1. Inki ngiufula nge lenda kudiyula na nima ya kulonguka mbote-mbote mukanda yai?

NTANGU nge me longuka mukanda yai, nge me bakisa mambu mingi ya kieleka yina kele na Biblia mu mbandu, lusilu ya Nzambi na yina me tala luzingu ya mvula na mvula, mambu yina ke kuminaka muntu kana yandi me fwa, mpi kivuvu ya lufutumuku. (Longi 9:5; Luka 23:43; Yoane 5:28, 29; Kusonga 21:3, 4) Ziku nge ke kwendaka na balukutakanu ya Bambangi ya Yehowa mpi nge ke ndimaka nde bo ke salaka mambu yina dibundu ya  kieleka ke lombaka. (Yoane 13:35) Mbala ya nkaka bangwisana na nge ti Yehowa me yantika kukuma ngolo mpi nge me baka lukanu ya kusadila yandi. Yo yina, nge lenda kudiyula nde: ‘Ntangu yai, inki mono fwete sala sambu na kusadila Nzambi?’

2. Sambu na nki muntu mosi ya Etiopia ndimaka kubaka mbotika?

² Muntu mosi ya Etiopia yina zingaka na bilumbu ya Yezu kudiyulaka ngiufula yai. Ntangu fioti na nima ya lufutumuku ya Yezu, longoki na yandi mosi zina na yandi Filipo longaka muntu ya Etiopia. Filipo pesaka yandi banzikisa yina vandaka kumonisa nde Yezu kele Mesia. Mambu yina muntu ya Etiopia longukaka simbaka kibeni ntima na yandi, yo yina yandi tubaka mbala mosi nde: “Tala! Masa yo yai; inki ke kanga mono nzila na kubaka mbotika?”—Bisalu 8:26-36.

3. (a) Inki nsiku Yezu pesaka balongoki na yandi? (b) Inki mutindu bo fwete botika muntu?

³ Biblia ke longa pwelele nde kana nge ke zola kusadila Yehowa, nge fwete baka mbotika. Yezu songaka balongoki na yandi nde: “Beno kumisa bantu ya makanda yonso balongoki, beno botika bo.” (Matayo 28:19) Yezu mpi pesaka mbandu mutindu yandi mosi bakaka mbotika. Bo mwangilaka yandi ve mwa masa na ntu, kansi bo dindisaka yandi ya mvimba na masa. (Matayo 3:16) Bubu yai mpi, kana muntu ke zola kubaka mbotika, bo fwete kotisa to kudindisa yandi ya mvimba na masa.

4. Inki nge ta monisa na bantu ya nkaka kana nge baka mbotika?

⁴ Kana nge baka mbotika, nge ta monisa na bantu ya nkaka nde nge ke zola kibeni kukuma nduku ya Nzambi mpi kusadila yandi. (Nkunga 40:7, 8) Yo yina, nge lenda kudiyula nde: ‘Inki mono fwete sala sambu na kubaka mbotika?’

5. (a) Na ntwala nde nge baka mbotika, inki nge fwete sala ntete? (b) Sambu na nki balukutakanu ya Bukristu kele mfunu?

⁵ Na ntwala nde nge baka mbotika, nge fwete zaba Yehowa ti Yezu. Nge yantikaka kusala yo ntangu nge vandaka kulonguka Biblia. (Tanga Yoane 17:3.) Ata mpidina, yo me suka pana ve. Biblia ke tuba nde nge fwete “fuluka ti nzayilu ya sikisiki” ya luzolo ya Yehowa. (Bakolosai 1:9) Kana nge ke kwenda na balukutakanu ya Bambangi ya Yehowa, kinduku na nge ti Yehowa ta kuma ngolo. Yo kele kikuma ya mfunu yina fwete pusa nge na kukwendaka na balukutakanu yina mbala na mbala.—Baebreo 10:24, 25.

6. Inki mambu nge fwete zaba na Biblia na ntwala nde nge baka mbotika?

⁶ Ya kieleka, Yehowa ke lomba nge ve na kuzaba mambu yonso ya kele na Biblia na ntwala nde nge baka mbotika. Yandi lombaka ve muntu ya Etiopia nde yandi zaba mambu yonso na ntwala nde yandi baka mbotika. (Bisalu 8:30, 31) Diaka, beto ta landa kulonguka mambu ya me tala Nzambi kimakulu. (Longi 3:11) Kansi sambu na kubaka mbotika, nge fwete zaba mpi kundima malongi ya luyantiku ya Biblia.—Baebreo 5:12.

7. Inki mutindu kulonguka na nge ya Biblia me sadisa nge?

⁷ Biblia ke tuba nde: “Kukonda lukwikilu muntu lenda pesa ve Nzambi kiese.” (Baebreo 11:6) Yo yina, nge fwete vanda ti lukwikilu na ntwala ya kubaka mbotika. Biblia ke tuba nde bantu ya nkaka yina zingaka na mbanza ya Korinto waka mambu yina balongoki ya Yezu vandaka kulonga, yo yina bo “yantikaka kukwikila mpi bo bakaka mbotika.” (Bisalu 18:8) Mutindu mosi, kulonguka na nge ya Biblia me sadisa nge na kuvanda ti lukwikilu na balusilu ya Nzambi mpi na ngolo ya kimenga ya Yezu, yina lenda gulusa beto na disumu mpi na lufwa.—Yozue 23:14; Bisalu 4:12; 2 Timoteo 3:16, 17.

8. Inki ta pusa nge na kuzabisa bantu ya nkaka mambu ya nge me longuka?

⁸ Kana nge longuka mambu mingi na Biblia mpi nge mona mutindu yo ke sadisa nge na luzingu, lukwikilu na nge ta kuma ngolo. Nge ta kuma ti mpusa ya kuzabisa bantu ya nkaka mambu yina nge ke longuka. (Yeremia 20:9; 2 Bakorinto 4:13) Kansi, nge fwete zabisa yo na banani?

9, 10. (a) Banani nge lenda yantika kuzabisa mambu yina nge me longuka? (b) Inki nge fwete sala kana nge ke zola kusamuna ti dibundu?

⁹ Nge lenda zabisa mambu yina nge ke longuka na bantu ya dibuta na nge, na banduku na nge, na bantu ya ke zingaka ti nge kisika mosi, mpi na bantu ya nge ke salaka ti bo. Kusala mpidina kele mbote, kansi nge fwete sala yo ntangu yonso na mawete mpi na zola. Na nima, nge lenda yantika kusamuna ti dibundu. Kana nge me mona nde nge me fwana, nge lenda solula ti Mbangi ya Yehowa yina ke longaka nge Biblia. Nge lenda zabisa yandi nde nge ke zola kusamuna ti dibundu. Kana yandi me mona nde nge me fwana mpi nge ke zingaka na kuwaka ti minsiku ya Biblia, nge ti yandi, beno ta kwenda kusolula ti bankuluntu zole ya dibundu.

¹⁰ Inki mambu beno ta solula ti bo? Bankuluntu yina ta solula ti nge sambu na kuzaba kana nge ke bakisa malongi ya luyantiku ya Biblia mpi ke kwikila na yo, kana nge ke lemfuka na mambu yina Biblia ke tuba, mpi kana nge ke zola kibeni kukuma Mbangi ya Yehowa. Kuvila ve nde bankuluntu ke kebaka bampangi yonso ya dibundu, bo ta kebaka nge mpi. Yo yina, kuwa ve boma ya kusolula ti bo. (Bisalu 20:28; 1 Piere 5:2, 3) Kana beno manisa kusolula, bankuluntu ta zabisa nge kana nge lenda yantika kusamuna ti dibundu to ve.

11. Sambu na nki yo kele mfunu mingi nde nge sala bansoba na ntwala ya kusamuna ti dibundu?

 ¹¹ Bankuluntu lenda songa nge nde nge fwete sala bansoba mingi na ntwala ya kuyantika kusamuna ti dibundu. Sambu na nki yo kele kibeni mfunu nde nge sala bansoba yina? Sambu ntangu beto ke zabisaka bantu ya nkaka mambu ya me tala Nzambi, beto ke monisaka Yehowa, yo yina beto fwete zinga na mutindu yina ke pesaka yandi lukumu.—1 Bakorinto 6:9, 10; Bagalatia 5:19-21.

12. Sambu na nki beto yonso fwete balula ntima?

¹² Nge fwete sala kima ya nkaka na ntwala ya kubaka mbotika. Ntumwa Piere tubaka nde: “Beno balula ntima mpi beno baluka sambu bo vwansa masumu na beno.” (Bisalu 3:19) Kubalula ntima ke tendula nki? Yo ke tendula kuwa mawa ya ngolo sambu na konso kima ya mbi yina beto salaka. Mu mbandu, kana nge vandaka kusala pite, nge fwete balula ntima. Ata nge ke salaka bikesa luzingu na nge ya mvimba sambu na kusala mambu ya mbote, yo ke lomba nde nge balula ntima sambu beto yonso ke salaka masumu mpi beto fwete lomba Nzambi ndolula.—Baroma 3:23; 5:1.

13. ‘Kubaluka’ ke tendula nki?

¹³ Keti nge fwete suka kaka na kuwa mawa sambu na mambu yina nge salaka? Ve. Piere tubaka mpi nde nge fwete “baluka.” Yo ke tendula nde nge fwete yambula konso kikalulu ya mbi yina nge vandaka ti yo mpi kuyantika kusala mambu ya mbote. Beto baka mbandu mosi: Yindula nde nge ke kwenda kisika yina nge me kumaka ntete ve. Na nima ya mwa ntangu, nge me bakisa nde nge ke kwenda na nzila ya mbi. Nge ta sala nki? Ntembe kele ve nde, nge ta yambula kutambula, nge ta baluka mpi  ta baka nzila ya mbote. Mutindu mosi, ntangu nge ke longuka Biblia, nge lenda bakisa nde nge fwete soba bikalulu to mambu ya nkaka na luzingu na nge. Vanda ti luzolo ya ‘kubaluka,’ disongidila kusala bansoba ya me fwana mpi na nima kuyantika kusala mambu ya mbote.

14. Inki mutindu nge lenda kudipesa na Nzambi?

¹⁴ Kima ya nkaka ya mfunu yina nge fwete sala na ntwala ya kubaka mbotika kele kudipesa na Yehowa. Sambu na kudipesa na Yehowa, nge fwete sala kisambu yina nge ke sila yandi nde nge ta sambilaka kaka yandi mpi nde luzolo na yandi ta vandaka kima ya mfunu mingi na luzingu na nge.—Kulonga 6:15.

15, 16. Inki ke pusaka muntu na kudipesa na Nzambi?

¹⁵ Kana nge me sila Yehowa na kusadila yandi yo kele bonso nge me sila muntu mosi ya nge ke zolaka nde nge ta lutisa luzingu na nge ya mvimba ti yandi. Yindula nde bakala mosi me yantika kutalana ti nkento mosi sambu na makwela. Ntangu bakala yina me zaba nkento yina mbote-mbote, yandi ta zola yandi mpi ta ndima kukwela yandi. Ata yo kele lukanu ya nene yina yandi fwete baka, yandi ta ndima mukumba na yandi na luzolo yonso sambu yandi ke zola nkento yina.

¹⁶ Kana nge ke longuka mambu ya Yehowa, nge ta kuma kuzola yandi mpi nge ta sala yonso sambu na kusadila yandi. Yo ta pusa nge na kusamba yandi sambu na kusila yandi nde nge ta sadila yandi. Biblia ke tuba nde konso muntu yina ke zola kulanda Yezu fwete “kudibuya.” (Marko 8:34) Yo ke tendula nki? Yo ke tendula nde bulemfu na nge sambu na Yehowa ta vanda na kisika ya ntete. Mambu yina Yehowa ke zolaka kele mfunu mingi kuluta bampusa mpi balukanu na nge mosi.—Tanga 1 Piere 4:2.

17. Sambu na nki bantu ya nkaka ke buyaka kudipesa na Yehowa?

¹⁷ Bantu ya nkaka ke buyaka kudipesa na Yehowa sambu bo ke waka boma nde bo ta kuka ve kulanda kulungisa lusilu ya kusadila yandi. Bo ke zolaka ve kupesa Yehowa mpasi, to bo lenda yindula nde kana bo me kudipesa ve na Yehowa, yandi ta sambisa bo ve sambu na mambu yina bo ke salaka.

18. Inki ta sadisa nge na kununga boma ya kuyindula nde nge ta pesa Yehowa mpasi?

¹⁸ Zola na nge sambu na Yehowa ta sadisa nge na kununga boma ya kuyindula nde nge ta pesa yandi mpasi. Sambu nge ke zolaka yandi, nge ta sala yonso sambu na kulanda kulungisa lusilu yina nge silaka yandi. (Longi 5:4; Bakolosai 1:10) Nge ta mona ve nde kusala luzolo ya Yehowa kele mpasi kibeni. Ntumwa Yoane sonikaka nde: “Zola ya Nzambi ke tendula nde beto zitisa bansiku na yandi; nkutu bansiku na yandi kele kilo ve.”—1 Yoane 5:3.

19. Sambu na nki nge fwete wa ve boma ya kudipesa na Yehowa?

¹⁹ Yo ke lomba ve nde nge vanda muntu ya kukuka sambu nge kudipesa na Yehowa. Yandi ke lombaka beto ve ata fioti na kusala mambu yina beto ta kuka ve. (Nkunga 103:14) Yandi ta sadisa nge na kusala mambu ya mbote. (Yezaya 41:10) Tula ntima na nge ya mvimba na Yehowa, ebuna “yandi ta katula basakuba na banzila na nge.”—Bingana 3:5, 6.

20. Inki nge fwete sala na nima ya kudipesa na Nzambi?

²⁰ Keti nge ke yindula nde nge lenda kudipesa ntangu yai na Yehowa? Na nima ya kudipesa na Yehowa, kele ti kima ya nkaka yina nge fwete sala. Nge fwete baka mbotika.

21, 22. Inki mutindu nge lenda “zabisa [lukwikilu na nge] na meso ya bantu”?

 ²¹ Zabisa mutambusi ya kimvuka ya bankuluntu ya dibundu na beno nde nge me kudipesa dezia na Yehowa mpi nde nge ke zola kubaka mbotika. Ebuna, yandi ta lomba bankuluntu ya nkaka na kutadila diaka ti nge malongi ya luyantiku ya Biblia. Kana bo me mona nde nge me fwana na kubaka mbotika, bo ta zabisa nge nde nge ta  baka mbotika na lukutakanu ya nziunga to ya distrike ya Bambangi ya Yehowa yina bo ta sala na bilumbu ke kwisa. Na lukutakanu yango, bo ta sala diskure mosi yina ta pesa ntendula ya mbotika. Ebuna, muntu yina ta sala diskure ta yula bantu yina ke zola kubaka mbotika bangiufula zole ya pete. Ntangu nge ke pesa mvutu na bangiufula yina, nge ke “zabisa [lukwikilu na nge] na meso ya bantu.”—Baroma 10:10.

²² Na nima, nge ta baka mbotika. Bo ta dindisa nge ya  mvimba na masa. Mbotika ta monisa na bantu yonso nde nge kudipesaka na Yehowa mpi ntangu yai nge me kuma Mbangi na yandi.

23. Kubaka mbotika “na zina ya Tata mpi ya Mwana mpi ya mpeve santu” ke tendula nki?

²³ Yezu tubaka nde balongoki na yandi ta baka mbotika “na zina ya Tata mpi ya Mwana mpi ya mpeve santu.” (Tanga Matayo 28:19.) Yo ke tendula nki? Yo ke tendula nde nge ke ndima kiyeka ya Yehowa, kisalu ya Yezu na lukanu ya Nzambi, mpi mutindu Nzambi ke sadilaka mpeve santu na yandi sambu na kulungisa luzolo na yandi.—Nkunga 83:18; Matayo 28:18; Bagalatia 5:22, 23; 2 Piere 1:21.

24, 25. (a) Mbotika ke tendula nki? (b) Inki beto ta longuka na kapu yina ke landa?

²⁴ Mbotika ke tendulaka kima mosi ya mfunu kibeni. Kana bo me dindisa nge na masa, yo ke tendula nde nge me fwa to nge me yambula luzingu na nge ya ntama. Kana nge me basika na masa, yo ke tendula nde nge me yantika luzingu ya mpa sambu na kusala luzolo ya Nzambi. Yo ke monisa nde yantika ntangu yai, nge ta sadilaka Yehowa. Yibuka nde nge kudipesaka ve na muntu mosi, na kimvuka mosi, to na kisalu mosi. Kansi nge pesaka luzingu na nge na Yehowa.

²⁵ Kudipesa na nge ta sadisa nge na kukumisa kinduku na nge ti Yehowa ngolo. (Nkunga 25:14) Yo ke tendula ve nde nge ta guluka kaka sambu nge me baka mbotika. Ntumwa Polo sonikaka nde: “Beno landa kusala ngolo sambu na luguluku na beno mosi ti boma mpi matekita.” (Bafilipi 2:12) Mbotika kele kaka luyantiku. Kansi nki mutindu nge lenda bikala pene-pene na Yehowa? Kapu ya nsuka ya mukanda yai ta pesa mvutu na ngiufula yai.