KETI mbefo yai ya beno kemona na kifwanisu kemonisa beno ntantu? Zina na yandi Job. Nkento yina metelama na ntwala na yandi kele nkento na yandi. Nkento yina ketuba na Job nde: ‘Sawula Nzambi mpi fwa.’ Kansi, sambu na nki yandi ketubila Job mutindu yina mpi sambu na nki Job kunyokwama mutindu yai?

Job kuvandaka muntu ya kwikama yina vandaka kulemfuka na Jéhovah. Yandi vandaka kuzinga na Uz, kaka penepene ya insi Kana. Jéhovah vandaka kuzola Job mingi, kansi muntu mosi vandaka mbeni na yandi. Keti beno zaba nani?

Yau vandaka Satana Dyabulu, wanzyo ya mbi yina kumengaka Jéhovah. Yandi nungaka na kukusa Adamu mpi Eva na kukolama na Jéhovah mpi yandi yindulaka nde yandi tanunga na kukusa bantu yonso na kukolama na Jéhovah. Ya kyeleka yandi nungaka ve. Yindula dyaka bantu ya kwikama mingi yina beto tubilaka na balutiti yina meluta. Keti beno lenda tanga bazina na bau?

Jacob na Joseph kufwaka na insi ya Egypte. Na nima Job kubutukaka, yandi vandaka ya kwikama na Jéhovah, ya kuluta bantu yonso na ntoto ya mvimba. Na yau, Satana kunungaka ve na kukusa bantu yonso. Jéhovah tadisaka Job na Satana mpi songaka yandi nde: ‘Nge kemona nki mpila Job kezitisa mono.’

Satana vutulaka nde: ‘Yau kele sambu nge mepesa yandi bima mingi, mpi nge mesakumuna yandi. Tula diboko na nge na bima na yandi mpi nge tamona yandi tasawula nge.’

Jéhovah vutulaka nde: ‘Mambu ve. Mono kepesa nge kiyeka nge sala yonso nge mezola mpi beto tatala kana yandi tasawula mono, kansi kufwa yandi ve.’

Ntete Satana salaka nde bimpumbulu kwisa kuyiba bangombe, bampunda-buluku ya bankento, na bakamelo ya Job, mpi bau fwaka mameme na yandi. Na nima yandi fwaka bana na yandi 10 na mupepe ya ngolo. Na nsuka, Satana tulaka Job kimbefo ya mbi. Nkento ya Job kutubilaka yandi nde: ‘Sawula Nzambi mpi fwa.’ Job bikalaka kaka ngwi. Na nima, banduku tatu ya mbi kwisaka, mpi bau yantikaka na kutuba nde Job salaka mambu ya mbi. Kansi Job bikalaka kaka ya kwikama.

Mambu yina yonso kuyangidikaka Jéhovah, mpi na nima yandi sakumunaka Job. (Tala kifwanisu.) Nzambi belulaka yandi maladi na yandi ya mbi. Job butaka dyaka bana ya kitoko 10, mpi bangombe, mameme, bampunda-buluku, mpi bakamelo na yandi kukumaka mingi mbala zole kuluta yina ya ntete.

Keti beno tavanda ya kwikama na Jéhovah ntangu yonso bonso Job? Kana beno kangama kaka na Nzambi yandi tasakumuna beno mpi. Beno lenda zinga mvula na mvula awa na ntoto, ntangu yau takituka kitoko bonso kilanga ya Eden.