MUNTU yai ya beno kemona kesambila awa mpi metanda mikanda na ntwala ya zikwa ya Jéhovah kele Ezekias, ntotila ya makanda zole ya sudi ya Israele. Na nsungi yina, ntotila Ezekias vandaka kutita. Beno zaba sambu na inki?

Sambu basoda ya Asyri kufwaka dezia makanda 10 ya nordi, mpi Jéhovah kotilaka bau ve sambu bau kumaka bantu ya mbi. Mpi ntangu yai basoda ya Asyri mekwisa kunwanisa kimfumu ya makanda zole ya sudi.

Ntotila ya Asyri tindaka mikanda na Ntotila Ezekias. Yau kele mikanda yina Ezekias kwendaka kutanda na ntwala ya Nzambi. Ntotila ya Asyri tubaka inki? Yandi sekaka Jéhovah mpi lombaka na bau nde bau kwenda kukota kimpika na yandi. Yau yina, Ezekias sambilaka mutindu yai: ‘O Jéhovah, gulusa beto na maboko ya ntotila ya Asyri. Ebuna, makanda yonso tazaba nde nge mosi kele Nzambi.’ Keti Jéhovah wilaka yandi?

Ezekias vandaka ntotila ya mbote. Yandi vandaka kufwanana ve na bantotila ya mbi ya kintinu ya makanda 10, to na tata na yandi, ntotila ya mbi Akaz. Yandi vandaka kutanina mbote minsiku yonso ya Nzambi. Yau yina, ntangu Ezekias manisaka na kusamba, mbikudi Esaïe tindilaka yandi mukanda yai: ‘Ntotila ya Asyri takota ve na Yerusaleme. Basoda na yandi tafinama ve mpi talosa ata ditolotolo mosi ve.’

Beno tala kifwanisu. Beto kemona bamvumbi ya basoda ya Asyri. Inki mambu kusalamaka? Jéhovah kotaka na kutindaka wanzyo na yandi yina kufwaka na mpimpa mosi basoda 185 000 ya Asyri. Ebuna ntotila ya Asyri katulaka camp mpi vutukaka na nsi na yandi.

Kintinu ya makanda zole gulukaka, mpi bantu na yau zingaka na ngemba bilumbu mingi. Na nima Ezekias fwaka mpi mwana na yandi Manasé yingaka yandi. Manasé na mwana na yandi Amon, bayina yingaka Ezekias vandaka bantotila ya mbi. Sambu na yau, insi kotaka dyaka na mavwanga. Amon fwaka mpi mwana na yandi Jozias kotaka na kimfumu.