KITINI 1
“Mono Ta Sosa Yina Me Vila”
Dimeme me kuma kisaka-saka. Ntangu yo ke kwenda kudia matiti na nseke, yo me yambula mameme ya nkaka. Ntangu yai, yo ke mona diaka ve kibuka ya mameme mpi ngungudi. Mudidi me kota. Yo me vila na kati ya muwanda kisika yina bambisi yina ke fwaka mpi ke diaka bambisi ya nkaka ke tambulaka; dimeme me konda lutaninu. Nsuka-nsuka, yo me wa ndinga yina yo me yikanaka kuwa
MBALA NA MBALA Yehowa ke kudifwanisaka ti ngungudi ya mutindu yina. Yandi ke ndimisa beto na Ndinga na yandi nde: “Mono ta sosa mameme na mono mono mosi, mpi mono ta keba bo.”
“Mameme Yina Mono Ke Kebaka”
Mameme ya Yehowa kele banani? Na bunkufi, mameme ya Yehowa kele bantu yina ke zolaka yandi mpi ke sambilaka yandi. Biblia ke tuba nde: “Bika beto sambila mpi beto fukama; bika beto fukama na ntwala ya Yehowa muntu yina salaka beto. Sambu yandi kele Nzambi na beto, mpi beto kele bantu ya nseke na yandi, mameme ya yandi ke kebaka.” (Nkunga 95:6, 7) Mutindu mameme ke landaka ngungudi, bantu yina ke sambilaka Yehowa ke vandaka ti nzala ya ngolo ya kulanda Ngungudi na bo. Keti mameme yina me konda kifu? Ve. Bantangu ya nkaka, bansadi ya Nzambi kumaka bonso ‘mameme yina panzanaka,’ “mameme ya me vilaka,” mpi “bonso mameme yina ke vila nzila.” (Ezekiele 34:12; Matayo 15:24; 1 Piere 2:25) Ata mpidina, kana muntu mosi me vila, Yehowa ke vandaka ntangu yonso ti kivuvu nde yandi ta vutuka.
Keti nge ke kudiwa nde Yehowa kele kaka Ngungudi na nge? Bubu yai, inki mutindu Yehowa ke monisaka nde yandi kele Ngungudi? Tadila mitindu tatu:
Yandi ke disaka beto na kimpeve. Yehowa ke tuba nde: “Mono ta disa bo na nseke ya mbote. . . . Bo ta lala kuna na insi ya mbote ya kudia matiti, mpi bo ta dia na banseke ya kuluta mbote.” (Ezekiele 34:14) Yehowa me lembaka ve ata fioti kupesa beto na ntangu ya mbote madia ya kimpeve ya mutindu na mutindu yina ke pesaka beto kikesa. Keti nge lenda yibuka disolo mosi, diskure mosi, to video mosi yina pesaka mvutu na kisambu yina nge salaka sambu na kulomba yandi lusadisu? Keti yo ndimisaka nge ve nde Yehowa ke tudilaka nge kibeni dikebi?
Yandi ke taninaka mpi ke sadisaka beto. Yehowa ke sila nde: “Mono ta vutula yina ke yungana yungana, mono ta kanga babande na yina me lwala, mpi mono ta pesa yina me lemba kikesa.” (Ezekiele 34:16) Yehowa ke pesaka kikesa na bayina me lemba to ke niokwama na basusi. Yandi ke kangaka mameme babande mpi ke sansaka bamputa na bo kana bo me lwala
Yandi me zaba nde yandi kele mfumu na beto. Yehowa ke tuba nde: “Mono ta gulusa bo na bisika yonso yina bo panzanaka. . . . Mono ta sosa yina me vila.” (Ezekiele 34:12, 16) Sambu na Yehowa, kana dimeme mosi me vila yo ke tendula ve nde yo ta vutuka diaka ve. Yandi ke zabaka kana dimeme me vila, yandi ke sosaka yo mpi ke waka kiese kana yandi me mona yo. (Matayo 18:12-14) Nkutu, yandi ke bingaka bantu yina ke sambilaka yandi na masonga nde, “mameme na mono, mameme yina mono ke kebaka.” (Ezekiele 34:31) Nge kele dimeme mosi na kati ya mameme yina.
“Kumisa Bilumbu na Beto ya Mpa Bonso na Ntangu ya Ntama”
Sambu na nki Yehowa ke sosa nge mpi ke lomba nge na kuvutuka na yandi? Sambu yandi ke zola nde nge wa kiese. Yandi ke sila nde, “balusakumunu ta kulumuka bonso mvula” sambu na mameme na yandi. (Ezekiele 34:26) Lusilu yai kele ve ya luvunu. Nge mosi me monaka yo dezia.
Yibuka mambu yina nge bakisaka ntangu nge zabaka Yehowa. Mu mbandu, inki mutindu nge waka ntangu nge longukaka na mbala ya ntete bakieleka yina ke pesaka kiese na yina me tala zina ya Nzambi mpi lukanu na yandi sambu na bantu? Keti nge ke yibuka kikesa yina nge bakaka ntangu nge vukanaka ti bampangi-Bakristu na balukutakanu ya nene? Ntangu nge longaka muntu mosi nsangu ya mbote mpi yandi monisaka mpusa ya kieleka, keti nge vutukaka ve ti kiese na nzo?
Nge lenda wa diaka kiese yina. Bansadi ya Nzambi ya ntangu ya ntama sambaka nde: “Vutula beto na nge, O Yehowa, ebuna beto ta vutukila nge na luzolo yonso. Kumisa bilumbu na beto ya mpa bonso na ntangu ya ntama.” (Bidilu 5:21) Yehowa pesaka mvutu na kisambu yina, ebuna bantu na yandi kumaka diaka kusadila yandi ti kiese yina bo vandaka na yo ntete. (Nehemia 8:17) Yehowa ta sala mutindu mosi sambu na nge.
Kuvutuka na Yehowa kele pete na kutuba kansi yo kele mpasi na kusala yo. Tadila mwa mambu yina ke salaka nde kuvutuka kuvanda mpasi mpi inki mutindu nge lenda nunga yo.
Sambu na Yehowa, kana dimeme mosi me vila yo ke tendula ve nde yo ta vutuka diaka ve. Yandi ke waka kiese kana dimeme yina me monana
Nge Lenda Sepela Mpi Ti
DOKIMANTERE
Bambangi ya Yehowa
Yai disolo ya bantu yina ke zola kuzinga na kulanda nsemo ya kieleka ya Biblia, ata bo kutana ti konso diambu ya mpasi. Mbandu na bo ta pesa nge kikesa ya kulanda kusadila Nzambi na kwikama.
DOKIMANTERE
Bambangi ya Yehowa—Lukwikilu ya Ke Monana na Bisalu, Kitini 2: Nsemo Kusema
Yezu songaka balongoki na yandi na ‘kukumisa bantu ya makanda yonso balongoki.’ Sambu na mbangika mpi bampasi mingi, Balongoki ya Biblia monaka kibeni ntendula ya kubika nsemo kusema.
