Biblia ke tubilaka bimvuka zole ya bampangi ya babakala yina ke bakaka mikumba na dibundu: “bankengi ti bansadi ya kisalu.” (Bafilipi 1:1) Mbala mingi, konso dibundu ke vandaka ti bankuluntu mpi bansadi ya kisalu mingi. Inki kisalu bansadi ya kisalu ke salaka sambu na mambote na beto?

Bo ke sadisaka kimvuka ya bankuluntu. Bansadi ya kisalu, bo vanda baleke to bambuta, ke vandaka ti bangwisana ya ngolo ti Yehowa, bo kele bantu yina bo lenda tudila ntima, mpi bo ke salaka bisalu na bo na ntima ya mvimba. Bo ke salaka bisalu ya mfunu yina ke lombaka kusala mbala na mbala ya ke tadila mambu ya kinsuni mpi mutindu mambu fwete salama. Kusala mutindu yai ke sadisaka bankuluntu na kudipesa na kisalu na bo ya kulonga mpi ya kugungula.

Bo ke salaka bisalu ya mfunu. Kisalu ya bansadi ya kisalu ya nkaka kele kuyamba bantu yonso yina ke kwisa na balukutakanu. Bankaka ke talaka mambu ya sonorizasio, kukabula mikanda, konti ya dibundu, mpi kupesa bampangi bateritware sambu na kuta kimbangi. Bo ke sadisaka mpi kisalu ya kutanina Nzo ya Kimfumu. Bankuluntu lenda lomba bo na kusadisa minunu. Ata bo me pesa bo konso kisalu yina, bansadi ya kisalu ke salaka yo na luzolo yonso, yo yina bampangi yonso ke zitisaka bo.—1 Timoteo 3:13.

Bo ke pesaka mbandu. Bo ke ponaka bansadi ya kisalu sambu na bikalulu na bo ya mbote ya Bukristu. Ntangu bo ke salaka masolo na balukutakanu, bo ke kumisaka lukwikilu na beto ngolo. Ntangu bo ke bakaka kisika ya ntete na kisalu ya kusamuna, bo ke sadisaka beto na kuvanda kikesa mingi. Sambu bo ke salaka kumosi ti kimvuka ya bankuluntu, yo ke nataka kiese mpi bumosi na dibundu. (Baefezo 4:16) Na nima, bo lenda lungisa mpi mambu ya bo ke lombaka sambu na kukuma bankuluntu.

• Bansadi ya kisalu ke vandaka ti nki bikalulu?

• Inki mutindu bansadi ya kisalu ke sadisaka dibundu na kutambula mbote?