi yankaka mefwa bantu mingi kibeni.
Nzala. Na bisika mingi na zulu ya ntoto, bantu kevandaka ve ti bima ya kufwana ya kudya. Bantu mingi kibeni kefwa na nzala konso mvula. Yai kele kidimbu yankaka ya kemonisa nde kubika fyoti Paladisu kekwisa. Biblia ketuba nde: “Nzala ta vanda mingi mpenza.”—Marko 13:8.
Kunikana ya ntoto. “Ntoto . . . ta nikana na bisika ya mutindu na mutindu.” (Matayo 24:7) Mambu yai kesalama mpi na ntangu na beto. Bantu kuluta miliyo mosi mefwaka sambu na kunikana ya ntoto banda na mvu 1914.
Bantu ya mbi. Bantu “ta zolaka kaka mbongo” mpi “bo ta zolaka bantu ya nkaka ve.” Bo “ta zolaka kiese ya nsi-ntoto, kansi Nzambi ve.” Bana “ta tulaka ntu-ngolo na batata ti bamama na bo.” (2 Timoteo 3:1-5) Keti nge kendima ve nde bantu ya mutindu yai kele mingi bubu? Bo kezitisaka ve Nzambi ata fyoti, bo kenyokulaka mpi bantu yina kesosaka kulonguka mambu yina metala Nzambi.
Nku. “Mambu ya mbi ta kwisa mingi.” (Matayo 24:12) Ntembe kele ve nde nge tandima nde nku mekuma mingi kuluta mutindu yo vandaka na bamvula meluta. Na bisika yonso bantu kezinga na boma nde bo lenda yiba bo, bo lenda kukusa bo, to kusala bo mbi.
Mambu yai yonso kemonisa nde Kimfumu ya Nzambi mekuma penepene. Biblia ketuba nde: “Kana beno mona nde mambu yina ke bwa, beno fweti zaba nde Kimfumu ya Nzambi me kuma penepene.” (Luka 21:31) Kimfumu ya Nzambi kele inki? Yo kele luyalu ya Nzambi ya kele na zulu yina tatula Paladisu na zulu ya ntoto yai. Kimfumu ya Nzambi tayinga baluyalu ya bantu.—Daniele 2:44.
