KETI nge me kudiwaka bonso Linda, yina waka mpasi kibeni sambu na mambu yina mpangi mosi ya Mukristu salaka? Diambu ya mawa kele nde, bampangi ya nkaka me kudiyangisaka mingi sambu na bikalulu ya Bakristu ya nkaka mpi diambu yina me lembisaka bo na kusala mambu ya kimpeve yina bo vandaka kusala. Keti diambu yai me kuminaka nge?

Ya kieleka, beto lenda mona nde yo kele mpasi mingi kibeni na kulolula mpangi yina me lwadisa beto. Kansi, Bakristu fwete zolana. (Yoane 13:34, 35) Kana mpangi mosi me sala beto mbi, mawa mpi mpasi yina beto lenda wa lenda lembisa beto nitu.—Nkunga 55:12.

Ya kieleka, Biblia ke ndimaka nde bantangu ya nkaka Bakristu ke vandaka na ‘makambu ti Bakristu ya nkaka.’ (Bakolosai 3:13) Ata mpidina, kana diambu yina me kumina beto, beto lenda mona nde yo kele kibeni mpasi sambu na kukangila yo ntima. Inki lenda sadisa beto? Beto tadila minsiku tatu ya Masonuku:

Tata na beto ya zulu me zaba mambu yonso. Yehowa ke monaka mambu yonso ya ke salamaka, mu mbandu kukonda lunungu yina beto ke kutana ti yo mpi mpasi yina yo ke nataka. (Baebreo 4:13) Diaka, Yehowa ke waka mawa kana beto ke mona mpasi. (Yezaya 63:9) Yandi ke bikaka ve nde “bampasi to mawa” to konso kima yina—ata nkutu nsadi na yandi ya nkaka—“kukabula beto na zola ya Nzambi.” (Baroma 8:35, 38, 39) Keti beto lenda sala ve mutindu mosi, disongidila kubika ve nde konso kima yina to konso muntu yina kukabula beto ti Yehowa?

Kulolula ke tendula ve kukanga meso na mambi. Ntangu beto ke lolulaka bantu yina me sala beto mbi, beto ke monaka ve mambu yina mpamba, beto ke sosaka ve kumonisa nde mambu yina kele mbote, mpi beto ke kangaka ve meso na mambi yina bo me sala. Kuvila ve nde, Yehowa ke ndimaka ve masumu ata fioti, kansi yandi ke lolulaka yo kana bikuma ya kulolula kele. (Nkunga 103:12, 13; Habakuki 1:13) Ntangu Yehowa ke siamisaka beto na kulolula bankaka, yandi ke lombaka beto na kulanda mbandu na yandi. Yandi ‘ke vandaka ve na makasi kimakulu.’—Nkunga 103:9; Matayo 6:14.

Kana beto bumba ve kimbeni na ntima, beto mosi ta baka mambote. Inki mutindu? Yindula diambu yai. Nge me lokuta ditadi, ziku yina kele kilo mingi ve, mpi nge me simba yo na diboko. Kana nge simba yo sambu na ntangu fioti, ziku yo ta yangisa nge ve. Kansi inki ta salama kana nge simba yo bantangu mingi? Nge lenda simba yo bantangu ikwa—mwa minuta? Ngunga mosi? To bangunga mingi? Ntembe kele ve nde, diboko na nge ta lemba  ngolo! Ya kieleka, kizitu ya ditadi yina ta soba ve. Kansi kana nge me simba yo bantangu mingi, yo ta kuma kizitu mingi. Yo kele kiteso mosi ti kubumbila muntu kimbeni na ntima. Kana beto me bumbila muntu kimbeni na ntima bantangu mingi—ata nkutu sambu na ntangu fioti—beto ta kudipesa mpasi beto mosi. Yo yina, yo ke yitukisa beto ve na kuzaba nde Yehowa ke siamisa beto na kubumba ve kimbeni na ntima. Ya kieleka, kukonda kubumba kibeni na ntima kele sambu na mambote na beto mosi.—Bingana 11:17.

Inki sadisaka Linda na kubumba ve kimbeni na ntima na mutindu yina mpangi mosi sadilaka yandi mambu? Kuyindulula bikuma yina Biblia ke tubila sambu na kulolula bankaka kele na kati ya mambu yina sadisaka yandi. (Nkunga 130:3, 4) Kima yina sadisaka Linda mingi kele kuzaba nde kana beto ke lolula bantu ya nkaka, Yehowa mpi ta lolula beto. (Baefezo 4:32–5:2) Na kutadila mutindu mambu yina lembisaka yandi, Linda ke tuba nde: “Mono kudiwaka bonso nde Yehowa yandi mosi vandaka kutubila mono.”

Na nima, Linda kukaka diaka ve kubumba kimbeni na ntima. Yandi lolulaka mpangi-nkento yina na luzolo yonso, mpi bubu yai mpangi-nkento yina me kumaka nduku na yandi ya ngolo. Linda ke landa kusadila Yehowa. Tula ntima nde Yehowa ke zola kusadisa nge na kusala mutindu mosi.