Kitini 8

Bika Lusambu ya Luvunu; Kota na Lusambu ya Kyeleka

1. Sambu na yina me tadila lusambu, inki bantu fwete sola na ntangu na beto?

 YEZU kutubaka nde: “Muntu yina kele nduku na mono ve, yandi kele mbeni na mono.” (Matayo 12:30) Kana beto kele na simu ya Yehowa ve, disongidila beto kele na simu ya Satana. Bantu mingi keyindulaka nde bo kesadilaka Nzambi na mutindu ya mbote, kansi Biblia ketuba nde Satana ‘kekusaka bantu yonso.’ (Kusonga 12:⁠9) Bantu mingi keyindulaka nde bo kesambilaka Nzambi, kansi bo kesambilaka kibeni Satana Dyabulu! Bubu yai bantu fwete sola: Bo fwete sadila Yehowa, “Nzambi ya kieleka,” to Satana, “tata ya luvunu.”​—⁠Bankunga 31:6; Yoane 8:⁠44.

Zenga Kinduku ti Lusambu ya Luvunu

2. Inki kele metode mosi ya Satana kesadilaka sambu na kumeka kukangisa bantu na kusambila Yehowa?

² Kubaka desizio ya kusadila Yehowa kele kusola ya mayele, kusola yina kesalaka nde Nzambi kundima muntu. Kansi Satana keyangalalaka ve ti bantu yonso yina kesadilaka Nzambi; yandi kepesaka bo mpasi. Metode yina yandi kesadilaka kele ya kupusa bantu yankaka to nkutu banduku ti bantu ya dibuta na kuseka bo ti kumenga bo. Yesu kukebisaka nde: “Bambeni ya konso muntu ta vanda bantu yina kele na fami na yandi mosi.”​—⁠Matayo 10:⁠36.

3. Kana dibuta na nge to banduku na nge ke nwanisa lusambu ya nge kepesa na Nzambi, inki nge tasala?

³ Kana yo mekumina nge, inki nge ta sala? Bantu mingi mezabaka nde mutindu ya bo kesambilaka kele mbote ve, kansi bo kevandaka na badute na kuzenga kinduku ti lusambu yina. Bo kebanzaka nde bo takonda kwikama na dibuta na bo kana bo sala yo. Keti mabanza yai kele mbote? Kana nge me wa nde bantu ya  dibuta na nge kenwaka dyamba, keti nge takebisa bo ve nde dyamba yina ta sala bo mbi? Nge tavukana ve ti bo sambu na kunwa dyamba yina, buna ve?

4. Inki Yozue kusongaka bantu ya Izraele na yina metala lusambu na ntangu na yandi?

⁴ Yozue kusyamisaka bantu ya Izraele na kubika bisalu ya dibundu ya luvunu ti kinkulu ya bankaka na bo. Yandi tubaka nde: “Ntangu yai, beno zitisa Mfumu Nzambi, beno sadila yandi na ntima mosi ya mbote. Beno lemfuka na yandi. Beno katula-katula banzambi yina ya bankaka na beno vandaka kusambila kuna na nsi ya Mezopotamia ti ya Ezipte, beno samba kaka Mfumu Nzambi.” (Yozue 24:14) Yozue vandaka ya kwikama na Nzambi, mpi Yehowa kusakumunaka yandi. Kana beto kele ya kwikama na Yehowa, yandi ta sakumuna beto mpi.​—⁠2 Samuele 22:⁠26.

Losa Bima ya Bo Kesadilaka na Lusambu ya Luvunu

5. Sambu na nki beto fwete losa bima ya mazi?

⁵ Kuzenga kinduku ti lusambu ya luvunu ketendula dyaka nde beto fwete fwa bima ya mazi yina beto lenda vanda na yo, bonso bikila-kila, bansinga to mayaka ya mazi, balupetu ti mitaku ya mazi, mpi bima yankaka ya mutindu yai. Yo kele nfunu mingi sambu yo kesonga nde beto ke tulaka ntima na beto yonso na Yehowa.

6. Inki Bakristu ya ntete kusalaka ti mikanda na bo ya mazi?

⁶ Tadila mambu yina Bakristu ya ntete kusalaka ntangu bo bakaka lukanu ya kusadila lusambu ya kyeleka. Biblia ketuba nde: “Bantu mingi yina vandaka kusala kindoki, bo nataka mikanda na bo, bo tula yo bisika mosi, ebuna bo yoka yo na meso ya bantu yonso.”​—⁠Bisalu 19:⁠19.

7. Inki beto lenda sala kana bademo kemonisa beto mpasi?

⁷ Bantu yankaka na kati ya bayina keyantika kusadila Yehowa vandaka kusadila kindoki to bisalu yina kewakanaka ti mazi. Bademo lenda monisa bantu yai mpasi. Kana yo mekumina nge, samba Yehowa na ndinga ya ngolo, mpi sadila zina na yandi. Yandi tasadisa nge.​—⁠Bingana 18:10; Yakobo 4:⁠7.

8. Inki mutindu Bakristu ketadilaka biteki, bifwanisu, mpi bafoto yina bantu kesadilaka na lusambu ya luvunu?

⁸ Bayina kezola kusadila Yehowa fwete bumba ve to kusadila kiteki, kifwanisu, to foto ya konso mutindu yina ya lusambu ya luvunu. Bakristu ya kieleka “ke zingaka ve sambu na mambu yina [bo] ke monaka na meso, kansi [bo] ke zingaka sambu na lukwikilu na [bo].” (2 Korinto 5:⁠7) Bo kezitisa nsiku ya Nzambi yina kebuyisaka kusadila bifwanisu yonso na lusambu.​—⁠Kubasika 20:​4, 5.

Vukana ti Bantu ya Yehowa

9. Inki ndongisila Biblia kepesa sambu na kukuma mayele?

⁹ Biblia ketuba nde: “Kana nge landa bantu ya mayele, nge ta kuma mpi mayele.” (Bingana 13:20) Kana beto kezola kuvanda mayele, beto fwete tambula, to kuvukana ti Bambangi ya Yehowa. Bo bantu ketambulaka na nzila yina kenataka na moyo.​—⁠Matayo 7:⁠14.

10. Inki mutindu Bambangi ya Yehowa lenda sadisa nge na kusadila Nzambi?

¹⁰ Bambangi ketudilaka kibeni bantu dikebi. Kisalu na bo kele kusadisa bantu ya ntima ya mbote na kubakisa bakyeleka ya Biblia yina kenataka na luzingu ya mvula na mvula. Bo lenda longuka ti nge Biblia ya ofele sambu na kusadisa nge. Bo tapesa bamvutu na bangyufula na nge mpi bo tasonga nge mutindu ya kusadila nzayilu ya Biblia na luzingu na nge.​—⁠Yoane 17:⁠3.

11. Inki mutindu balukutakanu ya Bukristu tasadisa nge?

¹¹ Na balukutakanu na bo, yina bo kesalaka mbala mingi na Nzo ya Kimfumu, nge talonguka mambu mingi yina metala banzila ya Yehowa. Mpusa na nge ya kusadila lusambu ya kyeleka takuma ngolo. Nge talonguka mpi mutindu ya kusadisa bankaka na kulonguka bakyeleka ya Biblia.​—⁠Baebreo 10:​24, 25.

12. Inki mutindu kisambu lenda sadisa nge na kusadila Nzambi?

¹² Mutindu nge kelonguka mambu mingi yina metadila luzolo mpi lukanu ya Yehowa, ntonda na nge sambu na banzila na yandi ya zola takuma mingi. Mpusa na nge ya kusala mambu yina kepesaka yandi kyese mpi ya kubuya yina kepesaka yandi ve kyese  takuma mpi mingi. Yibuka nde nge lenda kwenda penepene na Yehowa na kisambu sambu na kulomba nde yandi sadisa nge na kusala mambu yina kele mbote mpi kutina yina kele mbi.​—⁠1 Korinto 6:​9, 10; Filipi 4:⁠6.

13. Inki mutindu nge lenda pesa ntima ya Yehowa kyese?

¹³ Mutindu nge ke yela na kimpeve, ntembe kele ve nde nge tamona mfunu ya kudipesa na Yehowa, mpi ya kukuma Mbangi ya Yehowa ya mebakaka mbotika. Ntangu nge takota na ndonga ya bantu ya Yehowa, nge tapesa ntima ya Yehowa kyese. (Bingana 27:11) Nge tavanda na kati ya bantu ya kyese yina Nzambi ketubaka nde: “Mono ta zingaka ti bo, mono ta tambulaka ti bo, Mono ta vanda Nzambi na bo ebuna bo ta vanda bantu na mono.”​—⁠2 Korinto 6:⁠16.

[Bangiufula ya disolo ya kulonguka]

[Lupangu/Kifwanisu ya kele na lutiti 25]

Malongi ya Mabundu​—Ya Kyeleka mpi ya Luvunu

● Butatu Busantu: Mabundu mingi kelongaka nde Nzambi kele Butatu Busantu. Bo ke tubaka nde “Tata kele Nzambi, Mwana [Yesu] kele Nzambi, mpi Mpeve Santu kele Nzambi, kansi ba Nzambi kele tatu ve, Nzambi kele mosi kaka.”

Na Biblia bangogo “Butatu Busantu” kele ve ata kisika mosi, Biblia kelongaka mpi ve nde Yehowa kele bapersona tatu na mosi. Kaka Yehowa kele Nzambi. Mukanda ya ntete na bantu ya Korinto 8:6 ketuba nde: “Beto k[e] na Nzambi mosi mpamba, Tata.” Yehowa kele na Zulu ya Bima Yonso. Yezu kele Nzambi ve, kansi “Mwana-Nzambi.” (Yoane 4:15) Mutindu mosi mpi, mpeve santu kele Nzambi ve. Mpeve santu kele mpi muntu ve. Yo kele ngolo ya kisalu ya Nzambi.​—⁠Bisalu 1:8; Efezo 5:⁠18.

● Moyo: Mabundu mingi kelongaka nde moyo kele kima mosi ya lenda fwa ve yina kele na kati ya muntu. Biblia kelongaka nde moyo kele muntu yandi mosi mpi, ntembe kele ve nde, muntu lenda fwa.​—⁠Kuyantika 2:7; Ezekiele 18:⁠14.

● Bilungi ya Tiya: Mabundu ya luvunu kelongaka nde moyo ya bantu ya mbi kemonaka mpasi ya kimakulu na bilungi. Kansi Biblia ketubaka nde bafwa “kuzaba kima mosi ve.” (Longi 9:⁠5) Biblia kelongaka mpi nde “Nzambi ke zolaka bantu.” (1 Yoane 4:⁠8) Yehowa, Nzambi ya zola, lenda nyokula ve bantu na tiya.

[Lupangu/Kifwanisu ya kele na lutiti 28]

Mu Zengaka Kinduku ti Bademo

Na mpimpa mosi ntangu mu vandaka ya kulala na mbeto ti bakala na mono, mono waka ndinga mosi kebinga zina na mono mbala tatu. Na nima mono monaka plafo mepasuka, mpi bo losaka kima mosi ya vandaka kupela tiya mpi yina kuvandaka bonso balo na divumu na mono. Ya kyeleka, bakala na mono lendaka kumona ve mambu yai yonso. Ata mpidina, mono vandaka kuwa tiya mosi ya ngolo yina salaka bangonda mingi.

Bangonda sambanu na nima, ndinga yina kubingaka mono dyaka. Na mbala mosi, nzo ya mvimba vandaka kumonana neti nde yo vandaka na kati ya masa ya mudindu. Mboma mosi ya nene kubasikaka na masa yango mpi yo yantikaka kutambula malembe-malembe na diboko na mono. Mu mekaka kukatula yo, kansi mu kukaka ve. Mu vandaka kutekita na boma. Na nima masa mpi nioka yango kuvilaka, mpi bo losaka mono na ngolo yonso na ntoto. Bantangu mingi kulutaka mu vandaka kudizaba diaka ve. Na nima, ndinga yina kutubilaka mono na kuvutuka na tempelo ya bwala yina bo vandaka kubelula bantu na ngolo ya bampeve ya mbi. Ntangu mu yufulaka mpeve yina zina na yandi, yandi pesaka zina mosi yina ketendula “Munkwa-kimvwama kansi ya bana ve.” Yandi silaka na kupesa mono ngolo ya kubelula bantu yina tavwamisa mono.

Bambefo ya bisika ya penepene mpi ya ntama vandaka kwisa na mono. Na ntwala ya kukuma na nzo na mono, bo vandaka kumonana na tala-tala na mono ya kuswaswana. Mpi, kana muntu mekuma, mu vandaka kutula diboko na mono na diboko na yandi, mpi mpeve yango vandaka kusonga mono mbala mosi kimbefo to dikambu ya muntu yango kumosi ti mutindu ya kusansa yo. Mpeve vandaka kutubila mono mpi mbongo ikwa konso muntu fwete futa.

Mbongo mpi makabu vandaka kukota mingi sambu bantu vandaka kubeluka mbotembote. Mu kumaka “Munkwa-kimvwama,” kansi mu bakisaka mpi nki yo ketendula ‘kukonda bana.’ Ntangu yonso ya mu vandaka kubuta mwana, mbuta ya mwana yina vandaka kufwa. Yo vandaka mpasi mingi. Na bamvula 12 yina mu sadilaka mpeve yina, bana na mono sambanu kufwaka.

Mu yantikaka kusamba Nzambi sambu yandi sadisa mono. Mu sambaka ngolo kibeni. Kilumbu mosi Bambangi ya Yehowa kubulaka na kyelo na mono. Ata mu vandaka na kikalulu ya kukula bo, kilumbu yina mono bakaka lukanu ya kuwidikila bo. Na masolo yina kulandaka, mu longukaka nde mu vandaka kusadila demo! Mu bakaka lukanu ya kubikisa bampeve ya mbi.

Na ntangu mu zabisaka yo na mpeve yina, yandi kebisaka munu na desizio yina. Kansi, mu tubilaka yandi nde: “Imene nge ti mono.”

Mu yokaka bima yonso yina mu vandaka kusadila sambu na kuzabisa mambu yina takwisa na ntwala. Mu longukaka Biblia ti Bambangi, mu kumaka nsadi ya Yehowa, mpi mu bakaka mbotika na mvu 1973. Bubu yai mu ke na bana tanu yina kele na mamvimpi ya mbote. Bakala na mono mpi kukumaka Mbangi ya mebakaka mbotika.​—⁠Josephine Ikezu.

[Bangiufula]

Lupangu: Inki mutindu nkento mosi kukatukaka na kimpika ya bademo?

 [Bifwanisu ya kele na lutiti 26]

Inki mutindu nge lenda sadila lusambu ya kieleka?