Sambu na kuzinga mbote ti nduku, yo kelombaka kusolula ti yandi. Nge kewila yandi, yandi mpi kewila nge. Nge ketubila mpi bantu yankaka mambu ya mbote ya metala nduku na nge. Nduku ya Nzambi mpi kesalaka buna. Tala mambu yina Biblia ketuba sambu na dyambu yai:

Solulaka mbala na mbala ti Yehowa na kisambu. “Beno samba Nzambi konso ntangu.”—Roma 12:12.

Tangaka Ndinga ya Nzambi, Biblia. “Masonuku yonso bo sonikaka yo na mpema ya Nzambi mpi yo kele mfunu sambu na kulonga, na kunganina, na kuvutula mambu na ndonga.”—2 Timoteo 3:16, NW.

Longa bankaka mambu yina ketala Nzambi. “Beno kwenda kukumisa bantu yonso balonguki na mono: . . . beno longa bo mpi na kulanda mambu yonso ya mono vandaka kulonga beno na kusala.”—Matayo 28:19, 20.

 Finama penepene ti banduku ya Nzambi. “Kana nge landa bantu ya mayele, nge ta kuma mpi mayele.”—Bingana 13:20.

Kwendaka na balukutakanu na Nzo ya Kimfumu. “Beto talanaka beto na beto sambu na kupusana na zola mpi na bisalu ya mbote, . . . beto pesanaka kikesa beto na beto.”—Baebreo 10:24, 25, NW.

Pesaka lusadisu sambu na kusimba kisalu ya Kimfumu. “Konso muntu fweti pesa mutindu yandi me kana na kupesa; kansi yandi lenda pesa ve ti kubokuta to sambu bo me pusa yandi na kupesa; sambu Nzambi ke zolaka nde bantu kupesa makabu ti kiese.”—2 Korinto 9:7.