TALA mabundu ya bantu yai kenata. Tala nene ya kisuka ya mabundu ya fige. Yau melomba bantu zole sambu na kutula yau na mukambu. Mabundu yai ya kitoko mekatuka na wapi? Yau mekatuka na insi Kana. Yibuka nde Abraham, Isaac na Jacob kuzingaka na insi yina. Kansi sambu na nzala, Jacob na dibuta na yandi kwendaka na Egypte. Ntangu yai, na nima ya bamvula 216, Moïse nataka bana ya Israele na insi Kana. Awa bau kele na nseke ya Kades.

Bantu ya insi Kana vandaka bantu ya mbi. Yau yina Moïse tindaka bantu 12 sambu na kuzikisa insi yina. Yandi tubilaka bau nde: ‘Beno tala kana bantu kezinga kuna kele mingi mpi ngolo, mpi kana ntoto na bau kemenisaka bima to ve. Beno vila ve na kwisa kunata mabundu ya insi yina.’

Ntangu bau vutukaka na Kades, bantu 12 yina tubaka na Moïze nde: ‘Ya kyeleka, insi yina kele insi mosi ya kitoko.’ Tala mabundu ya beto menata. Kansi bantu 10 na kati na bau tubaka nde: ‘Bantu ya insi yina kele ngolo mingi. Kana beto kuyunsa na kubotula insi yina, beto takudifwisa.’

Na ndinga yina, bana ya Israele waka boma. Bau bokaka nde: ‘Mbote kana beto fwaka kwa beto na insi Egypte to na nseke yai. Beto tafwa beto yonso na mvita, bankento na beto na bana na beto takangama. Beto tula mfumu yankaka na kisika ya Moïse, mpi beto vutuka na Egypte!’

Kansi Josué na Kaleb vandaka kutula ntima na bau na Jéhovah. Bau yunsaka na kulembika bana ya Israele ntima. Bau tubaka nde: ‘Beno wa boma ve. Jéhovah kele na beto. Beto tabaka insi yina nswalu na maboko.’ Kansi bantu yina kuwilaka bau ve mpi nkutu bau zolaka kufwa bau.

Mambu yina yonso kupesaka Jéhovah makasi mingi. Yandi tubaka na Moïse nde: ‘Na bantu yina yonso, ata muntu mosi ve tamona insi Kana, yantika bantu ya mvula 20 tii kuna. Bau memona bimpa na mono na Egypte mpi bau ketula kivuvu na bau na mono ve. Bau tayungana na kati ya nseke bamvula 40, tii kuna bau yonso tafwa. Kaka Josué na Kaleb takota na insi Kana.’