Lusambu ya Kyeleka Lenda Pesa Nge Mambote Kimakulu!
Kitini 9
Lusambu ya Kyeleka Lenda Pesa Nge Mambote Kimakulu!
1. Inki tasalama kana beto “kwenda penepene na Nzambi”?
YEHOWA kezolaka bantu yina kesadilaka yandi. Kana nge sambila Yehowa, yandi tasakumuna nge ntangu yai mpi na bilumbu kekwisa. Biblia ketuba nde: “Beno kwenda penepene na Nzambi, ebuna yandi ta kwisa penepene na beno.”—Yakobo 4:8.
2. Inki mutindu beto lenda kwenda penepene na Nzambi, mpi nki mutindu yo tamonana na bisambu na beto?
2 Sambu na kukwenda penepene na Nzambi, nge fwete longuka mpi kusadila Ndinga na yandi. Ntangu nge kesamba na mutindu yina kewakana ti luzolo na yandi, Yehowa tawa bisambu na nge mpi yandi tapesa nge mvutu. Yoane, yina kuvandaka ntumwa mpi Mukristu kusonikaka nde: “Beto ke na kikesa na kutelama na meso ya Nzambi sambu, kana beto ke lomba konso kima bonso kele luzolo na yandi, beto zaba mbote nde yandi ke wila beto. Kana beto zaba nde yandi ke waka mambu yonso ya beto ke lombaka na yandi, beto zaba mpi nde beto ke bakaka mambu yina ya beto ke lombaka yandi.”—1 Yoane 5:14,15.
3-7. Inki mutindu beto lenda baka mayele ya Nzambi, mpi nki mutindu yo lenda sadisa beto?
3 Dyaka, mutindu nge kekwenda penepene na Nzambi, yandi tapesa nge mayele ya kununga mambu ya konso kilumbu na luzingu. Biblia ketuba nde: “Kana muntu mosi na kati na beno ke na mayele ve, yandi lomba yo na Nzambi.”—Yakobo 1:5.
4 Inki mutindu mayele ya Nzambi lenda sadisa nge? Ntetentete, yo lenda sadisa nge na kuzaba mambu yina kesepedisaka ve Yehowa. Nge lenda longuka mpi sambu na nki mambu yango kele mbi mpi nki nge lenda sala sambu na kuyambula yo. Kuzaba mambu yai lenda tanina nge na mambu mingi ya mbi yina kemonisaka bantu mingi mpasi. Mu mbandu, kulemfuka na malongi ya Nzambi yina kelomba beto na kuvanda na bikalulu ya mbote ketaninaka bantu ya Nzambi na kubaka ve divumu ya kukonda kukana, na kubela ve maladi yina kesambukilaka na kuvukisa nitu, mpi na kuvanda ve na makwela ya kukonda kyese to na kufwa yo.
5 Inki kima yankaka mayele ya Nzambi kepesaka lenda sala sambu na nge? Yo lenda sadisa nge na kuzwa mambote mingi na luzingu. Yo lenda sadisa nge na kubaka badesizio ya mayele na mambu ya luzingu, mu mbandu mutindu ya kusadila mbongo na nge. Nge takuka kulanda balukanu yina kele mfunu mpi kuyambula yina kele mfunu mingi ve.
6 Mayele ya Nzambi lenda mpi kusadisa nge na kinduku na nge ti bantu yankaka. Nge lenda vanda ti luzingu ya dibuta ya kyese. Nge lenda tunga kinduku ya ntangu mingi mpi ya kyeleka ti bampangi, mpi bantu lenda yantika kuzitisa nge, ata bayina kesadilaka ve Nzambi.
7 Kuluta dyaka, mayele ya Nzambi tatomisa mutindu na nge ya kutadila luzingu. Yo tasadisa nge na kunwana ti bampasi mpi basusi ya luzingu. Nge tatadila mpi bilumbu yina kekwisa na bukatikati mpi na ngindu ya mbote. Ngindu ya mbote tasadisa nge na kuvanda ti mavimpi ya mbote na mabanza mpi na nitu.—Bingana 14:30; Yezaya 48:17.
8. Kana nge sadila Nzambi, inki nge tatita ve?
8 Kana nge sadila Nzambi ya kyeleka, nge tatitaka dyaka ve mambu yina kepesaka bantu ya kesadilaka yandi ve mpasi. Sambu nge mezaba nde bafwa kele na luzingu ve na mazyamu, nge tatita ve bantu yina mefwaka. Sambu nge ketula ntima na lusilu ya Nzambi ya kufutumuna bafwa, nge tatita ve lufwa. Mpi mutindu nge mezaba nde Nzambi kele nkwa-ngolo yonso, nge tatita ve kindoki.—Yoane 8:32.
Bantu ya Mbote Tazinga na Ntoto
9-11. Banani tazinga na Paladisu, mpi banani tazinga ve kuna?
9 Kana nge kwenda penepene na Nzambi, nge tawa ve boma ya bilumbu kekwisa. Mutindu beto mekatuka kumona yo, Biblia kutubilaka na ntwala mambu mingi ya beto kemona bubu yai na ntoto. Yehowa ketubila beto nde mambu yango kele ya ntangu fyoti; kubika fyoti Kimfumu ya Nzambi takumisa ntoto yai paladisu.—Luka 21:10, 11, 31; 23:43.
10 Kaka bayina kekwenda penepene na Nzambi mpi kesadila yandi tazinga na Paladisu. Biblia ketuba nde: “Kubika fioti kaka bantu ya mbi ta vila, nge lenda sosa bo kansi nge ta mona bo ve; kansi bantu yina ke kudikulumusaka, bo ta zinga mbote na ngemba mpenza na ntoto.”—Bankunga 37:10, 11.
11 Bayina kebuya kulemfuka na bansiku ya lunungu ya Nzambi na ntu-ngolo yonso tavidisa luzingu na bo kimakulu. (2 Tesalonika 1:8, 9) Bo tazinga dyaka ve. Bo tafwa kimakulu nzila mosi ti Satana mpi bademo na yandi. (Kusonga 20:10, 14) Kansi bayina kelonguka mambu yina metala Yehowa mpi kesadila yandi tazinga na kyese mingi kibeni na Paladisu na ntoto.
Bilumbu ya Kitoko Yina Kekwisa!
12. Inki Biblia ketuba sambu na bilumbu yina kekwisa?
12 Yehowa mebumba mambu ya kitoko sambu na bantu yina kezolaka yandi! Tala mambu ya Ndinga na yandi ketuba sambu na luzingu na Paladisu ya ntoto.
● Madya tavanda mingi: “Ntoto kufuluka na ble [to, madya] mingi, bangumba kufuluka na bima ya bilanga; yo vanda mingi bonso na ngumba ya Libani.’’—Bankunga 72:16.
● Banzo ya mbote: “Bo ta tunga banzo, bo ta zinga muna.”—Yezaya 65:21.
● Kisalu ya kitoko: “Bo ta mona kiese na bisalu ya maboko na bo. Bisalu ya bo ta sala yo ta vanda ya mpamba ve.”—Yezaya 65:22, 23.
● Maladi tavanda ve: “Ata muntu mosi ve . . . ta tuba diaka nde: ‘Mono ke bela.’”—Yezaya 33:24.
● Bantu ya kifu tavanda ve: “Meso ya bantu ya kufwa-meso ta mona, makutu ya bantu ya kufwa-makutu ta kanguka. Bantu ya makulu-kifu ta pumbuka bonso mbambi, bababa ta kuma kutuba na ndinga ya ngolo ti kiese.”—Yezaya 35:5, 6.
● Mpasi, kyadi, lufwa tavanda ve: “[Nzambi] ta kusula masanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.”—Kusonga 21:4.
● Bitumba tavanda ve: “[Nzambi] ke sukisaka bitumba na nsi-ntoto yonso.”—Bankunga 46:10.
● Luzingu ya mvula na mvula: “Bantu ya mbote ta zinga na ngemba na ntoto yina ya Mfumu Nzambi tubaka na kupesa bo; yo ta vanda ya bo tii kuna.”—Bankunga 37:29.
13. Nani mpamba lenda kumisa ntoto yai paladisu, mpi sambu na inki?
13 Bantu lenda sala ve ata fyoti mambu yai yonso, kansi Yehowa kele na ngolo ya kusala mambu yonso ya yandi kekana na kusala. Ata kima mosi ve lenda kangisa yandi nzila na kusala mambu ya yandi kezola kusala. Biblia ketuba nde: “Nzambi lunga sala mambu yonso.”—Luka 1:37.
14 .Inki mutindu nge lenda kota na nzila yina kenata na luzingu ya mvula na mvula?
14 Na nsadisa ya Bambangi na yandi, Yehowa kepesa bantu ya bisika yonso okazio ya “kukota na kielo yina kele ya fioti” mpi na kutambula na nzila yina kenata na luzingu ya mvula na mvula. Nge lenda vanda na kati ya bantu ya kyese yina kendima invitasio yai. Bika nge sadila dibundu ya kyeleka mpi nge baka balusakumunu ya Yehowa kimakulu!—Matayo 7:13, 14.
[Bangiufula ya disolo ya kulonguka]
[Kifwanisu ya lutiti ya mvimba na lutiti 31]