LUPANGU YA MVUTUKILU 14A
Malongi ya Beto Ke Baka na Tempelo ya Mbona-Meso ya Ezekiele
Bo Me Tombula Lusambu ya Bunkete mpi Me Tanina Yo
Tempelo ya mbona-meso kele na “zulu ya ngumba mosi ya nda kibeni” (1). Keti beto me tombulaka lusambu ya bunkete, disongidila ke tulaka yo na kisika ya ntete kibeni na luzingu na beto?
Nda ya kibaka (2), yina ke ziunga lupangu ya tempelo kele na kati-kati ya kisika mosi ya nene (3), ke yibusa beto nde beto fwete bika ve nde ata kima mosi kubebisa lusambu ya beto ke sambilaka Yehowa. Kana beto fwete tula mambu yina “bantu yonso” ke salaka, disongidila mambu ya kinsuni, ntama kibeni ti lusambu ya bunkete, yo ke monisa nde bikalulu ya mbi mpi ya mvindu fwete vanda ve ata fioti na luzingu ya muntu yina ke sambilaka Yehowa bubu yai!—Ezek. 42:20.
Balusakumunu ya Mvula na Mvula
Masa yina ke basika na kisika ya santu ya tempelo, ke kuma masa ya nene, ke pesa luzingu, mpi ke sala nde ntoto kubuta mingi (4). Beto ta tubila balusakumunu yai na Kapu 19 ya mukanda yai.
Bansiku ya Mutindu Mosi Sambu na Bantu Yonso
Bakielo ya nganda ya nda (5) mpi bakielo ya kati (9) ke yibusa beto nde Yehowa me tulaka bansiku ya kunanguka ya bikalulu ya mbote sambu na bantu yonso yina ke sala lusambu ya bunkete. Beto simba nde bakielo ya kati mpi ya nganda kele kiteso mosi. Yo me fwana, mambu yina Yehowa ke lombaka bansadi na yandi kele kiteso mosi, ata bo kele ti konso kiyeka yina.
Kudia na Mesa ya Yehowa
Basuku ya kudila madia (8) ke yibusa beto nde na ntangu ya ntama, na bimenga ya nkaka yina bo vandaka kunata na tempelo, bantu vandaka kudia yo, disongidila kudia madia yina ti Yehowa. Yo kele ya kuswaswana na tempelo ya kimpeve kisika Bakristu ke sambilaka bubu yai, sambu Nzambi me pesaka dezia “kimenga mosi” yina kele mfunu. (Baeb. 10:12) Ata mpidina, beto ke pesaka kimenga ya lukumu.—Baeb. 13:15.
Lusilu ya Nzambi
Mutindu bo tesaka tempelo mbote-mbote na mbona-meso yai lenda lembisa nge. Kansi yo ke pesa dilongi yai ya mfunu: Yo ke ndimisa nde lukanu ya Yehowa ya kuvutula lusambu ya bunkete ta lungana kibeni mbote-mbote mpi yo ta soba ve ata fioti bonso bima yina bo tesaka. Ata Ezekiele ke tuba ve nde yandi monaka muntu na mbona-meso yai, yandi sonikaka bandongisila ya ngolo yina Yehowa pesaka banganga-nzambi, bamfumu, mpi bantu yonso. Bansadi ya Nzambi yonso fwete zitisa bansiku na yandi ya mbote.
