KETI beno zaba zina ya muntu ya kuluta ngolo na bantu yonso ya mezingaka awa na ntoto? Yandi kele zuzi Samson. Ngolo na yandi kukatukaka na Jéhovah. Na ntwala ya lubutuku ya Samson, Jéhovah tubaka na mama na yandi nde: ‘Nge tabuta mwana ya bakala. Yandi tagulusa bantu ya Israele na maboko ya bantu ya Filisti.’

Bantu ya Filisti vandaka bantu ya mbi yina vandaka kuzinga na insi ya Kana. Na kati na bau makesa ya mvita vandaka mingi mpi bau vandaka kuyangisa ngolo bantu ya Israele. Kilumbu mosi Samson kwendaka na nzo na bau, nkosi kwisaka na kungana yonso sambu na kufwa yandi. Kansi Samson kufwaka nkosi yina na maboko mpamba. Yandi fwaka mpi bantu mingi ya Filisti.

Na nima, Samson kuzolaka mwana-nkento mosi Dalila. Bamfumu ya Filisti lakaka konso muntu na kupesa Dalila ntalu ya bibende ya mbongo 1 100 kana yandi kusonga bau kinsweki ya ngolo ya Samson. Dalila kuvandaka kuzola mpenza ve Samson, to kikanda ya Nzambi. Bonso yandi vandaka kusosa na kuzaba kinsweki ya ngolo ya Samson, yandi yantikaka kuyufula yandi bangyufula konso kilumbu.

Na nsuka, Samson tendudilaka Dalila kinsweki ya ngolo na yandi. ‘Mono mezengisaka ntete ve nsuki na mono, sambu yantika lubutuku na mono, Nzambi solaka mono na kuvanda nsadi na yandi, Nazeleti. Kana bau kuzenga mono nsuki, mono tavanda dyaka ngolo ve.’

Na kumona nde Samson kuzabisaka yandi mambu yonso, Dalila tulaka Samson na makulu na yandi. Ebuna Samson lalaka. Mpi yandi bingaka bakala mosi sambu na kuzenga yandi nsuki. Ntangu Samson kutelamaka, yandi vandaka dyaka ve na ngolo. Bantu ya Filisti kukangaka yandi mpi bau tobulaka yandi meso. Yandi kumaka mpika na bau.

Kilumbu mosi, nkinsi ya nene vandaka sambu na nzambi Dagon; mpi bantu ya Filisti fulukaka mingi na nzo ya nene. Bau bingaka Samson sambu na kusala bansaka. Kansi, nsuki na yandi yelaka dyaka. Samson tubaka na mwana ya bakala yina vandaka kutambusa yandi nde: ‘Bika mono simba makunzi kesimba nzo.’ Na yau yandi lombaka Jéhovah na kupesa yandi dyaka ngolo. Na nima, yandi simbaka makunzi, mpi yandi bokaka nde: ‘Mono kefwa kisika mosi na bantu ya Filisti.’ Bantu ya Filisti 3 000 vandaka na nkinsi yina. Samson nikisaka na ngolo yonso mpi nzo kubwaka; yau nyefikaka bantu yonso ya vandaka na kati.