1, 2. Sambu na nki nge ke zolaka Yehowa Nzambi?

KETI nge ke zolaka Nzambi? Ziku nge ke zolaka yandi mingi yo yina nge me kudipesaka na yandi. Ziku nge ke monaka nde yandi kele nduku na nge ya ngolo. Kansi, na ntwala nde nge zola Yehowa, yandi muntu zolaka nge ntete. Biblia ke tuba nde: “Beto ke zolaka, sambu yandi zolaka beto ntete.”—1 Yoane 4:19.

² Yindula mambu yonso yina Yehowa me salaka sambu na kumonisila beto zola. Yandi me pesaka beto ntoto, kisika mosi ya kitoko ya kuzinga mpi bima yonso yina beto ke vandaka ti yo mfunu na luzingu. (Matayo 5:43-48; Kusonga 4:11) Yandi ke zolaka nde beto vanda ti kinduku ya mbote ti yandi, yo yina yandi me sadisaka beto na kulonguka mambu ya me tala yandi. Ntangu beto ke tangaka Biblia, beto ke widikilaka Yehowa. Mpi ntangu beto ke sambaka yandi, yandi ke widikilaka beto. (Nkunga 65:2) Yandi ke twadisaka mpi ke pesaka beto ngolo na nzila ya mpeve santu na yandi. (Luka 11:13) Nkutu yandi tindaka Mwana na yandi ya mfunu mingi na ntoto sambu na kukatula beto na kimpika ya masumu mpi ya lufwa.—Tanga Yoane 3:16; Baroma 5:8.

3. Inki mutindu beto lenda vanda ti kinduku ya ngolo ti Yehowa?

 ³ Yindula fioti nduku na nge mosi ya ngolo, yina ke vandaka ti nge na ntangu ya kiese mpi na ntangu ya mpasi. Yo ke lombaka bikesa sambu kinduku na beno kuvanda kaka ngolo. Sambu kinduku na beto ti Yehowa, nduku ya kuluta mbote, kuvanda kaka ngolo, beto fwete sala bikesa. Kinduku na beto ti yandi lenda zinga mvula na mvula. Yo yina Biblia ke tuba nde: “Beno bikala na zola ya Nzambi.” (Yude 21) Inki mutindu beto lenda sala yo? Biblia ke pesa mvutu: “Zola ya Nzambi ke tendula nde beto zitisa bansiku na yandi; nkutu bansiku na yandi kele kilo ve.”—1 Yoane 5:3.

4, 5. (a) “Zola ya Nzambi” ke tendula inki? (b) Inki mutindu zola na nge sambu na Yehowa yantikaka kukuma mingi?

⁴ Inki Biblia ke zola kutuba ntangu yo ke tubila “zola ya Nzambi”? Yo ke tubila ve zola ya Nzambi sambu na beto kansi zola na beto sambu na yandi. Keti nge ke yibuka ntangu nge yantikaka kuzola Yehowa?

⁵ Yindula mutindu nge kudiwaka ntangu nge zabaka na mbala ya ntete nde Yehowa ke zolaka nde nge zinga mvula na mvula na nsi-ntoto ya mpa. Nge longukaka mambu yonso yina yandi me salaka sambu na kulungisa mambu yai, mpi nge bakisaka dikabu ya mfunu yina Yehowa pesaka beto ntangu yandi tindaka Mwana na yandi na ntoto. (Matayo 20:28; Yoane 8:29; Baroma 5:12, 18) Ntangu nge longukaka nde Yehowa ke zolaka nge mingi, yo simbaka ntima na nge, mpi nge yantikaka kuzola yandi mpi.—Tanga 1 Yoane 4:9, 10.

6. Kuzola muntu ke tendula inki? Zola na nge sambu na Nzambi pusaka nge na kusala inki?

⁶ Kansi mpusa yina ya kuzola Nzambi vandaka kaka luyantiku. Mu mbandu, kana beto ke zola muntu mosi,  beto ke sukaka ve kaka na kutuba nde “mono ke zolaka nge.” Zola ke pusaka beto na kusala mambu yina ta pesa nduku na beto kiese. Mutindu mosi mpi, zola na nge sambu na Yehowa pusaka nge na kuzinga na mutindu yina ke pesaka yandi kiese. Ntangu zola yina kumaka mingi, ziku nge kudipesaka na yandi mpi nge bakaka mbotika. Ntangu nge salaka mambu yai, nge silaka na kusadila Yehowa mvula na mvula. (Tanga Baroma 14:7, 8.) Inki mutindu nge lenda lungisa lusilu yai?

7. Kana beto ke zolaka Yehowa, inki beto ta sala? Tanga mwa bansiku na yandi.

⁷ Sambu beto ke zolaka Yehowa, ‘beto ke zitisaka bansiku na yandi.’ Inki mutindu beto ke salaka yo? Beto ke lemfukilaka yandi. Biblia ke longaka beto mutindu Yehowa ke zolaka nde beto zinga. Mu mbandu, yandi ke songaka beto nde yo kele mbi na kulawuka malafu, na kuyiba to na kukusa, na kuvukisa nitu ti muntu yina beto me kwelanaka ve ti yandi, to na kusambila konso muntu to konso kima yina na kisika ya kusambila yandi.—1 Bakorinto 5:11; 6:18; 10:14; Baefezo 4:28; Bakolosai 3:9.

8, 9. Inki mutindu beto ke zabaka mambu yina Yehowa ke zolaka nde beto sala ata yo kele ve ti nsiku ya Biblia yina ke songa beto mambu yina beto fwete sala? Pesa mbandu.

⁸ Kansi sambu na kupesa Yehowa kiese, beto fwete suka ve kaka na kulemfuka na bansiku na yandi. Yandi me pesaka beto ve bansiku ya ke tubila konso diambu ya beto ke kutanaka ti yo na luzingu. Yo yina, bantangu ya nkaka beto ta kutana ti mambu yina kele ve ti nsiku ya Biblia yina ke songa beto mambu yina beto fwete sala. Inki mutindu beto lenda baka balukanu ya mbote? (Baefezo 5:17) Biblia kele ti minsiku, disongidila, bakieleka ya mfunu yina ke longaka beto mutindu Yehowa ke tadilaka  mambu. Mpi ntangu beto ke tangaka Biblia, beto ke zabaka Yehowa mbote-mbote. Beto ke longukaka mutindu yandi ke yindulaka, mambu yina yandi ke zolaka mpi mambu yina yandi ke zolaka ve.—Tanga Nkunga 97:10; Bingana 6:16-19; tala Noti 1.

⁹ Mu mbandu, inki mutindu beto ke ponaka mambu yina beto fwete tala na televizio to mambu yina beto fwete sosa na Internet? Yehowa ke songaka beto ve pwelele mambu yina beto fwete sala. Kansi minsiku yina yandi ke pesaka beto ta sadisa beto na kubaka balukanu ya mbote. Bubu yai, bansaka mingi me fuluka ti mubulu mpi mansoni. Yehowa ke songaka beto na Biblia nde “yandi ke mengaka konso muntu yina ke zolaka mubulu” mpi nde yandi “ta sambisa bantu ya ke salaka pite.” (Nkunga 11:5; Baebreo 13:4) Inki mutindu minsiku yai lenda sadisa beto na kubaka balukanu ya mbote? Kaka ntangu beto me zaba nde Yehowa ke mengaka kima mosi to ke monaka nde yo kele mbi, beto fwete buya yo.

10, 11. Sambu na nki beto ke lemfukilaka Yehowa?

¹⁰ Sambu na nki beto ke lemfukilaka Yehowa? Beto ke salaka yo ve sambu na kutina ndola to bampasi yina beto lenda kutana ti yo kana beto baka balukanu ya mbi. (Bagalatia 6:7) Ve, beto ke lemfukilaka Yehowa sambu beto ke zolaka yandi. Kaka mutindu bana ke zolaka kupesa tata na bo kiese, beto ke zolaka kupesa Tata na beto ya zulu kiese. Kele ve ti kima ya mbote kuluta kuzaba nde Yehowa ke sepelaka ti beto!—Nkunga 5:12; Bingana 12:2; tala Noti 2.

¹¹ Beto ke lemfukilaka ve Yehowa kaka ntangu yo kele mpasi ve to ntangu beto kele ve ti kima ya nkaka ya kusala. Diaka, beto ke ponaka ve bansiku mpi minsiku na yandi yina beto fwete zitisa mpi yina beto fwete zitisa ve. (Kulonga 12:32) Kansi, beto ke lemfukilaka yandi na  ntima ya mvimba, bonso muyimbi-bankunga yina tubaka nde: “Mono ke zolaka bantuma na nge mingi, ee, mono ke zolaka yo.” (Nkunga 119:47; Baroma 6:17) Beto ke zolaka kuvanda bonso Noa, yina salaka mambu yonso yina Yehowa lombaka yandi sambu na kumonisa nde yandi vandaka kuzola Yehowa. Biblia ke tuba nde Noa “salaka kaka mutindu yina.” (Kuyantika 6:22) Keti nge ke zolaka nde Yehowa kutuba mambu yai sambu na nge?

12. Inki mutindu beto lenda pesa Yehowa kiese?

¹² Inki mutindu Yehowa ke kudiwaka ntangu beto ke lemfukilaka yandi? Beto ke pesaka “ntima na [yandi] kiese.” (Bingana 11:20; 27:11) Yindula fioti! Beto ke pesaka Ngangi ya zulu ti ntoto kiese ntangu beto ke lemfukilaka yandi. Ata mpidina, yandi ke pusaka beto ve ata fioti na ngolo na kusala yo. Kansi, yandi me pesaka beto kimpwanza ya kupona. Yo ke tendula nde beto kele ti kimpwanza ya kupona kusala mambu ya mbote to ya mbi. Yehowa ke zolaka nde zola na beto sambu na yandi kupusa beto na kubaka balukanu ya mbote sambu beto vanda ti luzingu ya kuluta mbote.—Kulonga 30:15, 16, 19, 20; tala Noti 3.

13, 14. Inki mutindu beto me zaba nde bansiku ya Yehowa kele mpasi mingi ve na kuzitisa? Pesa mbandu.

¹³ Ebuna kana beto ke yindula nde bansiku ya Yehowa kele mpasi na kuzitisa to nde yo ta kanga beto nzila ya kuvanda ti kimpwanza? Biblia ke tuba pwelele nde: “Bansiku na yandi kele kilo ve.” (1 Yoane 5:3) Ngogo ya Kigreki ya bo me balula nde “kilo” ke tendula “kizitu.” Na baverse ya nkaka, Biblia ke sadilaka ngogo yai sambu na kutubila bansiku ya ngolo to bantu yina ke sosaka kuyala mpi kuniokula bantu ya nkaka. (Matayo 23:4; Bisalu  20:29, 30) Bible en Kituba ke balula yo mutindu yai: “Bansiku na yandi kele mpasi ve beto na kulanda yo.” Bansiku ya Yehowa kele “kizitu” ve, disongidila, yo kele ve mpasi sambu beto zitisa yo. Yandi ke lombaka beto ve na kusala mambu yina kele mpasi mingi.

¹⁴ Mu mbandu, yindula nde nge ke zola kusadisa nduku na nge yina ke kwenda kukota na nzo ya mpa. Yandi me kanga bima na yandi yonso na bakarto. Bakarto ya nkaka kele kilo ve mpi nge lenda nata yo kukonda mpasi, kansi ya nkaka kele kilo mingi mpi yo ke lomba bantu zole sambu na kunangula yo. Keti nduku na nge ta zola nde nge nangula nge mosi karto mosi ya kele kilo mingi? Ata fioti ve! Sambu na inki? Sambu yandi ke zola ve kupesa nge mpasi. Bonso nduku yina, Yehowa ta lomba beto ve ata fioti na kusala kima mosi ya kele mpasi mingi. (Kulonga 30:11-14) Yehowa ke bakisaka mutindu yandi me salaka beto. Yandi “me zaba mbote mutindu yandi me salaka beto, yandi ke yibukaka nde beto kele mfututu.”—Nkunga 103:14.

15. Sambu na nki beto ke ndima nde bansiku ya Yehowa kele sambu na mambote na beto?

¹⁵ Moize zabisaka dikanda ya Izraele nde bansiku ya Yehowa vandaka sambu na “mambote na [bo] ya kukonda nsuka” mpi nde bulemfu na bo zolaka kusadisa bo na ‘kulanda kuzinga.’ (Kulonga 5:28-33; 6:24) Yo kele mutindu mosi mpi bubu yai. Konso kima yina Yehowa ke lombaka beto na kusala, ta sadisa beto na kuzinga mbote. (Tanga Yezaya 48:17.) Tata na beto, Yehowa, ke zabaka ntangu yonso mambu yina kele mbote sambu na beto. (Baroma 11:33) Biblia ke songa beto nde: “Nzambi kele zola.” (1 Yoane 4:8) Yo ke tendula nde zola ke pusaka Yehowa na kutuba mpi na kusala konso kima yina.

16. Inki mutindu beto me zaba nde beto lenda lemfukila Nzambi ata beto kele bantu ya kukonda kukuka mpi ata beto ke zinga na nsi-ntoto ya mbi?

 ¹⁶ Ntangu yonso yo ke vandaka pete ve sambu na kulemfukila Nzambi. Beto ke zinga na nsi-ntoto ya mbi yina Diabulu ke yala. Yandi ke sosaka kupusa bantu na kusala mambu ya mbi. (1 Yoane 5:19) Diaka, beto fwete nwana ti bangindu mpi bampusa na beto ya mbi, sambu yo lenda pusa beto na kukolama na Nzambi. (Baroma 7:21-25) Kansi, zola na beto sambu na Yehowa ke pesaka beto ngolo ya kusala mambu ya mbote. Yandi ke monaka bikesa ya beto ke salaka sambu na kulemfukila yandi, mpi yandi ke sadisaka beto na nsadisa ya mpeve santu. (1 Samuele 15:22, 23; Bisalu 5:32) Mpeve santu ke sadisaka beto na kuyedisa bikalulu yina ke sadisaka beto na kulemfukila yandi kukonda mpasi.—Bagalatia 5:22, 23.

17, 18. (a) Inki beto ta longuka na mukanda yai? (b) Inki beto ta tubila na kapu yina ke landa?

¹⁷ Na mukanda yai, beto ta longuka mutindu beto fwete zinga sambu na kupesa Yehowa kiese. Diaka beto ta longuka mutindu ya kusadila minsiku mpi bansiku ya bikalulu ya mbote na luzingu na beto. Kuvila ve nde Yehowa ke pusaka beto ve na ngolo na kulemfukila yandi. Kana beto ke pona kulemfukila yandi, luzingu na beto ta toma mpi beto ta vanda ti luzingu ya mbote na bilumbu ke kwisa. Kima ya kuluta mfunu kele nde, bulemfu na beto ta monisa Nzambi nde beto ke zolaka yandi mingi.—Tala Noti 4.

¹⁸ Yehowa me pesaka konso muntu kansansa yina ke sadisaka yandi na kuzaba mambu ya mbote mpi ya mbi. Kana beto ke longa kansansa na beto, yo lenda sadisa beto na ‘kuzitisa bansiku na yandi.’ Ebuna kansansa kele nki, mpi nki mutindu beto ke longaka yo? Bika beto tadila yo.