Nzambi kebinga bantu ya makanda yonso na kukwenda penepene na yandi na nzila ya kisambu. (Nkunga 65:3) Kansi, yandi kewaka ve, to kendimaka ve, bisambu yonso. Mumbandu, yandi kewaka ve bisambu ya bakala yina kenyokulaka nkento na yandi. (1 Piere 3:7) Dyaka, ntangu Bantu ya Izraele kwaminaka na mambi, Nzambi buyaka kuwa bisambu na bo. Yo kele pwelele nde kisambu kele dibaku ya mbote. Kansi Nzambi tandima bisambu ata ya bantu yina mesalaka masumu ya nene kana bo balula ntima.—Tanga Yezaya 1:15; 55:7.

Kisambu kele kitini ya lusambu na beto, yo yina beto fwete sambila kaka Ngangi na beto, Yehowa (Matayo 4:10; 6:9) Mutindu beto kele bantu ya kukonda kukuka, beto fwete samba na zina ya Yezu sambu yandi fwaka sambu na masumu na beto. (Yoane 14:6) Yehowa kezolaka ve nde, beto vutukila bisambu yina beto mekangaka na ntu to yina beto mesonikaka na mukanda mosi buna. Yandi kezolaka nde bisambu na beto kukatuka na ntima na beto.—Tanga Matayo 6:7; Bafilipi 4:6, 7.

Ngangi na beto lenda widikila ata bisambu yina beto kesalaka na nsi ya ntima. (1 Samuele 1:12, 13) Yandi kelomba beto na kusamba na mabaku yonso, mu mbandu na suka, na nkokila, na ntangu ya kudya, mpi ntangu beto kekutana ti bampasi.—Tanga Nkunga 55:23; Matayo 15:36.

Kukwenda penepene na Nzambi kele ve dyambu ya pete, sambu beto kezinga na kati ya bantu yina kekwikilaka ve na Nzambi mpi kevwenzaka lusilu na yandi ya kutula ngemba na  ntoto. (2 Timoteo 3:1, 4; 2 Piere 3:3, 13) Yo yina, beto kele na mfunu nde bampangi na beto Bakristu kupesa beto kikesa; bo mpi kevandaka ti mfunu na beto.—Tanga Baebreo 10:24, 25.

Kuvanda ti banduku yina kezolaka Nzambi kesadisaka beto na kukwenda penepene na Nzambi. Balukutakanu ya Bambangi ya Yehowa kevandaka mabaku ya mbote ya kubaka kikesa na nsadisa ya lukwikilu ya bampangi yankaka.—Tanga Baroma 1:11, 12.

Nge lenda kwenda penepene na Yehowa, kana nge keyindulula mambu yina nge melongukaka na Ndinga na yandi. Dyaka, kana nge ketala lugangu, kelemfukila bantuma na yandi mpi ketula ntima na balusilu na yandi. Kuyindulula mpi kisambu kepusaka beto na kumonisa ntonda sambu na zola mpi mayele ya Nzambi.—Tanga Yozue 1:8; Nkunga 1:1-3.

Nge lenda kwenda penepene na Nzambi kaka kana nge ketudila yandi ntima mpi kekwikila na yandi. Kansi lukwikilu kele bonso kima mosi ya moyo yina kelombaka nde bo disa yo. Nge fwete disa lukwikilu na nge konso ntangu na kutadilaka mambu yina nge kekwikilaka.—Tanga Matayo 4:4; Baebreo 11:1, 6.

Yehowa kelungisaka bampusa ya bantu yina kezolaka yandi. Yandi lenda tanina bo na konso kima yina lenda bebisa lukwikilu na bo mpi kivuvu na bo ya luzingu ya mvula na mvula. (Nkunga 91:1, 2, 7-10) Yandi kekebisaka beto na mambu yina lenda bebisa mavimpi na beto mpi kumanisa kyese na beto. Yehowa kelongaka beto mutindu ya kuvanda na luzingu ya kuluta mbote.—Tanga Nkunga 73:27, 28; Yakobo 4:4, 8.