Bampangi Yina Ke Zolaka Yehowa Mingi:

Na mvu 1971, bantu yina vukanaka na Lukutakanu ya Distrike yina vandaka ti ntu-diambu, “Zina ya Nzambi” vandaka na kiese ya kubaka mikanda mingi ya mpa yina basikaka na lukutakanu yina. Kubasika ya mikanda yina yitukisaka kibeni bantu yonso. Sambu na mukanda mosi na kati ya mikanda yina basikaka, mpangi mosi tubaka nde: “Yo kele kibeni diambu ya kiese ya ke monisa mambu yina ta salama na bilumbu ke kwisa yina beto me monaka ntete ve!” Inki yandi vandaka kutubila? Yandi vandaka kutubila mukanda yina vandaka ti ntu-diambu, “Makanda Ta Zaba nde Mono Kele Yehowa”—Inki Mutindu? (na Kingelesi) Kansi, sambu na nki bantu sepelaka mingi ti mukanda yai? Sambu yo vandaka ti bantendula ya mpa ya bambikudulu ya mukanda ya Ezekiele; bambikudulu yina ke tadila luzingu ya bantu yonso na bilumbu ke kwisa.

Banda na bamvula yina mukanda ‘Zaba Yehowa’ basikaka, bansadi ya Nzambi me kumaka mingi kibeni; bo vandaka ntete bamilio 1,5 mpi bubu yai bo me kumaka bamilio kuluta 8. (Yez. 60:22) Na kimvuka, bamilio yai ya bansadi ya Yehowa ke tubaka bandinga kuluta 900. (Zek. 8:23) Bantu mingi me zwaka ntete ve dibaku ya kulonguka mukanda mosi ya ke tendulaka na pwelele yonso bambikudulu yina Ezekiele sonikaka na nsadisa ya mpeve santu.

Diaka, na bamvula me luta banda na mvu 1971, mutindu na beto ya kubakisa bakieleka mingi ya Biblia me sobaka kibeni sambu nsemo ke landa kukuma mingi. (Bing. 4:18) Na mvu 1985 beto yantikaka kumona pwelele mutindu Nzambi ke ndimaka “mameme ya nkaka” nde bo kele bantu ya lunungu disongidila banduku na yandi. (Yoa. 10:16; Bar. 5:18; Yak. 2:23) Na nima, na mvu 1995 beto bakisaka na mbala ya ntete nde lusambisu ya nsuka ya “mameme” mpi ya “bankombo” ta salama na nsungi ya “mpasi ya nene.” (Mat. 24:21; 25:31, 32) Bansoba yai yonso me sadisaka beto na kubakisa mbote mukanda ya Ezekiele.

Na bamvula yai, nsemo ke landa kaka kusema. Beto tadila malongi yina beto ke baka na bambandu yina Yezu pesaka. Bubu yai malongi yango me kumaka kibeni pete na kubakisa. Bambandu mingi ke tubila mambu yina ta salama ntama mingi ve na nsungi ya mpasi ya nene yina me kuma pene-pene. Mutindu mosi, mutindu na beto ya kubakisa bambikudulu ya nkaka ya mukanda ya Ezekiele me soba. Bambikudulu yai kele na kati na yo: mbikudulu ya ke tubila Gogi ya Magogi (kapu 38 mpi 39), mbikudulu ya ke tubila kisalu ya bakala yina kele ti kima yina sekretere ke tulaka tinta (kapu 9), mbikudulu ya ke tubila muwanda ya mikwa ya kuyuma mpi mbikudulu ya ke tubila kuvukisa bitini zole ya banti na mutindu ya kifwani (kapu 37). Bansoba yai yonso me soba mpi mambu yina beto sonikaka bamvula mingi me luta na mukanda ‘Zaba Yehowa.’

Ntembe kele ve nde, bansadi mingi ya Yehowa kudiyulaka nde, “Inki ntangu beto ta zwa mukanda mosi ya kele ti bantendula ya mpa ya bambikudulu ya Ezekiele?” Mukanda yango kele Yehowa Me Vutula Lusambu ya Bunkete! Kana nge tanga bakapu na yo 22 mpi nge yindulula bambandu ya kitoko ya kele na kati, nge ta yituka na kumona nde bo salaka bansosa mbote-mbote sambu na kusonika yo. Bo sambaka mpi bo yindulaka mingi sambu na kuzaba sambu na nki Yehowa salaka nde Ezekiele kusonika mukanda yai ya kitoko. Bo tadilaka mbote-mbote bangiufula yai: Inki malongi mukanda ya Ezekiele pesaka bantu yina zingaka na bilumbu na yandi mpi nki malongi yo ke pesa beto bubu yai? Inki bambikudulu ke tubila mambu yina  ta salama na bilumbu ke kwisa? Keti beto fwete sosa bizuzi na bambikudulu ya Ezekiele? Bamvutu na bangiufula yai ke sadisa beto na kubakisa mbote-mbote mukanda yai ya beto yonso ke sepelaka kutanga.

Kana nge tanga mukanda ya Ezekiele banda na luyantiku tii na nsuka, nge ta sepela kibeni ti kitini ya organizasio ya Yehowa yina kele na zulu. Ntembe kele ve nde bansiku ya zulu yina Yehowa me tulaka sambu na bigangwa yina kele na zulu mpi sambu na bantu yina kele na ntoto, bayina ke zola kusambila yandi na mutindu yina yandi ke zolaka ta yitukisa nge. Mukanda Lusambu ya Bunkete ta sadisa nge na kumonisila Yehowa ntonda mingi sambu na mambu yina yandi me salaka dezia sambu na bansadi na yandi mpi sambu na mambu yina yandi ta sala sambu na bo ntama mingi ve. Nge ta mona nde mukanda yai ke vutukila mbala na mbala mambu zole ya mfunu. Ya ntete, sambu na kusepedisa Yehowa, beto fwete zaba mpi kundima nde yandi kele Mfumu ya Kuluta Nene. Ya zole, beto fwete sambila Yehowa na mutindu yina yandi ke zolaka mpi beto fwete zitisa bansiku na yandi ya zulu na luzingu na beto.

Beto ke zola kibeni nde mukanda yai kukumisa ngolo lukanu na nge ya kusambila Yehowa na mutindu ya ke pesa zina na yandi ya nene mpi ya santu lukumu. Diaka beto ke zola nde yo sadisa nge na kulanda kuvingila ntangu yina makanda yonso ta zaba nde yandi kele Yehowa.—Ezek. 36:23; 38:23.

Bika nde Tata na beto ya zola Yehowa kusakumuna mingi bikesa ya nge ke sala sambu na kubakisa mukanda yai ya profete Ezekiele sonikaka na nsadisa ya mpeve santu.