Ntangu nge vandaka kutanga kamukanda yai, ntembe kele ve nde nge yitukaka na kumona nde mambu yina Biblia ke tubaka ke wakanaka kibeni ti mambu ya siansi! Bantu mingi ke yitukaka mpi. Bo yonso ke yitukaka na kumona nde mambu ya nkaka yina mabundu mingi ke longaka ke katukaka ve na Biblia. Mu mbandu, bantu ya nkaka ke longaka nde Biblia ke tubaka nde Nzambi salaka zulu ti ntoto mpi bima yonso ya ke zingaka na zulu na yo kaka na bilumbu sambanu ya bangunga 24. Kansi, ata verse mosi ve ya Biblia ke buyaka bangindu ya mutindu na mutindu yina bantu ya siansi ke pesaka sambu na bamvula yina zulu ti ntoto (Univers) me salaka. *

Diaka, mpila Biblia ke tubilaka na bunkufi mutindu Nzambi salaka luzingu awa na ntoto, ke bikilaka beto ntangu ya kulonguka mpi ya kutadila diaka bansosa mpi malongi ya nkaka ya siansi. Biblia ke tubaka nde Nzambi salaka luzingu mpi bima yonso ya ke zingaka na “kutadila mitindu na yo.” (Kuyantika 1:11, 21, 24) Bantangu ya nkaka, mambu yai ya Biblia ke tubaka ke wakanaka ve ti malongi ya nkaka ya siansi kansi yo ke wakanaka kaka ti mambu ya siansi ya kele ti banzikisa ya kieleka. Istware ya siansi ke monisa nde malongi ya siansi ke basikaka mpi yo ke lutaka kansi banzikisa ya kieleka ya siansi ke lutaka ve ata fioti.

Bantu mingi ke zolaka ve kulonguka mambu ya Biblia sambu mambu yina mabundu ke salaka ke lembisaka bo nitu. Mu mbandu, bo ke monaka mambu ya mbi mpi ya luvunu na mabundu mpi mutindu yo ke pusaka bantu na kunwana bitumba. Ata mpidina, keti yo kele mbote na kutuba mambu ya mbi sambu na Biblia kaka sambu bantu ya ke tubaka nde bo ke sadilaka malongi na yo ke salaka mambu ya mbi? Bantu mingi ya siansi ya kele ntima-mbote mpi masonga, ke kudiyangisaka mingi ntangu bo ke monaka mutindu bantu ya nkaka ya mubulu mpi bayina ke zolaka ve bantu ya nkaka ke sadilaka dilongi ya evolisio sambu na kumenga bantu yina kele ve mpusu ya nitu mosi ti bo. Keti yo ta vanda mbote na kutuba mambu ya mbi sambu na dilongi ya evolisio kaka sambu na mambu ya mbi yina bantu ya ke kwikilaka na yo ke salaka? Ya kieleka, yo ta vanda mbote na kusosa kuzaba mambu yina dilongi ya evolisio ke tubaka mpi kufwanisa yo ti banzikisa ya kieleka.

Beto ke lomba nge na kusala mpi mutindu mosi sambu na Biblia. Nge ta yituka kibeni na kubakisa nde malongi ya Biblia me swaswana mpenza ti mambu yina mabundu mingi ke longaka. Biblia ke pusaka ve ata fioti bantu na kunwana bitumba  mpi yo ke pusaka ve dikanda mosi na kumenga dikanda ya nkaka kansi yo ke tubaka nde bansadi ya Nzambi fwete buya kunwana mpi kubuya nkutu kimpala yina ke pusaka bantu na kusala mambu yai ya mbi. (Yezaya 2:2-4; Matayo 5:43, 44; 26:52) Biblia ke songaka beto ve ata fioti na kuvanda bindima-ndima na mambu yina kele ve ti banzikisa ya kieleka. Yo ke tubaka nde sambu na kusadila Nzambi beto fwete sadila mayele na beto ya kuyindula mpi sambu na kukuma ti lukwikilu ya kieleka, beto fwete vanda ti banzikisa ya kieleka. (Baroma 12:1; Baebreo 11:1) Biblia ke buyisaka beto ve ata fioti na kuvanda ti nzala ya kusosa kuzaba konso kima. Kansi yo ke lombaka beto na kutadila diaka mbote-mbote bangiufula ya kuluta mfunu mpi ya kuluta mpasi yina bantu mingi ke kudiyulaka.

Mu mbandu, keti nge me kudiyulaka dezia nde, ‘Kana Nzambi kele mpenza, ebuna sambu na nki yandi ke bikaka nde mambu ya mbi kusalama?’ Biblia ke pesaka mvutu ya mbote na ngiufula yai mpi na bangiufula mingi ya nkaka. * Beto ke lomba nge na kuyambula ve na kusosa kuzaba malongi ya kieleka. Mpidina, nge ta zwa bamvutu ya mbote, yina ta sepedisa nge mpi yina kele ti banzikisa ya kieleka. Ya kieleka, Biblia mpi me kudibasikilaka ve.