MWANA-NKENTO ya beno kemona awa kele na bamvula 12. Yezu kesimba diboko na yandi mpi bibuti na yandi kele na kyese mingi. Inki mambu mesalama?

Tata ya mwana-nkento zina na yandi Jaïrus. Yandi vandaka muntu ya nene. Kilumbu mosi, mwana na yandi belaka. Bau tulaka yandi na mbeto, kansi mwana vandaka beluka ve, maladi kumaka ngolo. Jaïrus na nkento na yandi kudibanza-banzaka na ntima sambu mwana na bau kumaka penepene na lufwa. Bau vandaka kaka na mwana mosi yai. Ebuna Jaïrus, yina kuwaka mutindu Yezu vandaka kusala bimpa, kwendaka kusosa yandi.

Ntangu yandi monaka Yezu, kibuka ya nene kuzyungaka yandi. Kansi Jaïrus kangulaka nzila, mpi yandi kumaka tii kisika ya Yezu. Yandi bwaka na makulu ya Yezu mpi tubaka nde: ‘Mwana na mono kele penepene na kufwa. Kwisa gulusa yandi.’ Yezu kwendaka kumosi na yandi.

Ntangu bau vandaka kukwenda, bantu mingi vandaka na lweka na yandi. Na mbala mosi, Yezu telamaka mpi tubaka nde: ‘Nani mesimba mono?’ Yezu waka ngolo basikaka na nitu na yandi yau yina yandi zabaka nde muntu mosi kusimbaka yandi. Yau vandaka nkento mosi ya vandaka kubela yantika bamvula 12: Yandi simbaka bilele ya Yezu mpi na mbala mosi, yandi belukaka!

Kidimbu ya nkumbwa yina kumisaka Jaïrus kikesa. Kansi, muntu mosi kwisaka mpi tubaka nde: ‘Kuyangisa dyaka ve Yezu, mwana na nge mefwa.’ Yezu waka mambu yina, mpi tubilaka Jaïrus nde: ‘Kuwa boma ve, kwikila kaka ebuna mwana na nge tabeluka.’

Ntangu bau kumaka na nzo ya Jaïrus, Yezu monaka bantu kedila. Yandi tubilaka bau nde: ‘Beno bika na kudila. Mwana ya nkento mefwa ve, yandi kelala kaka.’ Kansi bau sekaka yandi sambu bau zabaka nde mwana ya nkento mefwa.

Ebuna Yezu kotaka na bibuti na bantumwa na yandi tatu na suku yina bau tulaka mwana. Yandi simbaka mwana na maboko mpi tubaka nde: ‘Telama!’ Na mbala mosi, mwana futumukaka, yandi telamaka, mpi yandi yantikaka na kutambula! Tata na mama na yandi waka kyese ya mingi kibeni.

Yandi vandaka muntu ya kufwa ya ntete ve yina Yezu futumunaka. Bible ketubila beto nde muntu ya ntete ya Yezu futumunaka vandaka mwana ya bakala ya mufwidi ya mbanza Naïn. Na nima, Yezu futumunaka mpi Lazare, mpangi ya Marthe mpi ya Maria. Na luyalu yina ya Nzambi metulaka yandi ntotila, yandi tafutumuna bantu mingi kibeni yina mefwaka. Yai kele nsangu ya mbote kibeni yina kepesa kyese!