Yindula diambu yai: Ntangu yandi ke sakana ti banduku, Tim me bula nkweso ebuna yo me bula fenetre ya muntu mosi ya kartie na bo.

Kana nge vandaka Tim, nge zolaka kusala nki?

NGE KELE TI BANSOLA TATU:

1. Kutina.

2. Kupesa muntu ya nkaka foti.

3. Kusonga muntu yina mambu ya me salama, mpi kundima kufuta bima yina me beba.

Nge lenda vanda ti nzala ya kusala Nsola A. Kansi yo ke vandaka ntangu yonso ti bikuma ya mbote ya kundima bifu na nge—yo vanda nge me bebisa fenetre to kima ya nkaka.

1. Yo ke diambu ya mbote ya kusala.

   Biblia ke tuba nde: “Beto ke zola kuditwadisa na masonga na mambu yonso.”—Baebreo 13:18.

2. Bantu ke lolulaka kukonda mpasi bantu yina ke ndimaka bifu na bo.

   Biblia ke tuba nde: “Muntu yina ke bumba mambi na yandi ta nunga ve, kansi muntu yina ke funguna yo mpi ke yambula yo, bo ta wila yandi mawa.”—Bingana 28:13.

3. Kima ya kuluta mfunu kele nde, yo ke sepedisaka Nzambi.

   Biblia ke tuba nde: “Yehowa ke mengaka muntu ya luvunu, kansi yandi ke taka kinduku ya ngolo ti bantu ya mbote.”—Bingana 3:32.

Karina, yina ke ti bamvula 20, mekaka kubumba amande ya bo zengilaka yandi sambu yandi pusaka kamio na vitesi mingi sambu papa na yandi kuzaba yo ve. Kansi yandi kukaka ve kubumba yo kimakulu. Karina ke tuba nde, “Kiteso ya mvula mosi na nima, papa monaka amande yina. Yo natilaka mu mavwanga mingi!”

Inki dilongi beto ke baka? Karina ke tuba nde: “Kubumba bifu na beto ke bebisaka kibeni mambu. Nsuka-nsuka, beto fwete futa sambu na yo!”

Biblia ke tuba nde: “Beto yonso ke bulaka sakuba mbala mingi.” (Yakobo 3:2) Mpi mutindu beto me mona, kundima bifu na nge mpi kusala yo kukonda kusukinina kele kidimbu ya ke monisa nde nge kele ya kudikulumusa mpi ya kuyela.

Diambu ya me landa kele kubaka malongi na bifu na nge. Leke mosi ya nkento, zina na yandi Vera, ke tuba nde: “Na konso kifu ya mu ke salaka, mu ke salaka ngolo na kubaka dilongi yina ta sadisa mu na kusoba mpi na kusala mambu mutindu ya nkaka mbala ya nima.” Beto tala mutindu nge lenda sala yo.

Nge me baka velo ya papa na nge mpi nge me bebisa yo. Inki nge ta sala?

• Kutuba ve ata kima mpi kuyindula nde papa ta zaba ve.

• Kusonga papa mambu yina salamaka.

• Kusonga papa mambu yina salamaka kansi kupesa foti na muntu ya nkaka.

Nge me nunga ve na ekzame sambu nge longukaka ve. Inki nge ta sala?

• Kutuba nde ekzame vandaka mpasi.

• Kundima foti na nge.

• Kutuba nde longi ke zolaka nge ve.

 Ntangu yai, tadila diaka bambandu ya beto me tubila mpi meka kuyindula nde nge kele (1) papa na nge mpi (2) longi na beno. Inki mutindu papa ti longi na beno ta mona nge kana nge ndimaka bifu na nge kukonda kusukinina? Bo ta mona nge nki mutindu kana nge mekaka kubumba bifu na nge?

Ntangu yai, yindula kifu mosi ya nge salaka na mvula yina me luta mpi pesa mvutu na bangiufula yai.

Inki kifu nge salaka? Inki nge salaka na nima?

• Mu bumbaka yo.

• Mu pesaka foti na muntu ya nkaka.

• Mu ndimaka yo kukonda kusukinina.

Kana nge ndimaka ve kifu na nge, nki mutindu nge kudiwaka na nima?

• Mbote—Yo salaka mu kima ve!

• Mawi ya kunata makambu—Yo lombaka nde mu tuba kieleka.

Inki kele mutindu ya mbote ya nge zolaka kusala?

Inki dilongi nge bakaka na kifu na nge?

Sambu na nki bantu ya nkaka ke zolaka ve kundima bifu na bo?

Bantu ta yindula nki sambu na nge kana nge ke pesaka ntangu yonso bikuma sambu na kunungisa bifu na nge, kansi bo ta yindula nki sambu na nge kana nge ke ndimaka bifu na nge?—Luka 16:10.