Biblia Ke Sobaka Luzingu ya Bantu

INKI pusaka bakala mosi ya vandaka kuyiba mpi kuzola mingi bansaka ya mbongo na kukatuka na kimpika yai mpi na kuyambula bikalulu yai ya mbi? Beto landa mambu yina yandi ke tuba.

“Mono vandaka kuzola mingi nsaka ya kubaka ntinu na zulu ya bampunda.”—RICHARD STEWART

MVULA YINA YANDI BUTUKAKA: 1965

INSI YINA YANDI BUTUKAKA: JAMAÏQUE

LUZINGU NA YANDI YA NTAMA: YANDI VANDAKA KUZOLA MINGI BANSAKA YA MBONGO MPI YANDI VANDAKA MUNTU YA MUBULU

MUTINDU MONO VANDAKA: Mono yelaka na Kingston, ntu-mbanza ya insi Jamaïque, na kartie mosi ya bansukami mpi yina vandaka ti bantu mingi kibeni. Bantu mingi mpenza vandaka ve ti bisalu mpi mubulu vandaka kusalama mingi mpenza. Bantu vandaka kuzinga na boma sambu na bimvuka ya babandi. Konso kilumbu mono vandaka kuwa mutindu bantu vandaka kubula masasi.

Mama vandaka kusala ngolo sambu na kusadisa mono ti leki na mono ya bakala mpi ya nkento. Yandi vandaka kusala yonso sambu beto longuka na banzo-nkanda ya mbote. Kansi mambu ya nzo-nkanda vandaka mpenza ve kusepedisa mono. Kusala nsaka ya kubaka ntinu na zulu ya bampunda kele kima ya vandaka kusepedisa mono mingi. Mono vandaka kutina nzo-nkanda sambu na kukwenda na bisika yina bansaka ya kubaka ntinu na zulu ya bampunda vandaka kusalama. Bantangu ya nkaka, mono vandaka mpi kumata na zulu ya bampunda.

Ntangu fioti na nima, mono kumaka kubasisa mbongo mingi sambu na bansaka ya kubaka ntinu na zulu ya bampunda. Mono vandaka kuvukisa nitu ti bankento mingi mpenza. Mono vandaka kunwa makaya ya ngolo ya bo ke bingaka marijuana (diamba). Yo yina mono kumaka kuyiba sambu na kuzwa mbongo ya kusadila bansaka, ya kusumbila makaya mpi ya kupesa bankento yina mono vandaka kuvukisa nitu ti bo. Mono vandaka ti minduki mingi mpi mono kele na kiese mutindu ata muntu mosi ve fwaka na bambala yonso yina beto vandaka kuyiba.

Nsuka-nsuka, bapolisi kangaka mono mpi bo tulaka mono na boloko. Ntangu mono basikaka na boloko, mono yambulaka ve luzingu na mono ya mubulu. Nkutu, mono kumaka diaka mbi kuluta. Mono vandaka ti luse ya mawete. Ata mpidina, mono vandaka kaka kusala mambu ya mono me zola, mono vandaka makasi-makasi mpi nku. Mono vandaka kudiyangisa ve sambu na bantu ya nkaka.

MUTINDU BIBLIA SOBAKA LUZINGU NA MONO: Bantangu yonso yina mono vandaka kusala mambu yai yonso ya mbi, mama vandaka kulonguka Biblia mpi yandi kumaka Mbangi ya Yehowa. Mono monaka mutindu mama kumaka ti bikalulu ya mbote mpenza mpi yo bendaka dikebi na mono. Mono bakaka lukanu ya kusosa kuzaba mambu ya pusaka mama na kukuma muntu ya mbote mutindu yina. Yo yina, mono yantikaka mpi kulonguka Biblia ti Bambangi ya Yehowa.

Mono bakisaka nde malongi ya Bambangi ya Yehowa me swaswana ti mambu yina mabundu ya nkaka ke longaka. Mono bakisaka mpi nde Bambangi ya Yehowa vandaka kubaka na Biblia mambu yonso ya bo vandaka kulonga. Bo mpamba bantu vandaka kulonga nzo na nzo mutindu Bakristu ya ntete vandaka kusala yo. (Matayo 28:19; Bisalu 20:20) Mono ndimaka kibeni nde mono zwaka dibundu ya kieleka ntangu mono monaka na meso na mono mosi zola ya kieleka yina Bambangi ya Yehowa vandaka kumonisilana.—Yoane 13:35.

Mambu yina mono vandaka kulonguka na Biblia pusaka mono na kuyambula mambu yonso ya mbi ya mono vandaka kusala. Mono longukaka nde Yehowa ke mengaka pite mpi nde sambu na kusepedisa yandi, mono fwete yambula mambu yonso yina vandaka kubebisa nitu na mono. (2 Bakorinto 7:1; Baebreo 13:4) Mono longukaka mpi nde mambu ya beto ke salaka lenda pesa Yehowa mpasi to kiese. (Bingana 27:11) Yo yina mono bakaka lukanu ya kuyambula kunwa makaya marijuana, mono losaka minduki na mono mpi mono bandaka kuyidika bikalulu na mono. Yo vandaka mpasi mingi sambu mono yambula bansaka mpi luzingu ya kuvukisa nitu ti bankento mingi.

Na luyantiku, mono vandaka kuzola ve nde banduku na mono kuzaba nde mono ke longuka Biblia ti Bambangi ya Yehowa. Kansi mambu sobaka ntangu mono tangaka mambu yai ya Yezu tubaka na Matayo 10:33: “Konso muntu yina ke buya mono na ntwala ya bantu, mono mpi ta buya yandi na ntwala ya Tata na mono yina kele na zulu.” Mambu yai pusaka mono na kusonga banduku na mono nde mono vandaka kulonguka Biblia ti Bambangi ya Yehowa. Yo yitukisaka bo mingi kibeni. Bo yitukaka na kumona muntu bonso mono ke baka lukanu ya kukuma Mukristu. Kansi mono songaka bo nde mono ta sala diaka ve mambu yonso ya mbi ya mono vandaka kusala ntete.

MAMBOTE YA MONO ME BAKAKA: Mama waka kiese mingi ntangu yandi monaka mutindu mono yantikaka kusadila na luzingu na mono mambu yina Biblia ke tubaka. Bubu yai, yandi ke kudiyangisaka diaka ve sambu mono ke salaka diaka ve mambu ya mbi. Mono ti mama, beto me kumaka kuzolana mingi sambu beto zole ke zolaka Yehowa mingi. Bantangu ya nkaka, ntangu mono ke yindulaka mutindu mono vandaka ntete mpi mutindu mono me kumaka na lusadisu ya Nzambi, yo ke lutilaka mono mingi. Mono ke vandaka diaka ve ata fioti ti nzala ya kuvutukila luzingu yina ya mansoni mpi ya kusosa kuvanda ti bima mingi.

Kana mono ndimaka ve nsangu ya Biblia, mbala ya nkaka bubu yai mono zolaka kuvanda diaka ve na luzingu to mpi mono zolaka kuvanda mbala ya nkaka na boloko. Kansi mono kele ti dibuta mosi ya mbote kibeni mpi beto ke zingaka na kiese. Mono ke vandaka na kiese ya kusadila Yehowa Nzambi na lweka ya nkento na mono yina ke sadisaka mono mingi mpi ya mwana na beto ya nkento yina ke vandaka ti bikalulu ya mbote. Mono ke pesaka Yehowa mersi mingi mutindu yandi me kotisaka mono na kati ya dibuta ya bampangi yina ke monisilanaka kibeni zola. Mono kele mpi na kiese sambu na bikesa yina muntu mosi salaka sambu na kulonga mono malongi ya kieleka ya Biblia. Mono ke bakaka na valere mingi mabaku yina mono ke vandaka na yo ya kusadisa bantu ya nkaka na kuzaba mambu yina Biblia ke longaka. Mono ke pesaka Yehowa Nzambi mersi mingi-mingi sambu yandi me monisilaka mono ntima ya mbote mutindu yandi me bendaka mono na yandi.

[Bangogo sambu na kubenda dikebi]

“Mono longukaka mpi nde mambu ya beto ke salaka lenda pesa Yehowa mpasi to kiese.”

[Kifwanisu]

Mono ti nkento na mono mpi mwana na beto ya nkento

[Kifwanisu]

Mono monaka mutindu mama kumaka ti bikalulu ya mbote mpenza