LUPANGU YA MVUTUKILU 19B
Masa ya Fioti Me Kuma Masa ya Nene!
Ezekiele ke mona masa ya fioti yina ke basika na kisika ya santu ya Yehowa mpi na nima ya kusala kilometre mosi ti ndambu, yandi ke mona nde yo ke kuma na mutindu ya kuyituka masa ya nene mpi ya mudindu! Na balweka ya nzadi, yandi ke mona banti yina ke butaka bambuma sambu na kudia mpi kubelula. Mambu yai yonso ke tendula nki?
Nzadi Ke Nata Balusakumunu
NA NTANGU YA NTAMA: Ntangu Bayuda yina vandaka na kimpika vutukaka na bwala na bo, bo bakaka balusakumunu sambu bo pesaka maboko na kuvutula lusambu ya bunkete na tempelo
NA BILUMBU NA BETO: Na 1919, Nzambi vutulaka lusambu ya bunkete, yo yina yo pesaka bansadi na yandi ya kwikama dibaku ya kubaka balusakumunu mingi kibeni ya kimpeve
NA BILUMBU KE KWISA: Na nima ya Armagedoni, Yehowa ta sakumuna beto mingi na kinsuni mpi na kimpeve
Masa ya Ke Pesaka Luzingu
NA NTANGU YA NTAMA: Yehowa sakumunaka mingi bansadi na yandi ya kwikama, yo yina ntalu na bo kumaka mingi mpi yo salaka nde bo sambila yandi kukonda mpasi
NA BILUMBU NA BETO: Na paladisu yai ya kimpeve ya ke landa kukuma nene, bantu yina ke landa kukuma mingi me bakaka mambote ya balusakumunu mingi ya Yehowa ya kimpeve mpi me vutukaka na luzingu na kimpeve
NA BILUMBU KE KWISA: Bantu yina ta guluka na Armagedoni ta vukana ti bantu mingi kibeni yina ta futumuka, mpi bo yonso ta baka balusakumunu mingi ya Yehowa
Banti Sambu na Kudia mpi Kubelula
NA NTANGU YA NTAMA: Yehowa disaka na mutindu ya kimpeve bansadi na yandi ya kwikama yina vutukaka na insi na bo; yandi belulaka bo mpi na maladi ya kimpeve yina vandaka kuniokula bo banda ntama
NA BILUMBU NA BETO: Madia ya mingi ya kimpeve ke sadisaka bansadi ya Nzambi na kubikala ya kwikama, na kutina masumu ya nene mpi bikalulu ya mbi ya bantu ya nsi-ntoto yai
NA BILUMBU KE KWISA: Kristu ti bantotila 144 000 ta sadisa bantu ya bulemfu na kukuma bantu ya kukuka mpi na kuvanda ti sante ya mbote mpi luzingu ya mvula na mvula!
