Bampangi-Bakristu:

Sambu beto ke sambilaka Yehowa, beto ke zolaka Ndinga na yandi, Biblia. Beto ke ndimaka nde yo kele ti masolo ya kieleka, yo ke pesaka lutwadisu ya mbote na luzingu, mpi yo kele ti banzikisa ya mbote yina ke monisa nde Yehowa ke zolaka bantu. (Nkunga 119:105; Luka 1:3; 1 Yoane 4:19) Beto kele ti mpusa ya ngolo ya kusadisa bantu ya nkaka na kulonguka bakieleka ya mfunu ya kele na Ndinga ya Nzambi. Yo yina, beto kele na kiese mingi ya kubasisa mukanda yai, Malongi Yina Nge Lenda Baka na Biblia. Bika beto songa ndambu ya mambu ya kele na mukanda yai.

Beto me basisa mukanda yai ntete-ntete sambu na bana ya fioti. Kansi, yo lenda sadisa mpi bambuta yina kele ti mpusa ya kulonguka diaka mambu mingi ya me tala Biblia. Mpi sambu Biblia kele mukanda sambu na bantu yonso, ntembe kele ve nde beto yonso ta baka mambote ntangu beto ke tadila diaka malongi na yo, yina lenda sadisa beto na kuvanda kibeni na kiese.

Beto me sadila masolo ya Biblia na mukanda yai mpi yo ke tubila masolo ya dibuta ya bantu banda na lugangu tii bubu yai. Beto me sala yonso sambu na kutubila masolo ya Biblia na mutindu ya pwelele mpi ya pete na kutadila ndonga yina yo salamaka.

Katula masolo ya Biblia, mukanda yai kele diaka ti mambu mingi. Beto me yidika bangogo mpi bifwanisu na mutindu yina ke kumisa masolo ya Biblia kitoko mpi yo ke monisa mawi ya bantu yina kele na bifwanisu.

Mukanda yai ke sadisa beto na kumona mutindu Biblia kele mukanda ya ke tubila bantu yina lemfukilaka Yehowa mpi bayina lemfukilaka yandi ve. Diaka, yo ke siamisa beto na kubaka malongi na bambandu na bo. (Baroma 15:4; 1 Bakorinto 10:6) Mukanda yai kele ti  bitini 14. Na luyantiku ya konso kitini, beto me tubila na bunkufi mwa malongi yina beto lenda longuka.

Kana nge kele kibuti, nge lenda tanga dilongi mosi ti mwana na nge mpi kutubila bifwanisu yina ke wakana ti dilongi yango. Na nima, beno lenda tanga baverse ya Biblia yina ke tubila dilongi yango. Sadisa mwana na nge na kuwakanisa mambu yina yandi ke tanga na Biblia ti dilongi yina kele na mukanda. Metode yai lenda vanda mpi mbote ntangu nge ke sadisa mbuta mosi na kubakisa nsangu mosi ya Biblia.

Beto ke tula kivuvu nde mukanda yai ta sadisa bantu yonso ya ntima ya mbote; baleke mpi bambuta na kubaka malongi na Ndinga ya Nzambi mpi na kusadila yo na luzingu na bo. Kana bo sala mutindu yina, bo mpi ta sambila Nzambi na dibuta na yandi yina yandi ke zolaka mingi.