Na ntangu ya ntama, mikanda na beto vandaka kutuba nde mabundu ya Kikristu kele kizuzi ya ke monisa Yeruzalemi yina kolamaka. Mambu yina vandaka kusalama na Yeruzalemi yina kondaka kwikama; mu mbandu lusambu ya biteki mpi mambu mingi ya mbi ke yibusa beto kibeni mambu yina ke salama na mabundu ya Kikristu. Kansi, bubu yai mikanda na beto, mu mbandu mukanda yai ya nge ke tanga ntangu yai, ke sadilaka diaka ve bizuzi sambu na kutubila bambikudulu; yo ke sadilaka yo kaka bisika yina Biblia ke pesaka bikuma ya mfunu ya kusala yo. Keti kele ti verse mosi ya ke tuba nde mabundu ya Kikristu kele kizuzi ya ke monisa Yeruzalemi? Ve.

Beto tadila mambu yai: Yeruzalemi vandaka ntete kisika ya lusambu ya bunkete; kansi na nima bantu na yo kolamaka. Kansi, mabundu ya Kikristu me vandaka ntete ve ata fioti kisika ya lusambu ya bunkete. Banda yo yantikaka na mvu-nkama ya iya T.B., mabundu ya Kikristu ke longaka kaka malongi ya luvunu.

Diaka, ntangu bantu ya Babilone fwaka Yeruzalemi, Yehowa kumaka diaka kundima mbanza yai mpi yo kumaka diaka kisika ya lusambu ya bunkete. Kansi Nzambi me ndimaka ntete ve ata fioti mabundu ya Kikristu mpi ntangu yo ta fwa na nsungi ya mpasi ya nene, yo ta vutuka diaka ve ata fioti.

Mambu yai ke pusa beto na kutuba nki? Ntangu beto ke tadila bambikudulu ya Biblia yina lunganaka sambu na Yeruzalemi yina kondaka kwikama, beto lenda tuba nde, ‘Yo kele mutindu mosi ti mambu ya ke salama na mabundu ya Kikristu bubu yai.’ Kansi kele ve ti verse mosi ya ke tuba nde mabundu ya Kikristu kele kizuzi ya ke monisa Yeruzalemi.