NZO yai kele inki? Yau kele nzo-tenta mesalama sambu na lusambu ya Jéhovah. Yau kebingama dyaka nkela ya busantu to tabernacle. Bana ya Israele manisaka yau na kutunga mvula mosi na nima ya kubasika na bau na insi ya Egypte.

Jéhovah yandi mosi vandaka kuzola nzo ya mutindu yai. Ntangu Moïse vandaka na ngumba ya Sinaï, Jéhovah songaka mpila ya tenta yina yandi vandaka kuzola. Yau fwete vanda tenta ya bau fwanaka kukatula mpi kunata yau konso kifulu. Yau salamaka mutindu yina. Bana ya Israele salaka nzo-tenta yina bau vandaka kukatula mpi kunata yau konso kifulu na bifulu yonso yina bau vandaka kukwenda na nseke.

Nzo-tenta yina vandaka na basuku zole. Na suku ya nsuka mpi ya fyoti vandaka sanduku yina vandaka na bawanzyo zole ya wolo na zulu. Yau vandaka sanduku ya ngwakana. Nzambi sonikaka dyaka Bansiku Kumi na matadi zole, sambu Moïse pasulaka yina ya ntete. Matadi yina bumbamaka mbote na kati ya sanduku ya ngwakana, na kisangala mosi ya manna. Manna kele inki? Keti beno kezaba yau dyaka?

Jéhovah solaka Aaron, mpangi ya Moïse bonso mbuta-nganga sambu na kusala kisalu ya bunganga sambu na mambote ya bantu. Bana na yandi vandaka banganga-Nzambi sambu na kusadisa yandi.

Suku yina yankaka vandaka ya nene kuluta suku yina ya nsuka. Yau vandaka na zikwa yina banganga-Nzambi vandaka kuyokila ndumbu (yau kele nkela yina ya fyoti kebasika midinga). Minda nsambwadi vandaka kupesa nsemo na suku yina. Kima ya tatu vandaka na kati na yau: mesa yina vandaka kukonda ve mampa 12 konso ntangu.

Na lweka ya nzo-tenta, kibansala mosi vandaka. Na kati ya kibansala yina, kuvandaka na dilonga mosi ya nene ya kufuluka na masa. Banganga-Nzambi vandaka kuyobila masa yina. Zikwa mosi mpi vandaka muna na zulu na yau bau vandaka kuyokila bambisi ya kutambikila kimenga na Jéhovah. Nzo-tenta vandaka na kikati-kati ya camp, mpi bana ya Israele vandaka na lweka na yau.