Na Sezarea, kuvandaka na mfumu mosi ya nene ya basoda ya Roma, zina na yandi Korneye. Ata yandi vandaka ve Muyuda, Bayuda vandaka kuzitisa yandi. Yandi vandaka kusadisa bansukami mpi bantu ya kukonda mfunu. Korneye vandaka kukwikila na Yehowa mpi kusamba yandi mbala na mbala. Kilumbu mosi, wanzio mosi basikilaka yandi mpi tubaka nde: ‘Nzambi me wa bisambu na nge. Ntangu yai, tinda bantu na mbanza ya Yope, kisika Piere kele mpi lomba yandi na kukwisa kisika nge kele.’ Kukonda kusukinina, Korneye tindaka bantu tatu na Yope, na kitamina ya bakilometre kiteso ya 30 na sudi.

Na ntangu yina, na Yope, Piere monaka mbona-meso mosi. Yandi monaka bambisi yina Bayuda vandaka ve ti nswa ya kudia, mpi yandi waka ndinga mosi ke songa yandi na kudia yo. Piere buyaka mpi tubaka nde: ‘Mono me diaka ntete ve mbisi ya mvindu na luzingu na mono.’ Ebuna ndinga yango tubilaka yandi nde: ‘Kutuba ve nde bambisi yina kele mvindu. Nzambi me kumisaka yo bunkete.’ Yo songaka diaka Piere nde: ‘Bantu tatu kele na kielo na nge. Kwenda ti bo.’ Piere kwendaka na kielo mpi yulaka bantu yina sambu na nki bo me kwisa. Bo vutulaka nde: ‘Korneye mfumu ya basoda ya Roma  muntu me tinda beto. Nge fwete kwenda na nzo na yandi na Sezarea.’ Piere yambaka bo mpi pesaka bo kisika ya kulala. Na kilumbu yina landaka, yandi kwendaka ti bo na Sezarea, kumosi ti bampangi ya nkaka ya Yope.

Ntangu Korneye monaka Piere, yandi fukamaka. Kansi Piere tubilaka yandi nde: ‘Telama! Mono kele muntu bonso nge. Nzambi me songa mono na kukwisa na nzo na nge, ata Bayuda ke kwendaka ve na banzo ya bantu ya Makanda. Ntangu yai, pardo tubila mono sambu na nki nge tindaka bantu na kubinga mono.’

Korneye tubilaka Piere nde: ‘Bilumbu iya me luta mono vandaka kusamba Nzambi, mpi wanzio mosi tubilaka mono na kutinda bantu sambu na kubinga nge. Pardo longa beto ndinga ya Yehowa.’ Piere tubaka nde: ‘Mono me longukaka nde Nzambi ke pona-ponaka ve. Yandi ke ndimaka konso muntu yina ke zolaka kusambila yandi.’ Piere longaka bo mambu mingi ya me tala Yezu. Mpeve santu kwisaka na zulu ya Korneye mpi ya bantu yina vandaka ti yandi, ebuna bo yonso bakaka mbotika.