Yo kelombaka kikesa sambu na kuzwa nduku; yo kelombaka mpi kikesa sambu na kuzinga mingi ti nduku. Nge tabaka balusakumunu mingi kana nge sala kikesa na kukuma mpi na kubikala kaka nduku ya Nzambi. Yezu zabisaka bantu yina kukwikilaka na yandi nde: ‘Kieleka ta katula beno na kimpika.’ (Yoane 8:32) Yo ketendula inki?

Nge lenda zinga na kimpwanza ntangu yai. Nge lenda katuka na kimpika ya malongi ya luvunu ti luvunu yina Satana memwangaka. Nge lenda katuka na kimpika ya kuvanda ti luzingu ya kukonda kivuvu, mutindu yo kemonana na luzingu ya bantu mingi yina mezaba ve Yehowa. (Roma 8:22) Banduku ya Nzambi mekatukaka nkutu na kimpika ya ‘boma ya lufwa.’—Baebreo 2:14, 15.

Nge lenda zinga na kimpwanza na inza ya mpa ya Nzambi. Nge lenda zinga kibeni na kimpwanza mosi ya kitoko na bilumbu kekwisa! Na Paladisu ya ntoto, mvita tavanda dyaka ve, maladi tavanda dyaka ve, nku mpi tavanda dyaka ve. Bantu takatuka na kimpika ya bunsukami ti ya nzala. Bo takatuka mpi na kimpika ya kimununu ti lufwa. Kimpika ya boma, ya bampasi, ti ya kukonda lunungu tavanda dyaka ve. Biblia ketuba sambu na Nzambi nde: “Nge kekangula diboko na nge mpi nge kelungisa mpusa ya kigangwa yonso yina kezinga.”—Nkunga 145:16, NW.

 Banduku ya Nzambi tazinga mvula na mvula. Luzingu ya mvula na mvula kele dikabu mosi ya kitoko ya Nzambi tapesa na bantu yonso yina kesosaka kukuma banduku na yandi. (Roma 6:23) Yindula fyoti, luzingu ya kukonda nsuka tatendula inki sambu na nge!

Nge tavanda ti ntangu ya kusala mambu mingi. Ziku nge tazola kulonguka kubula miziki. To mbala yankaka nge tazola kulonguka kusala bifwanisu to kusala kisalu ya mabaya. Ziku nge tavanda ti nzala ya kulonguka bambisi ti banti. To Nge lenda vanda dyaka na nzala ya kukwenda na bisika yankaka sambu na kumona bansi yankaka ti bantu yankaka. Luzingu ya mvula na mvula tasadisa nge na kusala mambu yai yonso!

Nge tavanda ti ntangu ya kuzwa banduku mingi. Luzingu ya mvula na mvula tasadisa nge na kuzaba bantu yankaka mingi yina mekumaka banduku ya Nzambi. Nge tazaba mayele na bo ti bikalulu na bo ya mbote, bo mpi takuma banduku na nge. Nge tazolaka bo, ebuna bo mpi tazolaka nge. (1 Korinto 13:8) Luzingu ya kukonda nsuka tapesa nge ntangu ya kukuma nduku ya muntu yonso na zulu ya ntoto! Kima ya meluta mfunu kele nde, konso mvu-nkama yina keluta takumisa dyaka kinduku na nge ti Yehowa ngolo kuluta. Vanda nduku ya Nzambi mvula na mvula!