Bampangi Balongi ya Nsangu ya Mbote:

Yindula nde nge kele ntumwa mpi nge me telama ti bantumwa ya nkaka na Ngumba ya Banti ya Olive. Yezu me basikila beno. Kaka na ntwala nde yandi tombuka na zulu, yandi me tuba nde: “Beno ta baka ngolo ntangu mpeve santu ta kwisa na zulu na beno, mpi beno ta vanda bambangi na mono na Yeruzalemi, na Yudea yonso mpi na Samaria, mpi tii na kisika ya kuluta ntama ya ntoto.” (Bis. 1:8) Inki mutindu nge ke kudiwa?

Mbala ya nkaka sambu kisalu kele mingi, yo ke lutila nge mpi nge me kudiyula nde, ‘Inki mutindu balongoki yai fioti ta longa nsangu ya mbote “tii na kisika ya kuluta ntama ya ntoto”?’ Mbala ya nkaka nge ke yibuka mambu yai ya Yezu tubaka na mpimpa na ntwala nde bo fwa yandi: “Mpika me luta ve mfumu na yandi. Kana bo monisaka mono mpasi, bo ta monisa beno mpi mpasi; kana bo zitisaka ndinga na mono, bo ta zitisa mpi ndinga na beno. Kansi bo ta sala beno mambu yai yonso sambu na zina na mono, sambu bo me zaba ve muntu yina tindaka mono.” (Yoa. 15:20, 21) Ntangu nge ke yindula mambu yai, nge me kudiyula nde: ‘Inki mutindu mono lenda longa mbote-mbote nsangu ya mbote ntangu bantu ke telemina mono mpi ke niokula mono?’

Bubu yai, beto ke kudiyulaka mpi bangiufula yai. Mutindu mosi mpi, mukumba na beto, Bambangi ya Yehowa, ke vandaka ya kulonga mbote-mbote nsangu ya mbote “tii na kisika ya kuluta ntama ya ntoto” na “bantu ya makanda yonso.” (Mat. 28:19, 20) Inki mutindu beto lenda sala kisalu yai, mingi-mingi, ntangu bantu ke niokula beto?

Mukanda ya Bisalu ya Bantumwa ke tela beto disolo ya kitoko ya ke monisa mutindu Yehowa sadisaka bantumwa mpi Bakristu ya nkaka ya bilumbu na bo na kusala kisalu ya kulonga nsangu ya mbote. Bo me sala mukanda yai sambu yo sadisa nge na kulonguka mambu mingi ya kuminaka Bakristu ya ntete mpi sambu nge wa kiese yina bo waka ntangu bo monaka mutindu kisalu ya kulonga nsangu ya mbote vandaka kukwenda na ntwala. Nge ta yituka na kumona kuwakana ya ngolo ya kele na kati ya bansadi ya Nzambi na bilumbu ya Bakristu ya ntete mpi na bilumbu na beto. Nge ta bakisa nde kuwakana yango ke tadila kisalu ya kulonga nsangu ya mbote mpi mutindu na beto ya kuyidika mambu sambu na kusala kisalu yai. Kana nge tadila mbote-mbote kuwakana yai, yo ta ndimisa nge diaka nde Yehowa Nzambi ke landa kutwadisa kitini ya organizasio na yandi ya kele na ntoto.

Beto ke samba mpi ke ndima nde kulonguka ya mukanda ya Bisalu ta pusa nge na kutula diaka ntima nde Yehowa ta sadisa nge mpi ta pesa nge mpeve santu na yandi sambu nge kanga ntima na bampasi. Bika nde malongi ya mukanda yai kupusa nge na kulanda ‘kulonga mbote-mbote nsangu ya mbote ya Kimfumu ya Nzambi’ mpi na kusadisa bantu ya nkaka na kuzaba Yehowa sambu bo baka luzingu ya mvula na mvula.​—Bis. 28:23; 1 Tim. 4:16.