“Yo lombaka nde . . . beno vanda balongi.” (Baeb. 5:12) Yo kele lukumu kibeni mutindu Yehowa, Longi ya kuluta nene ya zulu ti ntoto, ke lomba beto na kulonga bantu mambu na yandi! Kulonga kieleka ya me tala Yehowa na dibuta, na dibundu to na kisalu ya kusamuna kele mukumba ya nene mpi lukumu kibeni. Inki mutindu beto lenda lungisa yo?

Mvutu kele na bangogo yai ya ntumwa Polo sonikilaka Timoteo: “Landa kudipesa na kutanga na meso ya bantu, na kusiamisa, mpi na kulonga.” Yandi yikaka nde: “Kana nge ke sala yo, nge ta kudigulusa mpi nge ta gulusa bantu yina ke widikila nge.” (1 Tim. 4:13, 16) Nge kele ti nsangu ya ke gulusaka, yo yina nge fwete sala ngolo na kuyedisa mayele na nge ya kutanga mpi ya kulonga. Bo me basisa kamukanda yai sambu na kusadisa nge na kulungisa lukanu yai. Beto tadila mwa mambu ya mfunu ya kele na kati.

Yehowa kele ‘Longi ya Nene.’ (Yez. 30:20) Kamukanda yai ta sadisa nge na kuyedisa mayele na nge ya kutanga mpi ya kulonga, kansi kuvila ve nde Yehowa kele Munkwa ya malongi ya beto ke longaka mpi yandi muntu ke bendaka bantu na dibundu na yandi. (Yoa. 6:44) Yo yina, sambaka mingi sambu na kulomba mpeve santu. Sadila Ndinga ya Nzambi mbala na mbala. Benda dikebi ya bantu na Yehowa kansi na kimuntu na nge ve. Sala ngolo na kusadisa bawi na nge na kuzola Yehowa mingi.

Nsangu ya nge ke longaka kele nsangu ya mfunu mingi. Beto ke ndima nde “ngolo yina Nzambi ke pesaka” ta sadisa nge na kusala mbote kisalu yai.—1 Pie. 4:11.

Banduku na beno ya kisalu,

Nto-Kimvuka ya Bambangi ya Yehowa