BANTU yonso ke vandaka na basusi—yo vanda bansadi ya Nzambi. Muyimbi-bankunga sonikaka nde: “Basusi lutilaka mono.” (Nkunga 94:19) Yezu tubaka nde na ntangu ya nsuka, “basusi ya luzingu” lenda sala nde kusadila Yehowa kukuma kibeni mpasi. (Luka 21:34) Ebuna nge? Keti bampasi ya mbongo, bampasi ya dibuta to maladi ke lembisa nge nitu? Inki mutindu Yehowa lenda sadisa nge na kununga yo?

Beto lenda nunga ve basusi ti ngolo na beto mosi. Ntumwa Polo sonikaka nde: “Bo ke kamuna beto ngolo na mitindu yonso. . . . Beto ke zaba ve kima ya kusala . . . ; bo ke losa beto na ntoto.” Kansi, yandi tubaka diaka nde bo “ke kanga beto ve tii na kiteso yina beto lenda nikana ve,” “beto me konda ve nzila ya kubasikila,” mpi “bo ke fwa beto ve.” Inki ke sadisaka beto na kukanga ntima? “Ngolo yina me luta ngolo ya bantu” disongidila ngolo yina ke katukaka na Yehowa, Nzambi na beto nkwa-ngolo yonso.—2 Bakorinto 4:7-9.

Yibuka mutindu nge bakaka “ngolo yina me luta ngolo ya bantu” na bilumbu me luta. Keti nge ke yibuka mutindu diskure mosi yina pesaka nge kikesa kumisaka ngolo ntonda na nge sambu na zola ya kwikama ya Yehowa? Keti lukwikilu na nge na balusilu ya Yehowa kumaka kibeni ngolo ntangu nge longaka bantu ya nkaka kivuvu ya Paladisu? Ntangu beto ke kwendaka na balukutakanu ya Bukristu mpi ke zabisaka bantu ya nkaka lukwikilu na beto, beto ke bakaka ngolo sambu na kukangila basusi ya luzingu ntima mpi mabanza na beto ke kumaka na ngemba sambu na kusadila Yehowa ti kiese.

Na masonga yonso, nge lenda kudiwa bonso nde nge ke kwenda na bandambu mingi na mbala mosi. Mu mbandu, Yehowa ke lomba beto na kusosa ntete Kimfumu mpi na kusala mbala na mbala mambu ya kimpeve yina beto ke salaka. (Matayo 6:33; Luka 13:24) Kansi, inki nge lenda sala kana kimbeni, maladi to bampasi ya dibuta ke kanga nge nzila ya kusala mambu yina? Inki nge lenda sala kana kisalu ya kinsuni ke baka ntangu mpi ngolo yina nge zolaka kulutisa kumosi ti dibundu? Kana nge kele ti mambu mingi kibeni ya kusala—kansi ntangu mpi ngolo ya kusala yo kele fioti—yo lenda lembisa nge nitu. Ziku nge ke monaka bonso nde Yehowa ke lombaka nge mambu mingi kibeni.

Yehowa ke bakisaka. Yandi ke lombaka beto ve ata fioti mambu mingi kuluta yina beto lenda sala. Mpi yandi ke zabaka nde yo ke bakaka ntangu mingi sambu beto vutukila mavimpi ya mbote mpi kuyambula kudiyangisa na mabanza.—Nkunga 103:13, 14.

Mu mbandu, beto tadila mutindu Yehowa tudilaka mbikudi Eliya dikebi. Ntangu Eliya lembaka nitu ngolo, kumaka kuwa boma mpi tinaka na ntoto-­makanga, keti Yehowa nganinaka yandi mpi songaka yandi na kuvutuka na kisalu na yandi? Ve. Yehowa tindaka wanzio mbala zole sambu na kutedimisa Eliya na mpongi na mawete yonso mpi kupesa yandi madia. Ata mpidina, bilumbu 40 na nima,  Eliya vandaka kaka kudiyangisa mpi kuwa boma. Yehowa salaka diaka inki sambu na kusadisa yandi? Ntete, Yehowa monisaka nde yandi lenda tanina yandi. Na nima, Yehowa lembikaka Eliya na “ndinga mosi ya mawete, mpi ya nsi.” Nsuka nsuka, Yehowa monisaka nde kuvandaka ti mafunda ya bantu ya nkaka yina vandaka kusambila Nzambi na kwikama yonso. Ebuna, Eliya bakaka diaka ngolo sambu na kuvanda mbikudi ya kikesa. (1 Bantotila 19:1-19) Dilongi kele inki? Ntangu Eliya lembaka nitu sambu na basusi, Yehowa sadilaka yandi mambu ti kukanga ntima mpi mawa. Yehowa me sobaka ve. Na mambu mingi, yandi ke tudilaka beto dikebi mutindu mosi.

Ntangu nge ke yindula bima yina nge lenda pesa Yehowa, tadila mambu na masonga yonso. Kufwanisa ve mambu yina nge lenda sala bubu ti yina nge vandaka kusala. Beto baka mbandu: Kana muntu yina ke bakaka ntinu kuyambula kubaka ntinu bangonda mingi to bamvula mingi, yandi ta vutukila ve na mbala mosi kikalulu na yandi ya kubaka ntinu. Kansi, yandi ta yantika na kutula balukanu ya fioti-fioti yina ta sala nde yandi baka kikesa mpi ngolo. Bakristu kele bonso bantu yina ke bakaka ntinu. Bo ke salaka ngalasisi ti lukanu ya pwelele na mabanza. (1 Bakorinto 9:24-27) Sambu na nki ve kuditudila lukanu mosi ya kimpeve yina nge lenda lungisa sesepi yai kukonda mpasi? Mu mbandu, nge lenda kuditudila lukanu ya kuyantika kukwenda na lukutakanu ya dibundu. Lomba Yehowa na kusadisa nge na kulungisa lukanu na nge. Kana nge me baka diaka ngolo na kimpeve, nge ta ‘meka mpi ta mona nde Yehowa kele mbote.’ (Nkunga 34:8) Kuvila ve nde konso kima yina nge ke sala sambu na kumonisa zola na nge sambu na Yehowa—ata yo lenda monana fioti—kele mfunu mingi sambu na yandi.—Luka 21:1-4.

Inki mutindu Yehowa pesaka June ngolo ya kuvutuka na yandi? Yandi ke songa beto nde: “Mono vandaka kaka kusamba Yehowa mpi kulomba yandi na kusadisa mono. Ebuna, nkento ya mwana na mono songaka mono nde lukutakanu mosi ya nene ta salama na mbanza yina mono kele. Mono bakaka lukanu ya kukwenda ata kilumbu mosi na lukutakanu yina. Mono waka kiese mingi mutindu mono vukanaka diaka ti bansadi ya Yehowa! Lukutakanu yina vandaka lusadisu yina mono vandaka kuvingila. Ntangu yai mono ke sadila diaka Yehowa na kiese yonso. Luzingu me kuma mfunu mingi sambu na mono. Mono me zaba nde mono kele na mfunu ya bampangi-babakala ti bampangi bankento mpi mono fwete ndima lusadisu na bo. Mono kele na ntonda sambu ntangu kuvandaka ntete sambu mono vutuka.”