Na Bampangi na Beto ya Zola ya Babakala mpi ya Bankento:

Nimero ya bantu yonso ya Nzozulu ya Nkengi ya Yanuari 1, 2008, monisaka beto masolo ya kulandana ya mpa yina vandaka na ntu-diambu “Landa Mbandu ya Lukwikilu na Bo.” Banda ntangu yina, masolo ya mpa ya kulandana vandaka kubasika na nima ya konso bangonda tatu mpi yo sepedisaka beto mingi kibeni!

Inki mambu batangi tubaka sambu na yo? Na nima ya kumanisa kutanga disolo ya ke tubila Marta, mutangi mosi sonikaka nde: “Mono sekaka ntangu mono tangaka yo sambu mono ke vandaka bonso yandimane, Piere, Yakobo, mpi Yoane vandaka ‘kulala sambu na mawa.’—konso ntangu mono ke zolaka kuyamba banzenza mbote mpi ke salaka bisalu mingi kansi bantangu ya nkaka mono ke vilaka nde mono fwete pema mpi kusolula ti banduku.” Na nima ya kutanga disolo ya Estere, leke mosi ya nkento ya bamvula 15 tubaka nde: “Mono vandaka kuyindula nde beto lenda kuma bampika ya bilele mpi ya bima ya mpa yina ke basika. Beto fwete lwata mbote, kansi beto fwete lutisa ve ndilu.” Yandi yikaka nde: “Yehowa ke tulaka dikebi na kimuntu na beto ya kati.” Mpi disolo yina tubilaka ntumwa Piere sepedisaka mpangi-nkento mosi yina tubaka nde: “Mono kudikotisaka ya mvimba na disolo yina. Yo vandaka bonso nde mono vandaka pana! Mono sadilaka biwilu na mono sambu na kubakisa mambu yina baverse vandaka kutubila.”

Batangi yai, mpi mingi ya nkaka yina sonikaka sambu na kumonisa ntonda na bo na masolo yai ya kulandana, ke ndimisa diambu yina ntumwa Polo sonikaka tuka ntama: “Mambu yonso ya bo sonikaka ntama, bo sonikaka yo sambu na kulonga beto.” (Bar. 15:4) Ya kieleka, Yehowa me sonikisaka masolo yai na Biblia sambu yo longa beto malongi ya mfunu. Beto yonso, ata beto me salaka bamvula ikwa na kieleka, beto lenda baka malongi na masolo yina.

Beto ke siamisa nge mpenza na kutanga mukanda yai kukonda kusukinina. Beno kotisa yo na manaka na beno ya Lusambu ya Dibuta—bana ta sepela ti yo mingi! Ntangu beto ta longuka malongi yai na Kulonguka ya Biblia ya Dibundu, kukonda ve ata mposo mosi! Tanga yo malembe-malembe, mpi na dikebi yonso. Sadila mayele na nge ya kuyindula mpi biwilu na nge. Meka kuwa mutindu bantu yina Biblia ke tubila vandaka kuwa, mpi meka na kumona mambu mutindu bo monaka. Fwanisa mutindu bo salaka mambu ntangu bo kutanaka na diambu mosi buna ti mutindu yina nge zolaka kusala yo.

Yo ke pesa beto kiese mingi na kulonguka mukanda yai kumosi ti beno. Bika nde yo vanda lusakumunu sambu na nge mpi dibuta na nge. Beno yamba mbote mpi zola ya me katuka na beto bampangi na beno,

Nto-Kimvuka ya Bambangi ya Yehowa