Paladisu tavanda ve bonso inza ya beto kezinga bubu yai. Nzambi kuzolaka ve ata fyoti nde ntoto kuvanda ya kufuluka ti mambu ya mpasi, ya mawa, mpi ya kenyokulaka bantu. Na bilumbu kekwisa, Nzambi takumisa ntoto paladisu. Paladisu yango tavanda nki mutindu? Beto tala mambu yina Biblia ketuba:

Bantu ya mbote. Paladisu tavanda bwala ya banduku ya Nzambi. Bo tasalanaka mambu ya mbote bo na bo. Bo talandaka banzila ya lunungu ya Nzambi na luzingu na bo.—Bingana 2:21.

Madya mingi. Nzala tavanda ve na Paladisu. Biblia ketuba nde: ‘Ntoto tafuluka na ble [to madya] mingi.’—Nkunga 72:16.

Banzo ya kitoko mpi kisalu ya mbote. Na Paladisu yina tavanda na ntoto, konso dibuta tavanda ti nzo na bo. Konso muntu tasala kisalu yina tapesaka yandi kyese mpenza.—Yezaya 65:21-23.

Ngemba na ntoto ya mvimba. Bantu tanwanaka dyaka ve, bo tafwaka mpi dyaka ve na bitumba.  Ndinga ya Nzambi ketuba nde: “[Nzambi] ke sukisa bitumba na nsi-ntoto yonso.”—Nkunga 46:8, 9.

Mavimpi ya mbote. Biblia kesila nde: “Ata muntu mosi ve ya [Paladisu] ta tuba diaka nde: ‘Mono ke bela.’” (Yezaya 33:24) Kima yankaka kele nde, ata muntu mosi ve tavanda kikata to kifwa-meso to kifwa-makutu to baba.—Yezaya 35:5, 6.

Mpasi, mawa, ti lufwa tasuka. Ndinga ya Nzambi ketuba nde: “Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.”—Kusonga 21:4.

Bantu ya mbi tafwa. Yehowa kesila nde: “Bantu yonso ya mbi, Nzambi ta katula bo na ntoto; yandi ta tumuna bo mutindu bo ke tumunaka matiti na ntoto.”—Bingana 2:22.

Bantu tazolanaka mpi bo tapesanaka luzitu. Kukonda lunungu, mpasi, nzala ya kuvanda na konso kima, kumengana tavanda dyaka ve. Bantu tavanda na bumosi mpi bo talandaka banzila ya lunungu ya Nzambi na luzingu na bo.—Yezaya 26:9.