NTANGU Moïse vandaka kuvutuka na Egypte, na nzila yandi kutanaka na mpangi na yandi Aaron. Yandi tubilaka yandi sambu na bidimbu ya nkumbwa. Ntangu bau zole kumonisaka bimpa yina na bana ya Israele, ata muntu mosi ve kutulaka ntembe nde Jéhovah vandaka na bau.

Na nima, Moïse na Aaron kwendaka na nzo ya Faraon mpi tubaka nde: ‘Jéhovah metuba mutindu yai: “Bika kikanda na mono kwenda kusambila mono na nseke bilumbu tatu.”’ Faraon kuvutulaka nde: ‘Mono kekwikila na Jéhovah ve mpi mono tabika ve nde bana ya Israele kukwenda.’

Faraon waka makasi sambu bana ya Israele zolaka kukwenda kusambila Jéhovah. Yandi kumisaka dyaka bisalu na bau mpasi mingi. Sambu na yau, bana ya Israele balukilaka Moïse, na kusongaka yandi nde yandi muntu mekumisa bampasi na bau ngolo. Kansi Jéhovah kupesaka bau kikesa mpi kusongaka bau nde: ‘Mono tapusa Faraon sambu yandi bika kikanda na mono kukwenda.’

Moïse na Aaron kuvutukaka dyaka na nzo ya Faraon. Aaron kulosaka nkawa na ntoto mpi yau kitukaka nyoka ya nene. Kansi bantu ya mayele ya Faraon kusalaka mpi mutindu mosi. Bau losaka mpi banti na bau mpi yau kitukaka banyoka. Kansi, nyoka ya Aaron yantikaka na kumina banyoka ya bantu ya Egypte. Ata mutindu yina, Faraon buyaka na kubika bana ya Israele.

Ntangu kumaka sambu Jéhovah kulonga Faraon. Keti beno zaba nki yandi salaka? Yandi pesaka bandola 10 na insi ya Egypte.

Na nima ya bandola mingi, Faraon vandaka kubinga Moïse mpi kutubila yandi nde: ‘Manisa ndola yai mpi mono tabikisa bana ya Israele.’ Kansi, kana ndola kumana, Faraon vandaka kuvutukila lukanu na yandi, na kubuyaka kubikisa bana ya Israele. Na yau, ntangu ndola ya 10 kubwaka, Faraon bikaka bana ya Israele.

Keti beto zaba bandola 10 yina yonso? Disolo ya kelanda kesonga beno yau.