BENO lenda kutuba nki mwana ya nkento yai ya fyoti na bampangi na yandi zole ke tanga? Yau kele kaka mukanda yai: Mukanda ya Bankenda ya Bible. Beto mekuma na nkenda na beto ya nsuka yina ketuba nde: “Nani tabaka luzingu ya mvula mvula?”

Inki beto fwete sala sambu na kubaka luzingu ya mvula na mvula? Ntete, beto fwete zaba Nani kele Jéhovah na Mwana na yandi Yezu. Bible ketuba nde: ‘Tala mpila ya kubaka luzingu ya mvula na mvula: kulonguka na kuzaba Nzambi mosi kaka ya kyeleka mpi Mwana na yandi Yezu Kristu.’

Kansi, inki mpila beto lenda zaba Nzambi na Yezu Kristu? Beto tasengumuna mpila bau kele na kutangaka mukanda yai banda luyantiku tii na nsuka. Mukanda yai kemonisa beto mambu mingi ya metala Jéhovah mpi Yezu. Yau kezabisa beto mambu bau mesala mpi yina bau tasala dyaka. Kansi, beto fwete suka kaka ve na kutanga mukanda yai.

Beno kemona mukanda yankaka yai bau metulula na ntoto? Yau kele Bible. Keti bau metangila beno bitini ya Biblia kisika bankenda na beto ya mukanda yai mekatuka? Bible kelonga beto mambu yonso ya beto kele na yau mfunu sambu na kusadila Jéhovah na kulandaka luzolo na yandi mpi sambu na kubaka luzingu ya mvula na mvula. Na yau, beto vanda na kikalulu ya kutanga yau konso mbala.

Kansi nzailu ya Jéhovah na ya Yezu Kristu melunga ve. Beto lenda kuzaba mambu mingi yina metala bau mpi malongi na bau kansi beto kubaka ve luzingu ya mvula na mvula. Inki beto fwete sala dyaka?

Beto fwete wakanisa luzingu na beto ti mambu yina beto kelonguka. Beno keyindula dyaka Judas Iscariote? Yandi vandaka na kati ya bantumwa 12 ya Yezu. Yandi zabaka mambu mingi ya metala Jéhovah mpi Yezu. Kansi, inki mambu kubwilaka yandi? Na nima ya bamvula, yandi kumaka na nzala ya mbongo mpi yandi sukaka na kuteka Yezu na bambeni na yandi sambu na bibende 30 ya mbongo. Judas tabaka ve luzingu ya mvula na mvula.

Beno keyindula Gehazi? Nkennda ya 69 ketuba sambu na yandi. Yandi zolaka bima ya ngani mpi yandi waka ve boma na kukusa sambu na kubaka yau. Jéhovah pesaka yandi ndola. Yandi tapesa beto mpi ndola kana beto buya na kulemfuka na bansiku na yandi.

Kansi, kele na bantu mingi yina kusadilaka Nzambi na mutindu ya mbote, bonso Samuel. Yandi vandaka na mvula iya to tanu ntangu yandi yantikaka kusadila Jéhovah na tempelo. Beto monaka yo na Nkenda ya 55. Na yau, ata beno kele bana ya fyoti, beno lunga sadila Jéhovah.

Beto fwete tuba nde Yezu kele mbandu na beto yonso. Ntangu yandi vandaka na tempelo, mutindu Nkenda ya 87 ke monisa yo, Yezu kutitaka ve na kutuba sambu na Tata na yandi na zulu. Beto landa mbandu na yandi. Na yau beto samuna mambu yonso ya beto mezaba na yina metala Jéhovah Nzambi mpi Mwana na yandi Yezu Kristu mpi beto tita ve. Kana beto sala mutindu yina, beto tabaka luzingu ya mvula na mvula na kati ya paladisu ya mpa yina Nzambi tatula na ntoto.